0
0
ՍՏԵՓԱՆԱԿԵՐՏ․- Արցախի Հանրապետութեան Ազգային ժողովի լրատուութեան եւ հանրութեան հետ կապերու բաժանմունքը հետեւեալ մեկնաբանութիւնը լոյս ընծայած է Ատրպէյճանի նախագահի Մայիս 28-ի յայտարարութեան վերաբերեալ:
Ազգային Ժողովը կը յայտնէ, թէ․
«Ատրպէյճանի նախագահի Մայիս 28-ի յայտարարութիւնները հերթական անգամ ընդգծուած սպառնալիքներ են պարունակել Արցախի ժողովրդի եւ իշխանութիւնների հանդէպ` ոտնահարելով միջազգային իրաւունքի հանրայայտ կանոնները եւ Ատրպէյճանի կողմից ստանձնած միջազգային պարտաւորութիւնները:
Այս անգամ պահանջելով Արցախի ժողովրդի կողմից ժողովրդավարական հիմունքներով ընտրուած մարմինների` նախագահի եւ Ազգային ժողովի, ինչպէս նաեւ պետական մնացած հաստատութիւնների կազմաքանդումը` Ատրպէյճանի ղեկավարը հերթական անգամ ապացուցել է, որ պատրաստ է ուժի եւ ուժի սպառնալիքի կիրառմամբ շարունակել Արցախի ժողովրդի ցեղային զտման եւ տարածքների բռնազաւթման քաղաքականութեան իրականացումը: Սա եւս մէկ ապացոյց է, որ Արցախի ժողովուրդը պարզապէս չի կարող Ատրպէյճանի կազմում ապրել` այնտեղ տիրող հայատեաց ու հայամերժ քաղաքականութիւնից բխող գոյաբանական վտանգների պատճառով:
Արցախի ժողովուրդն ընտրել է իր ինքնորոշման, ինքնիշխանութեան ու պետականակերտման ճանապարհը, որոնց յենասիւներից են նախագահն ու Ազգային ժողովը: Ուստի, վճռականօրէն դատապարտում ենք Արցախի ժողովրդի ինքնորոշման իրաւունքի, ինքնիշխանութեան եւ անվտանգութեան, ինչպէս նաեւ տարածաշրջանի խաղաղութեան հանդէպ այսպիսի յարձակումները եւ ռազմական գործողութիւնների վերսկսման սպառնալիքները:
Դիմելով միջազգային հանրութեան բոլոր դերակատարներին, այդ թւում` 2020 թուականի նոյեմբերի 9-ի եռակողմ յայտարարութիւնը ստորագրած Ռուսաստանի Դաշնութեանն ու Հայաստանի Հանրապետութեանը, ինչպէս նաեւ` տարածաշրջանում խաղաղութեամբ ու կայունութեամբ շահագրգռուած բոլոր ենթականերին` ակնկալում ենք նրանց գործնական ու աշխուժ գործողութիւնները` վերացնելու Արցախի գրեթէ վեցամսեայ շրջափակումը եւ այլ շարունակական ոտնձգութիւնները, ինչպէս նաեւ` կանխելու Ատրպէյճանի կողմից Արցախի ժողովրդի դէմ ուղղուած նոր յանցագործութիւնները, այդ թւում` հնարաւոր ռազմական նախայարձակումը:
Միջազգային հանրութեան պարտաւորութիւնն է երաշխաւորելու նաեւ Արցախի ժողովրդի անվտանգութիւնը, որը ոչ մի վտանգ չի ներկայացնում միջազգային խաղաղութեան հանդէպ եւ պարզապէս ձգտում է ազատ ու արժանապատիւ կերպով ապրել իր հայրենի հողում` միջազգային իրաւունքի հիմնարար կանոնների հիման վրայ:
Արցախի Հանրապետութեան Ազգային ժողովը, որպէս ժողովրդի կողմից ընտրուած բարձրագոյն մարմին, անկախ Ատրպէյճանի կողմից պարբերաբար կրկնուող սպառնալիքներից, կը շարունակի իրագործել պետականակերտման իր հիմնական առաքելութիւնը եւ ազատ ապրելու մեր իրաւունքների պաշտպանութիւնը»:
