0
0
Այսօր, ազգովին բոլորս ականատես եղանք սրտախոց, վշտալի պատահարի մը: Կարծես 10 ամսուայ Արցախի դէմ տեղի ունեցած անմարդկային շրջափակումը, ապա ատրպէյճանի յարձակումը եւ ժողովուրդի տեղահանումը բաւարար չէին….. Այսօր, Սեպտեմբեր 25, 2023-ին Արցախի Ստեփանակերտ-Ասկերան մայրուղիի յարակից պենզինի պահեստանոցին մէջ տեղի ունեցաւ ահեղ պայթում մը, որ ցնցեց քաղաքը: Կան տասնեակ զոհեր, հարիւրաւոր վիրաւորներ, ներառեալ երեխաներ:
Հ.Օ.Մ.-ը իր խորին ցաւակցութիւնները կը յայտնէ պայթումի հետեւանքով զոհուածներու ընտանիքներուն, շուտափոյթ ապաքինում կը մաղթէ վիրաւորներուն եւ ուժ, կորով ու համբերութիւն մեր հայրենակիցներուն:
Ներկայ հրատապ իրավիճակէն մեկնելով ՀՕՄ-ի մեծ ընտանիքը կը պահանջէ բոլոր միջազգային կազմակերպութիւններէն անմիջական օգնութեան ձեռք մեկնել Արցախին, օդային միջանցք բանալ եւ վիրաւորները տեղափոխել Հայաստան, անհրաժեշտ բուժման համար:
Այս դժուարին եւ տխուր պահերուն Հայ ազգի միասնականութիւնն ու հզօր կամքը անկասկած պիտի շողայ եւ բոլորս մէկ բռունցքի նման պիտի զօրակցինք Արցախի մեր հայրենակիցներուն, որոնք մեծապէս տուժած են այս պատահարներէն:
Հայ Օգնութեան Միութիւն
