ՕԺԱՆԴԱԿՈՒԹԻՒՆ Հ.Օ.Մ.-ԷՆ՝ ՍՈՒՐԻԱՀԱՅ ՕԳՆՈՒԹԵԱՆ ԽԱՉԻՆ
Հայ Օգնութեան Միութիւնը, հաւատարիմ իր կարգախօսին` “Ժողովուրդէս` Ժողովուրդիս“, ականջալուր ըլլալով հայ ազգի զաւակներու յարափոփոխ կարիքներուն, Աստուածահաճոյ ծառայութեամբ իր լա-ւագոյնը ի սպաս կը դնէ:
Սուրիոյ տարածքին չորս տարի առաջ ծագում առած պատերազմի ընթացքին, Հ.Օ.Մ.-ի Կեդր. Վարչութիւնը նախաձեռնողը եղաւ եւ աշխարհասփիւռ միաւորներու յանձնառու ու անվերապահ աջակցութեամբ օժանդակութեան ձեռք երկարեց Սուրիոյ եւ յատկապէս Հալէպ քաղաքի կենցաղային ծանր պայմաններ ապրող բնակչութեան, զանազան ծրագիրներու միջոցաւ:
Սուրիահայ Օգնութեան Խաչի Շրջանային Վարչութիւնը իրագործեց իրեն վստահուած ծրագիրները` զօրակից ունենալով Հ.Օ.Մ.-ի համահայկական ընտանիքը կամ երբեմն յատուկ ծրագիրներու պարագային Հ.Օ.Մ.-ի տարբեր շրջաններուն առանձին միաւորներ:
Մարտ 25-ին, Ս. Գրիգոր Լուսաւորիչ եկե-ղեցւոյ սրահէն ներս, Ս. Զատկուան նախօրեակին, Հ.Օ.Մ-ի Արեւելեան Ամերիկայի Շրջ. Վարչութեան հանգանակած նուէր գումարով, Ս.Օ.Խաչի Խնամատարականի 300 կարիքաւոր ընտանիքներ նիւթական օժանդակութիւն ստացան:
Հաւաքի ընթացքին, Ս.Օ.Խաչի Շրջ. Վարչութեան ատենապետուհի ընկհ. Աննա Տ. Յակոբեան իր խօսքին մէջ անդրադարձաւ Հ.Օ.Մ.-ի Ամերիկայի Արեւելեան շրջանի յանձնառու զօրակցութեան եւ գաղութիս ուղարկած այլ օժանդակութիւններուն, ինչպէս 2013-ին, նորածին մա-նուկներ ունեցող ընտանիքներուն “Երաշխաւորէ հայ ընտանիք մը“ ծրագիրին:
Ան իր խօսքը ուղղելով, ընտանիքներուն ըսաւ.
“Հակառակ, որ այսօր քանդըւած վիճակի մէջ է Ս.Օ.Խաչի կեդրոնը, սակայն ինչ պայմաններու տակ ալ գտնուինք, պիտի շարունակենք մատուցել մեր ծառայութիւնները բոլորիդ“:
Ան շնորհաւորեց բոլորին Ս. Զատիկը, մաղթեց որ շուտով վերջ գտնէ այս պատերազմը եւ Ս.Օ.Խաչը գործը շարունակէ իր կեդրոնէն ներս: Ան Ս.Օ.Խաչի միջոցաւ բոլոր սուրիահայութեան երախտագիտութիւնը յայտնեց Հ.Օ.Մ.-ին եւ յատկապէս Հ.Օ.Մ.-ի Արեւելեան Ամերիկայի Շրջանային Վարչութեան:
Թալին Մինասեան ներկաներուն բացատրեց այս նիւթական օժանդակութեան բարի նպատակը:
Հ.Օ.Մ.-ի Կեդր. Վարչութեան անդամ ընկհ. Զեփիւռ Րէյիսեան իր խօսքին ընթացքին անդրադարձաւ Հ.Օ.Մ.-ի առաքելութեան: Ան ըսաւ.
“Հակառակ անոր, որ Հ.Օ.Մ.-ականները կը գտնուին մեզմէ հեռու երկիրներու մէջ, սակայն մտահոգութեամբ կը հետեւին պայմաններուն եւ գաղութիս դիմագրաւած դժուարութիւններուն ու չեն զլանար իրենց կարելի օժանդակութիւնը հասցնել տագնապահար գաղութի զաւակներուն“:
Խօսքի աւարտին, ընկերուհին գնահատեց Ս.Օ.Խաչի ընկերուհինե-րուն աշխատանքը, որ այս դժուար օրերուն, ինչպէս “Այրի կնոջ լուման“, իրենց կարելին կ՛ընեն եւ կը փորձեն օգտակար դառնալ գաղութիս զաւակներուն:
Հաւաքին ներկայ ընտանիքները գոհունակութիւն եւ երախտագիտութեան աղօթքներ բարձրացնելով մեկնեցան: Հ.Օ.Մ.-ը անգամ մը եւս կարողացաւ չքաւորին աչքէն արցունքը սրբել եւ դէմքին ժպիտ մը գծել:
