Աւելի Քան 2000 Հայաստանցիներ Կրնան Ա․Մ․ն․-Էն Արտաքսուիլ
Յունուարի աւարտին, Միացեալ Նահանգներու ներգաղթի եւ մաքսային ծառայութիւնը (ICE) հրապարակեց զեկոյց մը, որուն մէջ կը տեղեկացնէր, որ ըստ անօրէն ներգաղթեալներուն դէմ նախագահ Տանըլտ Թրամփի քաղաքականութեան, Հայաստանի 2808 քաղաքացիներ պէտք է արտաքսուին։
Սփիւռքի գործերու գլխաւոր յանձնակատար Զարեհ Սինանեան տեղեկացուց, որ Երեւան ունի տեղեկութիւններ Հայաստանի քաղաքացիներու՝ Միացեալ Նահանգներէն արտաքսուելու կարելութեան մասին։
«Մենք գիտենք 2000-ից աւելի հայաստանցի քաղաքացիների մասին, բայց այդ թիւը շատ աւելի մեծ է: Նրանցից քանիսն են արդէն արտաքսուել` մեզ յայտնի չէ: Այդ հարցով այլ կառոյցներ են զբաղւում, արտաքսուած քաղաքացիներն էլ չեն կարող Սփիւռքի մաս համարուել, քանի որ ԱՄՆում գտնուել են ապօրինի», ըսաւ Սինանեան։
Միւս կողմէն, վերջերս Միացեալ Նահանգներու ներգաղթի եւ մաքսային ծառայութեան կողմէ Նեւատա նահանգի Լաս Վեկաս քաղաքին մէջ ձերբակալուած է «Դեմոկրատիա օրէնք եւ կարգապահութիւն» կուսակցութեան հիմնադիր նախագահ Վարդան Ղուկասեան, որուն արտաքսում կը սպառնայ:
Ըստ նոյն ծառայութեան` 47-ամեայ Ղուկասեան Փետրուար 19, 2022-ին մուտք գործած է Միացեալ Նահանգներ, սակայն մուտքի պայմաններով նախատեսուած ժամկէտին չէ հեռացած երկիրէն եւ այդ պատճառով ան ենթարկուած է գաղթականութեան ընթացակարգի: Աւելի կանուխ, «Դեմոկրատիա օրէնք եւ կարգապահութիւն» կուսակցութիւնը տարածեց յայտարարութիւն մը՝ յայտնելով, որ Վարդան Ղուկասեան կը գտնուի վերահսկողութեան տակ, սակայն, ըստ կուսակցութեան, ան չէ ձերբակալուած:
