0
0
Ս. ՄԱՀՍԷՐԷՃԵԱՆ
26 Յուլիս 2021
Հայաստանի արտաքին գործոց նախարարութիւնը վերջին օրերուն բազմիցս Ատրպէյճանը ամբաստանեց, եւ՝ հիմնաւորեալ կերպով, թէ՝ կը խափանէ 9 Նոյեմբերի եւ 11 Յունուարի եռակողմանի յայտարարութիւններուն իրականացումը: Փաստերը արձանագրելու պէտք չունինք: Խորագիրներն են գերիները, թափանցումներ, քարոզչական եւ զինեալ բարձրաղաղակ սպառնալիքներ, կրակոցներ…: Ատրպէյճանն ալ հայկական կողմը կ’ամբաստանէ խաղաղութեան քայլերը խափանելու յանցանքով, մինչդեռ փաստ չկայ:
Հարցը, ուրեմն, վերածուած է յիշեալ (պարտեալ Հայաստանի պարտադրուած) համաձայնութիւնները գործադրելու-չգործադրելու «հանգոյց»-ին: Հայկական կողմը կը հաւաստէ ու կը պնդէ, որ ինք պատրաստ է գործադրելու այդ համաձայնութիւններուն պայմանները:
Կը ստացուի ի՞նչ. իրողապէս, Ատրպէյճանը ստեղծած է (գիտակցաբար կամ անգիտակցաբար) կացութիւն, որուն մէջ, Հայաստանի ոգի ի բռին կ’աշխատի ի խնդիր համաձայնութեան իրականացման: Մոռցած ենք, որ այդ համաձայնութիւններուն մէջ, բացի մէկ-երկու (այլապէս անյետաձգելի բայց չիրականացած) կէտերէ, Հայաստանի համար նպաստաւոր բան չկայ, ընդհակառակը, անոնք մշուշապատ թակարդներ են, որպէսզի Հայաստան նոր զիջումներու երթայ, օրինակի համար՝ ընդունի Արցախի գործնապէս յանձնումը Ատրպէյճանին: Մինչդեռ, Ատրպէյճանը ամիսներէ ի վեր իրերայաջորդ խաղաթուղթեր կը տրամադրէ Հայաստանին (պարզ պատկերով՝ ափսէի վրայ առիթներ կը մատուցէ), որպէսզի հնարքներ գտնէ՝ դուրս գալու այդ աղէտալի համաձայնութիւններուն բեռներուն տակէն, պատռելու զանոնք, իր արդար կեցուածքին եւ պահանջներուն շուրջ ալ համախոհութիւն գոյացնէ ԲՈԼՈՐ խաղաղարարներուն միջեւ: (Իսկ թէ այս իշխանութիւնը որքա՞ն կը տեսնէ սա եւ կարո՞ղ է բան մը իրականացնել՝ այլ հարց: Սկսելու համար, պէտք է ի վերջոյ անդրադառնալ եւ տեսնել, թէ այդ համաձայնութիւններէն բարիք չի բուրեր):
…Աւելի քան 10 տարի առաջ, Հայաստանի օրուան իշխանութիւններուն ալ «բազուկը որոլող» կար (Հիլըրի Քլինթընի խոստովանութիւնը), որպէսզի որդեգրէ փրոթոքոլներուն «ճանապարհային քարտէսը»: Այդ օրերուն ալ, վնասակար փաստաթուղթերը խոր ընդվզում յառաջացուցին հայաշխարհին մէջ, ի վերջոյ տեղ չհասան՝ հիմնականին մէջ Թուրքիոյ ընթացքին պատճառով. օրուան մեր իշխանութիւնները տեղ մը իմաստութիւնը ունեցան ըմբռնելու սխալը, դուրս եկան վնասակար ուղիէն: Պատմութեան մէջ մնաց թակարդին սեւ բիծը:
Հիմա՞…
