0
0
ՈՒԱՇԻՆԿԹԸՆ.- Երեքշաբթի, Յունիս 4-ին, Միացեալ Նահանգներու Արտաքին Գործոց նախարար Ճոն Քերի, ընդունեց Հայաստանի իր պաշտօնակից Էդուարդ Նալպանտեանը:
Մամլոյ ասուլիսի ընթացքին Քերին ջերմ խօսքեր փոխանցելով իր հիւրին անդրադարձած է Արցախի խնդրին, շեշտելով, որ կը փափաքի հասնիլ շրջանի սառեցուած խնդրի լուծման: Ան յատուկ շեշտեց թէ բոլոր կողմերու խօսքերը, ըսելով որ նկատի ունի ոչ միայն Ատրպէյճանը, այլեւ` Թուրքիան, Ռուսաստանը եւ Իրանը: Քերի որեւէ անդրադարձ չկատարեց հայ-թրքական յարաբերութիւններու եւ արձանագրութիւններու մասին:
“Երբեք պատերազմի եւ տագնապի վերադարձ մը չենք փափաքիր ունենալ: Կը հաւատամ, որ յառաջընթացի ուղի մը գոյութիւն ունի, եւ մենք պիտի շարունակենք լռելեայն եւ համբերատարութեամբ ջանք թափել կողմերը քաջալերելու կամ որդեգրելու վստահութեան կառուցման քայլեր, որոնք առաւել յառաջընթացի կ՛առաջնորդեն, կամ ալ այս հարցով լուծումի մը ուղին գտնելու“, ըսաւ Քերի:
Նշենք թէ, Քերի նաեւ տեսակցած էր Ատրպէյճանի Արտաքին Գործոց նախարար Էլմար Մահմետիարովի հետ: Մահմետիարով յայտնած է, որ ինք կը հաւատայ, թէ Ատրպէյճան կրնայ Միացեալ Նահանգներու օժանդակութեամբ մարտահրաւէրները շրջանցել: “Տագնապին ամբողջ ժխտական արդիւնքը անցեալին պիտի պատկանի, եւ մենք յաջող համագործակցութեան եւ իբրեւ լաւ դրացիներ իրարու կողքին ապրելու պայծառ ապագային պիտի նայինք“, յայտնեց ան:
Մահմետիարով յայտնեց, որ Ատրպէյճան յատուկ կարեւորութիւն կ՛ընծայէ Միացեալ Նահանգներու հետ երկկողմանի յարաբերութեանց եւ վստահութիւն յայտնած, որ տնտեսութեան, ներդրումի եւ ուժանիւթի մարզերուն, ինչպէս նաեւ միջազգային կազմակերպութիւններուն մէջ յաջող համագործակցութիւնը առաւել եւս պիտի ամրապնդուի:
Անդրադառնալով Արցախի տագնապին մասին` Մահմետիարով դիտել տուաւ, թէ ստեղծուած գոյավիճակը պէտք է փոփոխութեան ենթարկուի: Ան նաեւ շեշտեց, որ բանակցութեանց մէջ յառաջդիմութիւն արձանագրելու համար Հայաստան իր ամբողջ ուժերը պէտք է հեռացնէ “բռնագրաւեալ հողերէն“:
Այս հանդիպումներու կողքին, նշենք թէ Յունիս 3-էն 4 լուսցող գիշերը, Արցախի եւ Ատրպէյճանի սահմանագիծ Քարվաճառի (Քելբաջար) ուղղութեամբ, ազերի ուժեր յարձակում կատարած են եւ երկարատեւ բախումէ ետք հայկական կողմը կրցած է կասեցնել ատրպէյճանական յարձակումը, նահանջի մատնելով թշնամին:
Տեղեկութիւն կայ նաեւ այն մասին, որ հայկական բանակի քանի մը զինուորներ մարմնական թեթեւ վնասներ ստացած են, սակայն զոհեր չկան:
