ՀԱՆԴԻՊՈՒՄ՝ «ՍՈՒՐԲ ԳՐԻԳՈՐ ՏԱԹԵՒԱՑԻ» ԼՍԱՐԱՆԻ
ՆԻՒ ԵՈՐՔ․- Յունուար 11-12-ին, Արեւելեան Ա․Մ․Ն․-ի Ազգային Առաջնորդարանի Քրիստոնէական Դաստիարակութեան բաժանմունքը հովանաւորեց «Սուրբ Գրիգոր Տաթեւացի» ամառնային լսարանի հանդիպումը Սուրբ Լուսաւորիչ Մայր Եկեղեցւոյ մէջ։ Հանդիպումին ներկայ էին լսարանի վերջին երեք տարիներու 28 աշակերտներ հետեւեալ ծուխերէն՝ Սուրբ Լուսաւորիչ Մայր Եկեղեցի (Նիւ Եորք), Սուրբ Գրիգոր Լուսաւորիչ եկեղեցի (Ֆիլատելֆիա – Փենսիլվանիա), Սուրբ Վարդանանց եկեղեցի (Ռիճֆիլտ – Նիւ Ճըրզի), Սուրբ Ստեփանոս եկեղեցի (Ուաթըրթաուն – Մասաչուսէց) եւ Սուրբ Գրիգոր Լուսաւորիչ եկեղեցի (Նորթ Անտովըր – Մասաչուսէց)։
Մայր Եկեղեցւոյ հոգեւոր հովիւ՝ Արժպ. Տ. Մեսրոպ Քհն. Լագիսեան, բարի գալուստ մաղթեց ներկաներուն, ներկայացնելով եկեղեցւոյ հարուստ պատմութիւնը։ Բարշ. Շանթ Ա. Սրկ. Գազանճեան՝ Քրիստոնէական Դաստիարակութեան բաժանմունքի վարիչ, Սուրբ Գիրքի սերտողութիւն մը վարեց եւ դասախօսեց Նիկիոյ հանգանակի մասին՝ Նիկիոյ Տիեզերական Ժողովի 1700-ամեակին առիթով։ Երէցկին Մակի Գույումճեան՝ լսարանի դասախօսներէն, սորվեցուց երեք շարականներ, իսկ Թալին Լագիսեան եւ Աննա Թէքէեան՝ լսարանի անձնակազմէն, հայրենասիրական երգեր թարմացուցին եւ լսարանի դաստիարակչական բաժնի հիմամբ հարց ու պատասխանի խաղ մը կազմակերպեցին։ Մասնակիցները այցելեցին Ազգային Առաջնորդարանը, ինչպէս եւ Նիւ Եորքի շարք մը յայտնի վայրեր։
Շաբաթ օրուան կարճատեւ արարողութեան մը կողքին, աշակերտները նաեւ մասնակցեցան Կիրակի օրուան ժամերգութեան եւ Սուրբ Պատարագին, որուն կը նախագահէր Թեմիս բարեջան Առաջնորդ՝ Գերշ. Տ. Անուշաւան Արքեպիսկոպոս Դանիէլեան։
Յաւարտ Սուրբ Պատարագին, աշակերտները յուզեցին ծխականները իրենց սրտագրաւ շարականներով ու հայրենասիրական երգերով։ Առաջնորդ Սրբազան Հայրը խօսք ուղղեց աշակերտներուն, ընտանիքներուն եւ համայնքին, շնորհակալութիւն յայտնելով ծնողներուն, որ քաջալերած են իրենց զաւակներուն մասնակցութիւնը, եւ լսարանի անձնակազմին, ինչպէս եւ Արժպ. Տ. Մեսրոպ Քահանային եւ Մայր Եկեղեցւոյ հոգաբարձութեան իրենց հիւրասիրութեան եւ գործակցութեան համար։ Ծրագիրը իր աւարտին հասաւ Սուրբ Լուսաւորիչ Մայր Եկեղեցւոյ հովանաւորած ճաշկերոյթով։
«Սուրբ Գրիգոր Տաթեւացի» լսարանի 39-րդ շրջանը տեղի պիտի ունենայ 29 Յունիսէն մինչեւ 6 Յուլիս, St. Mary of Providence կեդրոնին մէջ (Էլվէրսըն – Փենսիլվանիա)։