0
0
Շաբաթ, Նոյեմբեր 19, 2011-ին, իր տարեկան ելոյթը ունեցաւ Տիթրոյթի Համազգայինի “Արաքս“ պարախումբը, տեղւոյն “Հայ Կեդրոն“ի սրահին մէջ, ղեկավարութեամբ` պարուսոյց Օրդ. Լարա Զանազանեանի եւ օգնական պարուսոյցներ` օրդ. Նայիրի Գայսէրեանի, պրն. Շանթ Գասպարեանի եւ Տիգրան Գալընի:
Ներկայ էին գաղութի երեք յարանուանութեանց հոգեւոր հայրերը, եւ շուրջ երեք հարիւր յիսուն հանդիսականներ:
Օրուան հանդիսավարն էր Տիթրոյթի Համազգայինի ատենապետուհի` Հերմինէ Մանուկեանը, որ մանրամասնօրէն անդրադարձաւ խումբին մասին; Ստորեւ, յապաւումով լոյս կ՛ընծայենք Մանուկեանի խօսքը.-
“Անցեալ տարուան բաւական յաջող “Արաքս“ պարախումբի ելոյթէն վերջ, պարախումբի ղեկավար պատասխանատու` ընկերուհի` Նայիրի Կարապետեան ծննդաբերութեան պատճառաւ ժամանակաւոր հրաժարեցաւ իր պաշտօնէն, սակայն հոգիով ու սրտով միշտ կապի մէջ մնալով խումբին եւ անդամներուն հետ, իր պարտականութիւնը փոխանցեց իր իսկ սերմանած հունտերէն` Լարա Զանազանեանին: Հակառակ անոր որ Լարան միայն վերջին չորս տարիներուն մաս կազմած էր խումբին, բայց իր բացառիկ մշակոյթի հանդէպ ունեցած սիրոյն` մանաւանդ պարային ձիրքին, դարձաւ լաւագոյն պարողներէն մէկը եւ Նայիրիի ակամայ ժամանակաւոր դադարի ընթացքին քաջութիւնը ունեցաւ յանձն առնելու “Արաքս“ պարախումբի ընդհանուր պատասխանատու ղեկավարութիւնը` միշտ կապի մէջ մնալով Նայիրիին եւ Համազգայինի ատենապետուհիին հետ:
“Լարան երբ այս գործը կ՛առնէր, ան արդէն իր հետ ունէր Շանթ Գասպարեանը, որ մինչեւ իր Ուաշինկթըն մեկնումը, անհուն տենդով աշխատեցաւ տղոց պարային դասերուն, որուն համար Համազգայինը մեծապէս գնահատած է ու կը գնահատէ Շանթ Գասպարեանի աշխատանքը: Շանթի կողքին նոյն օրերուն եւ մինչեւ օրս, տղոց պարի փորձերը կը ղեկավարէ պրն. Տիգրան Գալըն: Այս ազնուական երիտասարդը հակառակ ամուսնացած ըլլալուն` հակառակ ընտանեկան բազմապիսի հոգերուն եւ զբաղումներուն, ամէն ինչ ձգած բոլոր փորձերուն ներկայ է եւ կը կատարելագործէ տղոց պարերը: Պատիւ իրեն եւ պատիւ տիկնոջը Գէլիին, որ հայ կնոջ վայել բազում զոհողութիւններով կ՛ընդունի ամուսնոյն շաբաթավերջերուն ժամերով տունէն բացակայութիւնը ի սպաս Հայ Մշակոյթին:
Լարան այս երկու ազնուական տղոց կողքին ունեցաւ իրեն օգնական Օր. Նայիրի Գայսէրեանը, որուն զոհողութիւնը նաեւ վեր է ամէն գնահատանքէ: Ան իր համեստ, լուրջ եւ հետեւողական ճիգերով դարձաւ լաւագոյն պարողներէն մին, եւ հիմա հակառակ իր համալսարանական բազմազբաղ տարիներուն, ամէն փորձերուն ներկայ է եւ ամէն ձեւով կ՛օգնէ պարողներուն իրենց շարժուձեւերը կատարելագործելու եւ կարգն ու կանոնը պահելու:
Սիրելի Նայիրի, գիտակցելով քո զոհողութիւններուն` Համազգայինի կողմէ ընդունիր մեր խորին շնորհակալութիւնները…
Սիրելի պարուսոյց Լարա, պարզ գովեստի խօսքեր չէ, որ պիտի ընեմ, այլ` ճշմարիտ մի քանի վկայութիւններ, որ պարողները, ծնողները եւ հասարակութիւնը իմանայ թէ ի՜նչ դժուարութիւններէ կ՛անցնի մօտ 40 հոգինոց պարախումբի երիտասարդ ղեկավար մը:
Նաեւ պատիւ քո գեղեցիկ, ճկուն եւ իսկական հայ պարմանուհիի պարային դրսեւորումները կարենալ սորվեցնել մեր երիտասարդներուն:
Պատիւ առանց դոյզն ակնկալութեան եւ վարձատրութեան այս դաժան, ծանր գործի ղեկավարութիւնը յանձն առնելուդ: Պատիւ քո այնքան երիտասարդ տարիքիդ հակառակ նշանուած ըլլալուդ` պարի փորձերու եւ “Արաքս“ պարախումբի ղեկավարի պաշտօնը յանձն առնելուդ եւ օրեր, ժամեր, բազմաթիւ յուզումներով, բայց միշտ ապագայի լաւատեսութիւններով գործդ շարունակելու համար: Համազգայինը երախտապարտ է քեզի, շնորհակալութիւն եւ վարձքդ կատար, շարունակէ նուիրական գործդ:
Սիրելի պարողներ
