0
0
Զգալի էր ստեղծուած պարապութիւնը:
Պարապութիւն մը, հայատառ թերթի մը բացակայութեան ստեղծած պարապութիւնը, որուն տեւողութիւնը եղաւ գրեթէ հինգ ամիս:
Պարապութիւն մը, որ մտահոգեց նոյնիսկ դժուարութեամբ հայերէն կարդացող եւրոպածին հայորդին:
Պարապութիւն մը, որ կը զգացուէր հին ցամաքամասի եւ մասնաւորաբար լոյսերու քաղաքի մօտակայ հայ երդիքներէն ներս:
Պարապութիւն մը, որ զգալի էր յատկապէս երբ դեռ հազիւ ամիս մը առաջ՝ Հոկտեմբեր 2-ին, փոխան Տղմուտ գետի…Սէնի ափին՝ Կոմիտասի արձանին մօտ, տեղւոյն հայութիւնը եկած էր իր «Ո°չ»ը արտայայտելու ՀՀ նախագահ Ս. Սարգսեանին:
Ամառնային երկար արձակուրդ մը կարելի է սեպել «Յառաջ»ի դադրիլն ու ապա «Նոր Յառաջ»ին լոյս ընծայուիլը:
Փակուած է «Յառաջ»ը: Փոխարէն՝ «Նոր Յառաջ»…Դէպի նոր յառաջխաղացք…չկան այդ հնամաշ, դժուար կարդացուելիք հին գլաններու դպրոցին պատկանող գիրերն ու կիրարկուած գործելաոճը, չկան այդ տժգոյն ու տրտմած դեղնորակ էջերը, ուր բազմիցս տպագրական ճնշումին տակ ընկճուած տարրերը կը մերժէին իրենց անսխալ արտացոլացումը ներկայացնելու, եւ այսպէս «Ը»ն բազմիցս կը տպուէր իբրեւ «Ր», իսկ «Է»ն ալ ելոյթ կ°ունենար իբրեւ «Ե» եւ սուր վիճաբանութեան դուռ կը բանար, քերականութեան մէջ մասնագիտացած հայորդիներու մօտ:
Այսպէս, հակառակ իր այս թեքնիք դժուարութիւններուն, կը փնտռենք, այդ իւրայատուկ…հովին դիմաց ծածանող եւ հուր սփռող «ՅԱՌԱՋ» նշանակը:
Փոխարէն՝ համակարգիչներու եւ բոլորովին արդի միջոցներով օժտուած «Նոր Յառաջ» մը, որ ոչ միայն պիտի ցրուի բաժանորդներուն, այլ նաեւ ելեկտրանամակի միջոցաւ եւ կայքէջի միջոցաւ պիտի գործէ հայորդիներու համակարգիչներէն ներս:
Նախկինին նման, կը սպասուի որ «Նոր Յառաջ»ն ալ դառնայ արտացոլացումը սփիւռքահայուն, իր արծարծած խոր եւ լուրջ նիւթերով, տեսակէտներով, կիզակէտներով, ակնարկներով եւ…բնագաւառներով:
Այլապէս, Ողջոյն «Նոր Յառաջ»ին…դէպի Նոր Յառաջխաղացք:
