0
0
Մայիս 7-ին, Ֆիլատելֆիոյ Հ․Օ․Մ․-ի «Արտեմիս» մասնաճիւղի կազմակերպութեամբ, նշուեցաւ «Մայրերու Օր»-ը, հովանաւորութեամբ Մարի Շիրոզեան-Հացագործեանի եւ Շիրոզեան ընտանիքին։
Աւելի քան 35 ընկերուհիներ եւ բարեկամներ ներկայ էին։
Մասնաճիւղի Ատենապետուհին՝ ընկ․ Նայիրի Պալապանեան իր բարի գալուստի խօսքին մէջ ըսաւ․-«Եթէ ՍԷՐ բառին հոմանիշ պէտք է տալ, կը կարծեմ, որ ՄԱՅՐ բառը լաւագոյնն է։ Մօր մը համար զաւակը իր կարեւորագոյն գանձն է, սիրոյ եւ գուրգուրանքի կեդրոնը։ Մենք մեր թոռնիկները շատ կը սիրենք, որովհետեւ անոնք մեր պաշտած զաւակներուն զաւակներն են։ Հայերը իրենց սրբութիւններուն տուին ՄԱՅՐ անունը, Մայր Հայաստան՝ Հայրենիք, Մայրենի լեզու, Մայր եկեղեցի, մայրաքաղաք կամ քաղաքամայր, մայրուղի։ Ամէն կին, զաւակ ունի կամ ոչ, մայրական գուրգուրանք ունի իր կամ իր հարազատներուն կամ օտարի զաւակներուն։ Ամէն անգամ, որ աղջիկ զաւակ մը ծնի, նոր մայր մը կը ծնի։ Վռամեան ըսած է․- “ԱԶԳԵՐՈՒ ՄԱՅՐԸ ԿԻՆՆ Է, Կ՛ԸՍԵՆ ԻՄԱՍՏՈՒՆՆԵՐԸ, ՄԵՆՔ ԸՍԵՆՔ ԱԶԳԵՐՈՒ ԱՄԲՈՂՋ ԲԱՐՈՅԱԿԱՆ ԱՂԲԻՒՐԸ ԿԻՆՆ Է։ Հ․Յ․Դաշնակցութիւնը Կնոջ տալու համար ուժ, պատեհութիւններ, իր կարողութիւնները սպաս դնելու իր ազգին համար 1910-ին, շնորհիւ Ակնունիի ժրաջան աշխատանքին, հիմը դրաւ Հ․Յ․Դ․ Կարմիր Խաչին, որ պատնէշի վրայ է եւ միշտ կը զօրանայ նոր աւիշով։
Հ․Օ․Մ․-ը Հայ Ազգին Մայրն է ․․․ ինչպէս մօր սիրտը կ՛ուրախանայ իր զաւկին յաջողութիւններուն համար եւ կը տխրի անոր ձախողութիւններուն համար, մեր Ժողովուրդին ցաւը կը տանի։
Այսօր ուրախ ենք, որ մեր մէջ կը գտնուին երեք շատ նուիրուած ու սիրելի ընկերուհիներ, որ աւելի քան յիսուն տարիներ կը ծառայեն մեր ազգին մաս կազմելով Հ․Օ․Մ․ի բանակին»։
Ապա հրաւիրեց մասնաճիւղի նուիրեալ ընկերուհիներէն՝ Անահիտ Շիրոզեանի, Գայանէ Շիրոզեան-Պարզաքեանի եւ Վարդուհի Շիրոզեան-Գումրիկեանի, որպէսզի յանձնուին 50-ամեակի յուշանուէրները։
