0
0
ՊՈԼԻՍ, ԵՐԵՒԱՆ.- Վերջին երկու ամիսներուն, Սամաթիոյ մէջ տարեց հայ կիներու վրայ կատարուած յարձակումները կը շարունակեն մնալ հասարակութեան ուշադրութեան առանցքը, եւ զանազան կազմակերպութիւններ իրենց ձայնը կը բարձրացնեն ու կը դատապարտեն այդ յարձակումները:
Բողոքի ցոյց մը կազմակերպուեցաւ Պոլսոյ Կնոջական շարժումի խմբաւորման նախաձեռնութեամբ: Հանրահաւաքը տեղի ունեցաւ Սամաթիոյ մէջ, սպաննուած Մարիձա Քիւչիւքի տան մօտ: Մօտաւորապէս երկու հարիւր ցուցարարներ սեւ հագուստներ հագած‘ կը կրէին “Հայ կիները միայնակ չեն“, “Ես Եւա եմ“, “Ես Մարիձա եմ“, “Իմ դրացիիս մի՛ դպչիր“, “Ատելութեան յանցանքի օրէնք մը ընդունիլ“ եւ նոյնանման գրութիւններ: Հայերէնով ու թրքերէնով կարդացուեցան մամլոյ հաղորդագրութիւններ ու նշուեցաւ, թէ տարեց հայ կիներու վրայ գործուած յարձակումները պատահական յարձակումներ չեն, այլ` հետեւողական դէպքեր: Յայտարարութեան մէջ քննադատութիւններ կային իրաւապահներու հասցէին. նշուեցաւ, որ յարձակումները գողութեան նպատակ չէին հետապնդեր, այլ կատարուած էին ազգային ենթահողի վրայ: Դիտել տրուեցաւ նաեւ, որ իրաւապահները տակաւին յստակ որեւէ պարզաբանում չեն տուած յարձակումներուն վերաբերեալ:
Միւս կողմէ, Կիրակի Փետրուար 11-ին, Հ.Յ.Դ. “Նիկոլ Աղբալեան“ ուսանողական միութիւնը, Երիտասարդ դիւանագէտներու ակումբ երիտասարդական հասարակական կազմակերպութիւնը եւ Երիտասարդ “Գետաշէն“ երիտասարդական բարեգործական հիմնադրամը ներկայացնող խումբ մը ցուցարարներ ցոյց կատարեցին դէպի Երեւանի մէջ Մ.Ա.Կ.-ի գրասենեակ` բաց նամակ յանձնելու Թուրքիոյ մէջ հակամարդասիրական բռնութիւններուն վերաբերեալ:
Բաց նամակին մէջ գրուած էր.- “Թուրքիոյ Պոլիս քաղաքի Սամաթիա թաղամասին մէջ հայազգի կիներու նկատմամբ կ՛իրականացուին շարունակական յարձակումներ եւ բռնութիւններ: Այս առնչութեամբ թրքական իշխանութիւններու թոյլտուութեան եւ կրաւորական կեցուածքը պարարտ հող ստեղծած են այդ երկրին մէջ ատելութեան, անհանդուրժողականութեան, հայութեան մէջ վախի մթնոլորտի ձեւաւորման համար: Անյապաղ կը պահանջենք Թուրքիոյ իշխանութիւններէն` ապահովել իրենց քաղաքացիներուն ապահովութիւնը եւ հետամուտ ըլլալ վերոնշեալ ոճիրներու բացայայտման եւ դատապարտման: Կոչ կ՛ուղղենք Մ.Ա.Կ.-ին, Եւրոպական Միութեան, Եւրոպական խորհուրդին եւ այլ միջազգային ու իրաւապաշտպան կառոյցներուն` անյապաղ արձագանգելու թրքական իշխանութիւններու անգործութեան եւ համապատասխան միջոցներ ձեռնարկելու այդ երկրին մէջ ազգայնամոլական հետապնդումներու կասեցման ու անմեղ մարդոց պաշտպանութեան համար“:
Նաեւ պարզուած էին պաստառները, որոնց վրայ գրուած էին.- “Ցեղասպան Թուրքիան պէտք է պատժուի“, “Ոչ մէկ զիջում Թուրքիոյ“, “Ամօ՛թ միջազգային հանրութեան, ցեղասպան Թուրքիան պէտք է պատասխան տայ“, եւայլն:
