Լոյս տեսաւ.- ՎՐԷԺ-ԱՐՄԷՆԻ 21րդ ՀԱՏՈՐԸ
Նախորդ հատորներուն նման ահա առցանց լոյս տեսաւ Վրէժ-Արմէնի նոր հատորը՝ «ՈՍՏԱՅՆ 21 – ՁԱՅՆՆ ԱՅԼՈՑ», ուր 230 էջերով ի մի բերուած են 55 գրութիւններ, որոնք բոլորն ալ թարգմանութիւններ են։ Անոնք գրուած են ուրիշներո՛ւ կողմէ, որոնք, բացի երեք անուններէ, հայեր չեն։
Հատորին սկիզբը կը նշուի, թէ թարգմանութիւններուն ջախջախիչ մեծամասնութիւնը ունի ոչ-գրական բնոյթ, ուստի անոնք զետեղուած են ընդհանուր «Իմացական դաշտ» բաժնին մէջ, իսկ գրական գործերը՝ «Գրական դաշտ» բաժնին։ Այս վերջիններուն մաս կը կազմեն երկու բանաստեղծութիւն, մէկը՝ Պարոյր Սեւակէն՝ ֆրանսերէնի թարգմանուած, միւսը Փոլ Էլիւարէն՝ հայերէնի։
Ընթերցողը այս հատորին մէջ պիտի գտնէ Վրէժ-Արմէնի թարգմանական առաջին փորձերէն ալ նմուշներ, որոնք վկայութիւն մը կը հանդիսանան իր հետաքրքրութիւններուն՝ վաղ տարիքէն սկսեալ։ Ան դիտել կու տայ, թէ «նոյնը կրնամ ըսել 67 տարիներու վրայ երկարող այս բոլոր գրութիւններուն համար, որոնց արծարծած հարցերը մեր ընդհանրական, համամարդկային հարցերն են, որոնք իրենց լուծման կը սպասեն տակաւին»։
Հեղինակներէն ոմանք իրենց կեանքին ընթացքին մեծ դերակատարութիւն ունեցած անձեր են, ինչպէս Վացլաւ Հաւել, Ալեքսանտր Սոլժենիցին կամ Տէյվիտ Լուիս, իսկ ուրիշներ ալ աշխարհի հարցերը լաւապէս դիտած ու մեկնաբանած մտածողներ են, ինչպէս Չարլզ Թէյլըր, Ժան Տանիէլ կամ Ճըրմէյն Կրիր։ Գրական կտորներ թարգմանուած են Նանսի Հիւսթընէն, Հանս Ռիմանէն, Ֆրետ Փելըրէնէն եւ ուրիշներէ։
Այս հատորը ձօնուած է «տարիներու գործակցիս ու աշխատակցիս, բայց մանաւանդ հայերէնի աչալուրջ հսկիչիս՝ Արմենակ Եղիայեանի անմոռ յիշատակին», կը գրէ Վրէժ-Արմէն։ Ան շնորհակալութիւն կը յայտնէ իր կեանքի ընկերոջ՝ Նազիկին, որ միշտ իր առաջին ընթերցողն ու սրբագրիչը կը հանդիսանայ, Սոնա Թիթիզեան-Կէտիկեանին, որ բծախնդիր շարագրողն է չթուայնացած իր յօդուածներուն, եւ Իշխան Չիֆթճեանին, որ իր Հայերէն blog կայքէջին վրայ կը հիւրընկալէ իր հատորները։ Անոնք բոլորը, կարելի է կարդալ այստեղ՝ https://hayerenblog.wordpress.com / «Գիրքեր» բաժինին մէջ, իսկ հեղինակին նամականիէն կարեւոր մաս մը՝ «Անտիպ» բաժինին մէջ։ Տես ՈՍՏԱՅՆ 21 – ՁԱՅՆՆ ԱՅԼՈՑ – Հայերէն blog ։
Բարի ընթերցում։
