0
0
ՊՈԼԻՍ․- Կիրակի, Մայիս 14-ին տեղի ունեցած Թուրքիոյ բոլոր քուէներու հաշուարկէն ետք յստակացաւ նախագահական ընտրութեան վերջնական արդիւնքը: Քուէներու թիւով յառաջատարը գործող նախագահ Էրտողանն է, որուն ի նպաստ քուէարկած է ընտրողներուն 49,42 առ հարիւրը: Անոր գլխաւոր մրցակից Քեմալ Քըլըչտարօղլու ստացած է քուէներուն 44,95 առ հարիւրը: Նախագահի միւս թեկնածուն` «Աթա» դաշինքէն 55-ամեայ Սինան Օկանը ստացած է քուէներուն 5,28 առ հարիւրը:
Այսպէս, ոչ ոք կրցած է ապահովել քուէներուն 50 առ հարիւրը, ինչ որ կը նշանակէ, որ յաղթողը պիտի որոշուի երկրորդ փուլին, որ տեղի պիտի ունենայ Մայիս 28-ին:
Ընդդիմութեան թեկնածու, Հանրապետական ժողովուրդի կուսակցութեան ղեկավար Քեմալ Քըլըճտարօղլու իր կարգին յայտնեց, որ «եթէ մեր ժողովուրդի որոշումը երկրորդ փուլ կատարել է, ապա հաստատօրէն ատոր մէջ պիտի յաղթենք»` աւելցնելով. «Հասարակութեան մէջ փոփոխութեան կամքը 50 առ հարիւրէն բարձր է»: Իսկ Էրտողան յայտարարեց. «Եթէ ժողովուրդը երկրորդ փուլի ի նպաստ ընտրութիւն կատարած է, ապա մենք պատրաստ ենք այս որոշումը ընդունելու»:
«Աթա» դաշինքի թեկնածու Սինան Օղան յայտնեց, թէ Քըլըճտարօղլուին պիտի աջակցի այն ժամանակ միայն, երբ քիւրտերուն զիջումներ կատարելէ ետ կանգնի:
Միւս կողմէ, խորհրդարանական ընտրութիւններուն, Էրտողանի ղեկավարած «Արդարութիւն եւ բարգաւաճում« կուսակցութեան գլխաւորած «Հանրապետական դաշինք»-ը քուէներու 99,55 առ հարիւրի հաշուարկէն ետք ստացած է քուէներու 49,3 առ հարիւրը: Ինչ որ կը նշանակէ, թէ դաշինքը կը ստանայ 322 աթոռ` 600 աթոռներէ բաղկացած խորհրդարանի մեծամասնութիւնը:
Քըլըճտարօղլուի ղեկավարած «Ժողովրդավարական դաշինք»-ը ստացած է քուէներուն 35,19 առ հարիւրը կամ շուրջ 212 աթոռ: Աշխատանքի եւ ազատութեան դաշինքը, որուն կազմին մէջ ընդգրկուած է Կանաչներու ձախ կուսակցութիւնը, կրնայ ստանալ 66 աթոռ: «Աթա» դաշինքը խորհրդարանին մէջ աթոռ պիտի չստանայ:
