Տարեկան Ընթրիք՝ Ֆրանսահայ Կազմակերպութիւնները Համակարգող Խորհուրդի
Երեքշաբթի, Յունուար 27-ին, Փարիզի «Hôtel du collectionneur»-ին մէջ տեղի ունեցաւ ֆրանսահայ կազմակերպութիւնները համակարգող խորհուրդի (CCAF) տարեկան աւանդական ընթրիքը, որուն մերկայ գտնուեցան աւելի քան 400 հիւրեր: Ներկաներու շարքին էին Ֆրանսայի քաղաքական վերնախաւի կարկառուն դէմքեր՝ նախկին նախագահ Ֆրանսուա Հոլանտ, Ծերակոյտի նախագահ Ժեռար Լարշէ, վարչապետ Սեպասթիէն Լըքորնիւ, նախարարներ, ծերակուտականներ, երեսփոխաններ, Փարիզի քաղաքապետ Անն Հիտալկօ, ինչպէս նաեւ տարբեր ոլորտներէ՝ ծանօթ բազմաթիւ այլ անձնաւորութիւններ:
Երեկոյթի ընթացքին «Արիութեան շքանշան» (Médaille de courage) յանձնուեցաւ Ծերակոյտի նախագահ Ժերար Լարշէին՝ Արցախի եւ Հայաստանի ի նպաստ Ծերակոյտի որդեգրած բանաձեւերուն եւ զօրակցութեան համար, ինչպէս նաեւ վարչապետ Սեպասթիէն Լըքորնիւին՝ որպէս նախկին պաշտպանութեան նախարար ֆրանսեւհայկական ռազմական համագործակցութիւնը զարգացնելուն եւ Հայաստանի անվտանգութեան սատարելուն համար:
Համակարգող խորհուրդի համանախագահներ Արա Թորանեան եւ Մուրատ Փափազեան իրենց ելոյթներուն մէջ շեշտեցին Պաքուի մէջ պահուող 19 հայ պատանդներու անյապաղ ազատ արձակման հրամայականը, խստիւ դատապարտեցին Արցախի ցեղային զտումը եւ միջազգային հանրութեան կրաւորական կեցուածքը՝ պահանջելով գործնական պատիժներ Ազերպայճանի դէմ:
Ֆրանսայի կառավարութեան անունով ելոյթ ունեցան Ներքին գործոց նախարար Լօրան Նունիէզ եւ վարչապետ Լըքոռնիւ՝ վերահաստատելով Ֆրանսայի անվերապահ աջակցութիւնը Հայաստանի ինքնիշխանութեան եւ ժողովրդավարութեան:
Յիշատակելի էր Փարիզի քաղաքապետ Անն Հիտալկոյի յայտարարութիւնը, որ ֆրանսահայ կազմակերպութիւնները համակարգող խորհուրդին պիտի տրամադրուի նոր կեդրոնատեղի մը Փարիզի 16-րդ թաղամասի պատմական «Pavillon de I’Eau» շէնքին մէջ:
Նշենք, թէ Փետրուար 6-8-ին տեղի պիտի ունենան համակարգող խորհուրդի ժողովի ընտրութիւնները:
