0
0
Ա.Ա.
Հայոց Ցեղասպանութեան 108-ամեակը առիթ է խորհելու եւ ծրագրելու, նաեւ՝ ուխտի վերանորոգման, որպէսզի ազգովին առաւել լծուինք պահանջատիրական աշխատանքի, որովհետեւ թրքական ճակատը ձեռնածալ նստած չէ, այլ լծուած է պետական մակարդակի աշխատանքի, որպէսզի ձախողութեան մատնէ հայկական պահանջատիրական արդար երթը։
Իրարայաջորդ սերունդներու միջեւ պայքարի ջահը փոխանցուեցաւ մեծ պատասխանատուութեամբ եւ այն խոր գիտակցութեամբ, թէ ի վերջոյ հայ ժողովուրդին համար պիտի ծագի արդարութեան արշալոյսը՝ հայրենազրկման ենթարկուած հայութեան արեւմտեան հատուածին յատուցման ժամանակաշրջանին ազդանշանը տալով։
Հայութեան մղած պահանջատիրական պայքարը ինքնանպատակ չէ։Ցեղասպանութեան ահաւոր տարիներուն՝ 1918-ին հայ ժողովուրդը հիմնեց հայոց անկախ պետականութիւնը, որուն կերտիչները անցան ժողովուրդին գլուխը եւ բազմաբեղուն ու բազմաբնոյթ աշխատանքներով եւ գործունէութեամբ վրէժխնդրութեան եւ ապրելու, գոյատեւելու եւ արարելու հայութեան առաքելութիւնը պատուով կատարեց։
Հայոց ցեղասպանութիւնը քսաներորդ դարու մեծագոյն ոճիրն է, որուն զոհ գացին մէկուկէս միլիոնէ աւելի հայորդիներ։Կորսնցուցինք հող եւ ունեցուածք, պատմամշակութային հազարաւոր կոթողներ զոհ գացին թուրքին մոլուցքին եւ բնիկ արեւմտահայութիւնը վտարուեցաւ իր ծննդավայրէն, օտար ափերու մէջ կայք հաստատելով եւ կեանքը շարունակելով։Առաջին օրէն իսկ երբ նպաստաւոր պայմաններ ստեղծուեցան ժողովուրդին ծոցէն ծնած միութիւններն ու կազմակերպութիւնները արժանաւորապէս ստանձնեցին իրենց առաքելութիւնը եւ կազմակերպեցին հայ որբերու բանակները, յոյս ներշնչեցին, ոգեւորեցին եւ խանդավառեցին իր հայրենիքէն աքսորուած եւ օտար ափերու վրայ հաստատուած հայ զանգուածները, որոնք մոխիրներէն յարութիւն առած հայութեան շարքերուն մէջ տեսան հայ զինուորը, որ զէն ի ձեռին սարդարապատեան հերոսամարտին մէջ հայրենիք կերտած էր։
Չուշացաւ նաեւ Հայոց Նեմեսիսը, որ զգետնեց ու պատժեց Հայոց Ցեղասպանութեան ծրագրիչները եւ գործադրողները՝ Արդարութիւն գոռալով հայ ժողովուրդին համար, որ հող ու հայրենիք կորսնցուցած՝ արդարօրէն պահ մը անդրադարձաւ, որ իր բախտին ձգուած անկազմակերպ զանգուած մը չէ, այլ ունի տէր ու տիրական, որ ճիշդ ժամանակին գիտցաւ հակահարուածը տալ՝ Թալաաթները գետին փռելով։
Հայոց Ցեղասպանութեան նահատակներուն արեան, հայրենազրկման եւ կողոպտուած ունեցուածքի յատուցման արդար պահանջները այսօր աւելի քան ի զօրու են եւ աշխարհի տարածքին հայ ժողովուրդը կը պայքարի վերատիրանալու համար այն ամէն ինչին, զոր կորսնցուց ցեղասպանութեան պատճառով։Այսօր պայքարը նոր թափով կը շարունակուի եւ հիներուն կ՛աւելնան նոր մարտհրաւէրներ եւս՝ իրավիճակը ճիշդ է, որ առաւել բարդացնելով, սակայն պայքարի վճռակամութիւնը պահելով եւ անոր առաւել թափ տալով։Հայ ժողովուրդին ճակատագրին մաս կը կազմէ պայքարը։Ասոր գիտակից մեր նոր սերունդներն են,որոնք ջահը բարձր բռնած կը շարունակեն երթը։