Որքան որ դուք Համազգայինին գիտակիցօրէն երախտապարտ պէտք է զգաք` որ ձեզ կը մօտեցնէ ձեր արմատներուն, առիթ կու տայ որ իրար հետ համախմբուիք հայ աղջիկ եւ տղայ հայ պարերը սորվելու եւ անոնց ընդմէջէն հինէն եկող մեր փառքերն ու սովորութիւնները ընկալելու, իրար հետ շփուելու ընկերութիւն ընելով եւ ձեզ աւելի հայ զգալու:
Նոյնքանով եւ աւելիով մենք երախտապարտ ենք ձեզի եւ ձեր ծնողներուն, որ 21րդ դարու հաճոյքներով ժամեր կը յատկացնէք գալու հայ պարարուեստ սորվելու հակառակ դպրոցական ծանր պարտաւորութիւններու: Մենք ձեր մէջ կը տեսնենք գիտակից հայու կամ հայուհիի ոգին` որ կը մղէ ձեզ այս փորձերուն: Ձեր խրոխտ պարերուն, բացագանչութիւններուն եւ երբեմնի կանացի հեզասահ նազանքային ձայներուն եւ շարժումներուն մէջ մեր ժողովուրդի երթը կայ եւ դուք ներկայացնողն էք ատոնց:
Պատիւ ձեզի սիրելի պարախումբի անդամ–անդամուհիներ: Համազգայինը երախտապարտ է ձեզի:
Այս ելոյթը ամբողջական պիտի չըլլայ եթէ չյիշենք վերջին ելոյթէն ասդին` մարմնով թէեւ բացակայ` բայց հոգիով սրտով, իր անհատնում յորդորներով եւ կապերով ներկայ` համազգայնական Նայիրի Կարապետեանը:
Ան թելադրեց մեզի, որ Օր. Լարա Զանազանեանը նշանակենք “Արաքս“ խումբի ղեկավար եւ այն օրէն մինչեւ օրս, միշտ եղած անտեսանելի, բայց ազդեցիկ կապը “Արաքս“ պարախումբի եւ Համազգայինի ատենապետուհիին հետ:
Սիրելի Նայիրի, Համազգայնական ընկեր–ընկերուհիներդ գիտակցելով քու անտեսանելի եւ լռելեան ներդրումներդ` մեծապէս կը գնահատենք եւ կը սպասենք մօտ ապագային քո ֆիզիքական վերադարձին աւելի զօրաւոր թափով երկուքով շարունակելու “Արաքս“ պարախումբի յառաջդիմութիւնները…“:
Անշուշտ, պարախումբի յաջողութիւնը պայմանաւորուած է նաեւ պարախումի պարման-պարմանուհիներու նուիրումին, հետեւողական աշխատանքներուն, եւ յատկապէս գնահատանքի արժանի է իրենց ծնողաց զոհողութիւնը:
Պէտք է խոստովանիլ, որ վերջին տարիներուն Համազգայինի “Արաքս“ պարախումբը, գաղութէն ներս “Համազգային“ի, հայկական տօնավաճառներուն, ինչպէս նաեւ քաղաքի փոքրամասնութիւններու կազմակերպած մշակութային ձեռնարկներուն, մեծ խանդավառութիւն ստեղծած է ոչ միայն հայ` այլ նաեւ օտար միջավայրներէ ներս:
Այդ պատճառով ալ, Հայ Կեդրոնի սրահը, տարիներէ ի վեր այսքայն հանդիսատես չէր ընդունած:
Յայտագիրը կազմուած էր եկու մասերէ, իւրաքանչիւրը կազմուած երեք խմբապարերէ, երկու աղջկանց պարերէ, երկու մենապարերէ, եւ տղոց պարէ մը:
Գնահատելի էր “Հայոց Մարտիկներ“, “Ուզունտարա“, “Վասպուրական“, “Վարագայ լեռների“, “Շալախօ“ն, “Շիրակի Պար“ գործերու կատարումը:
Յայտագիրը իր աւարտին հասաւ Արա Գէորգեանի “Մշոյ Դաշտեր“ խանդավառ պար եղանակի կատարումով: Պարմանուհիներ եռագոյն դրօշակները ձեռքերնին բարձր բռնած, պարման-պարմանուհիներու ընկերակցութեամբ բեմ բարձրացան, ճշգրիտ ոստումներով եւ մարմնի նուրբ շարժուձեւերով: Անոնք գեղեցկօրէն ներկայացուցին Մշոյ դաշտի հայ ժողովուրդի դարաւոր աւանդական պարը խանդավարելով ներկայ հասարակութիւնը:
Կը շնորհաւորենք, եւ կը գնահատենք պարախումբի բոլոր-պարման-պարմանուհիները իրենց նուիրումին եւ զոհողութեան համար, կը մաղթենք որ հետեւողական փորձերով շուտով կը հասնին նախանձելի բարձունքներու:
Հանդիսութեան աւարտին, “Արաքս“ պարախումբի արձանագրած յաջողութեանց մէջ իրենց նուիրեալ աշխատանքին համար, Հերմինէ Մանուկեանի ձեռամբ ստացան նուէրներ, պարուսոյց ընկհ. Նայիրի Կարապետեան, Լարա Զանազանեան, Նայիրի Գայսէրեան, Տիգրան Գալըն, Պօղոս Դաւիթեան, եւ Շանթ Գասպարեան:
Թող Համազգային “Արաքս“ պարախումբի հետագայ ուղին ըլլայ նորանոր նուաճումներով եւ յաջողութիւններով լի: Վարձքերնիդ կատար Համազգայինի “Արաքս“ պարախումբի սիրելի անդամ-անդամուհիներ:
ԱՆԴՐԱՆԻԿ ԳԱՐԱՏՕԼԵԱՆ
