97-ԱՄԵԱԿԻ ՁԵՌՆԱՐԿ ՖԼՈՐԻՏԱՅԻ ՄԷՋ
Ապրիլ 22-ին, Տեյթոնա Պիչի մէջ, տեղի ունեցաւ Հայոց Ցեղասպանութեան 97-ամեակի ձեռնարկ: Հայորդիներ ժամանեցին Ճէքսընվիլէն, Օրլանտոյէն, Մաունթ Տօրայէն, Լեսպըրկէն մասնակցելու այս ձեռնարկին: Կարգ մը ընտանիքներ աւելի քան երկու ժամ տրամադրելով, ժամանեցին այս հաւաքին:
Օրուան դասախօսն էր Արեւելեան Ա.Մ.Ն.-ի Կեդրոնական Կոմիտէի ներկայացուցիչ Անդրանիկ Գասպարեան, որ փոխանցեց օրուան խորհուրդը եւ կոչ ուղղեց երիտասարդներուն, շարունակ գործելու հաչս Հայ Դատի աշխատանքներուն:
Միւս կողմէ, Ֆլորիտայի հարաւային շրջանէն ներս, Ապրիլ 24-ին տեղի ունեցաւ հաւաք: Աւելի քան երեք հարիւր հայորդիներ ժամանեցին Պոքա Րաթոնի Հայ Կեդրոն: Ձեռնարկը կազմակերպուած էր տեղւոյ Հայ Դատի յանձնախումբին, “Արմինիըն Ասեմպլի“ին, “Վարդանանց Ասպետներ“ու եւ Սուրբ Մարի եւ Սուրբ Դաւիթ եկեղեցիներու հովանաւորութեամբ:
Բացման խօսքը կատարեց Շանթ Նորսիկեան: Պատարագ կատարուեցաւ Հայր Վարդան Ճուլֆայեանի եւ Ծայր. Վարդապետ Նարեկ Պէրպէրեանի կողմէ:
Օրուան բանախօսն էր Արեւելեան Ա.Մ.Ն.-ի Կեդրոնական Կոմիտէի ներկայացուցիչ Անդրանիկ Գասպարեան:
Գեղարուեստական յայտագրով, մասնակցեցաւ տեղւոյն Հ.Օ.Մ.-ի “Արեւիկ“ պարախումբը:
Ապա ցուցադրուեցաւ Պարէթ Մարոնեանի մրցանակակիր “Orphans of the Genocide” վաւերագրականը:
Կեղւոյն շաբաթօրեայ վարժարանէն աշակերտներ` Դաւիթ Սարգիսեան, Ռիթա Վարդանեան, Քալինա Մարոնեան, Ճոյ Մայքրլ կատարեցին արտասանութիւններ: Ալիք Մազմանեան մեներգեց “Սարերի Հովին Մեռնեմ“ը, իսկ Նաթալի Մազմանեան, փոխանցեց երիտասարդութեան խօսքը:
Ներկայ մը
