ՎԱՅԿՈՒՆԻՔԷՆ…ՔԱՐՎԱՃԱՌ

0 0
Read Time:1 Minute, 34 Second

 

karvajar  ՀԱՅՐԵՆԻՔ

Խմբագրական
Յուլիս 27, 2014

Վերջին շաբաթներուն, գրեթէ օրական դրութեամբ կը խախտուէր զինադադարը եւ նախայարձակ Ատրպէյճանը նոյն թափով կը շարունակէր խափանարարական գործողութիւնները: Յուլիսի երկրորդ շաբթուան ընթացքին, Քարվաճառի շրջանէն ներս կատարուած այս ներթափանցումը, գերագոյն խախտումն էր, որ կը կատարուէր:
Այս կացութեան հետեւանք, Արեւելեան սահմաններէն ներս, Հայաստանի բանակն ալ որոշ յառաջխաղացք մը կատարած էր Նախիջեւանի շրջանէն ներս: Այս պայթուցիկ իրավաճակին դէմ,Պաքու որոշած էր փոխադարձել…:
Սակայն, ինչո՞ւ թիրախը Քարվաճառն էր:
Առաջին հերթին, տեղին է նշել թէ Քարվաճառի լեռնային շրջանը կը տարածուի Արցախի Հանրապետութեան Հիւսիս-Արեմտեան տարածքէն ներս։ Այդ տարածաշրջանի հիւսիսն է որ կը գտնուի Ատրպէյճանի հետ պետական սահմանը: Հարաւէն շրջանի սահմանակից հողաշերտն է Քաշաթաղը, արեւելքէն՝ Մարտակերտը, եւ արեւմուտքէն է որ կարելի է Հայաստան մուտք գործել։
Պարզապէս, Պաքուի համար յստակ էր թէ Քարվաճառը՝ Արցախի անկախութեան հիմքն է եւ եթէ այդ շրջանը օրին ազերիներու հակակշռին տակ մնար, այսօր անկարելի ու երազային պիտի ըլլար խօսիլ Արցախի անկախութեան ու անվտանգութեան մասին:
Հո՛ն, Քարվաճառի մէջ էր որ Հայոց Պատմութեան մէջ, Արցախի այս անկիւնի ունեցած դերակատարութիւնը յստակօրէն կարելի է նկատել: Բազմաթիւ ճարտարապետական շինարարութիւններ եւ յուշարձաններ՝ Հանդաբերդ ամրոցը,Դադիվանքը եւայլն կը վկայեն հայորդիին եւ անոր նախահայրերուն ներկայութիւնը: Նաեւ, այս շրջանէն ներս է, որ կը հոսի Արցախի “Նեղոս“ը՝ Թարթառը:
Ապրիլ 1-ը իւրայատուկ օր է Քարվաճառ քաղաքին համար: Արդարեւ, այդ օր 1993-ին է ազատագրուեցաւ:
Այսպէս, տասնեակ մը օրեր առաջ, ազերի հետախուզական խումբի անդամները խախտեցին միջազգային իրաւունքով սահմանուած պատերազմի օրէնքները՝ դաժան ու անմարդկային կերպով ոտնձգութիւն իրականացնելով քաղաքացի բնակչութեան նկատմամբ: Նոյնիսկ հաւաքներով ոըւ ցոյցերով Պաքուի ղեկավարութիւնը պատճառաբանեց թէ իր հողերէն ներս է որ գործողութիւններ կը կատարէր…
Արցախի Հանրապետութեան բանակը գործի լծուեցաւ եւ շտապ միջամտութեամբ մը, վերջ դրաւ ազերի հետախուզականներու գործողութեանց: Մինչ այդ դժբախտաբար, ինկան անմեղ զոհեր:
Արցախի պաշտպանութեան բանակը կը վստահեցնէ, որ ազերի հետախուզական խումբին բոլոր անդամները գերի բռնուած կամ ոչնչացուած են:
Պատմութեան տարբեր ժամանակաշրջաններու ընթացքին, Վայկունիք, Վերին Խաչեն, Քոլան եւ ներկայիս Քարվաճառ անուանուած շրջանը ենթարկուած է նման ներթափանցումներու, որոնք միշտ ալ անաւարտ մնացած են …կամ ալ աւարտած են ձախողութեամբ:

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles