ՔՍՏՄՆԵԼԻ ԱՐԱՐՔ…ՏՊԱԳՐԻՉՆԵՐՈՒ ՓՈՂՈՑԻՆ ՄԷՋ

0 0
Read Time:1 Minute, 45 Second

hayrikian 2  ՀԱՅՐԵՆԻՔ

Փետրուար 1, 2013

Պարոյր Հայրիկեանի դէմ ահաբեկչական քստմնելի եւ սադրիչ արարքը պատահեցաւ, իր բնակարանին մօտ, Տպագրիչներու փողոցին մէջ: …Փողոց մը, որ կը ստիպէ բաղդատական մը կատարել եւ յիշել, տարիներ շարունակ տպագրական բնագաւառէն ներս, մեծ հռչակ սփրած պելճիքացի ոստիկանական վէպերու թագաւոր Ժորժ Սիմընոնը, որու գործերուն հերոս ոստինապետը` Ժիւլ Մէկրէն եթէ պաշտօնի գլուխ անցած ըլլար, հազիւ քանի մը ժամէն պատրաստած պիտի ըլլար տեղեկագիրն ու …Երեւանի մէջ` երեւան հանած յանցանքի ետին կանքնող մութ ձեռքերը:

Չէ՜…կատակի կամ չափազանցութեան ժամանակը չէ, յատկապէս այս արարքին առնչութեամբ: Հաւանաբար նոյնինքն այս տարուայ ընտրութիւններն ու քաղաքական գետնի վրայ կատարուած անցուդարձերը խեղկատակութիւն մըն են, սակայն ապահովական իմաստով, Հինգշաբթի Յունուար 31-ին կատարուած արարքը շատ աւելի լուրջ բնոյթ ունէր: Նոյնքան լուրջ, որքան Մարտ 1, 2008-ի յետ-ընտրական խռովութիւնները, կամ ժամացոյցը, անցեալ դարու վերջին օրերը փոխադրելով` Հոկտեմբեր 24, 1999-ին, Խորհրդարանէն ներս ծագած միջադէպքը, որուն արդիւնք` զոհ գացին այլոց կարգին վարչապետ Վազգէն Սարգսեանն ու Ազգային ժողովի խօսնակ Կարէն Տէմիրճեանը:

Միեւնոյն ժամանակ նաեւ, այս պատահածը կը յիշեցնէ “Հարսնաքար“ի դէպքը, ուր ինքնագլուխ թիկնապահներ, ծանր հարուածներ ողղելով Պաշտպանութեան Նախարարութեան մօտ ծառայող սպայ Վահէ Աւետեանին, պատճառ դարձան անոր մահուան եւ …անշուշտ իրենց տիրոջ նսեմացման ու խայտառակութեան:  Դժբախտաբար (թէեւ, ինչ որ ալ ըլլան պայմանները…) շատ հաւանական է որ, այս վերջին վարկածին նման բան մըն է պատահածը: Մութ ձեռքեր ներքին թէ արտաքին հաշիւներով, նմանօրինակ կացութիւններ ստեղծելով եւ խախտելով երկրին ապահովութիւնը, երկիրը կը տանին դէպի անորոշութիւն:

Դեռ քանի մը օր առաջ, այլ թեկնածու մը` Րաֆֆի Յովհաննէսեան յայտնած էր թէ ինք թիկնապահի կարիքը չունի, իր նախընտրական քարոզարշաւը կատարելու համար…

Մէկ բան յստակ է թէ, այդ անծանօթ խուլիկանին սեղմած ատրճանակին բլթակէն դուրս եկած փամփուշտը վնասած էր, տարիներ շարունակ Խորհրդային օրերուն բանտարկուած եւ Արցախի ազատագրութեան օրերուն հետեւողական գործունէութիւն տարած Ազգային տիպար մը` Պարոյր Հայրիկեանը: Ուղղութեան ամենադոյզն փոփոխութիւնը, կրնար դուռ բացած ըլլալ, շատ աւելի ահաւոր կացութիւններու: Բարեբախտաբար, Հայրիկեան համեմատած Խորհրդային օրերու ծառայած բանտի օրերուն, շատ աւելի կարճ կեցութիւն մը պիտի ունենայ Սուրբ Գրիգոր Լուսաւորիչ հիւանդանոցէն ներս:   

Դեռ շուտ է վերջնական եզրակացութիւններու յանգիլն ու արարքի ետին եղող խանգարիչ տարրերու մասին խօսիլն ու անոնց դատի կանչելն, բանտարկութեան ենթարկելու վճիռ արձակելը, եւայլն:

Մինչ այդ հարենի ոսրիկանապետ “Ժիւլ Մեկրէ“ներ գործի լծուած են այս քստմնելի արարքի ետին կանգնող մութ ձեռքերը յայտնաբերելու:

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles