0
0
Նիւ Եորքի Սուրբ Լուսաւորիչ եկեղեցւոյ եւ «Համազգային»-ի Արեւելեան Ա․Մ․Ն․-ի Շրջանային Վարչութեան նախաձեռնութեամբ կայացաւ հանդիպում մը «Համազգային» Հայ Կրթական եւ Մշակութային միութեան Արցախի գրասենեակի տնօրէն՝ հեղինակ Հերմինէ Աւագեանի հետ։
Ներկայ էին հոգեւոր հովիւ Տէր Մեսրոպ քահանայ Լագիսեանը, «Համազգային» Հայ Կրթական եւ Մշակութային միութեան Կեդրոնական վարչութեան Արեւելեան Ա․Մ․Ն․-ի ներկայացուցիչ Արեւիկ Գաբրիէլեանը, Հ․Յ․Դ․ Արեւելեան Ա․Մ․Ն․-ի Կեդրոնական Կոմիտէի ներկայացուցիչ Անի Չաղլասեանը, «Համազգային»-ի եւ Հ․Օ․Մ․-ի շրջանային վարչութիւններու անդամներ եւ հիւրեր:
Աւագեան ներկաներուն ծանօթացուց «Համազգային»-ի Արցախի գրասենեակի գործունէութիւնը, յատկապէս «Արցախի մանուկներու կողքին» ծրագիրը, ըմբոշխնելով այդ ծրագրի մասին վաւերագրական տեսանիւթը: Ցուցադրուեցան «Համազգային»-ի Արցախի գրասենեակի նկարչութեան խումբի մէջ ներգրաւուած մանուկներու քսան գեղանկարչական աշխատանքները։
Ապա, կայացաւ Հերմինէ Աւագեանի «Օրացոյցից պոկուած օրեր» եւ «Վազում եմ, սպասիր» գԻրքերի շնորհաՀԱնդէսը: Հեղինակը իր ցանկութեամբ բերած էր նաեւ Արցախի գրողներու միութիւն անդամ այլ հեղինակներու գիրքեր, որոնք եւս ներկայացուց ներկաներուն: Այդ գիրքերը յանձնուեցան Ա․Մ․Ն․ Քոնկրէսի գրադարանին։
Իր ողջոյնի եւ օրհնութեան խօսքով Բեմահարթակ բարձրացաւ Տէր Մեսրոպ Քահանայ Լագիսեանը եւ ապա «Համազգային»-ի Կեդրոնական Վարչութեան անդամ Արեւիկ Գաբրիէլեանը, որ շնորհակալութիւն յայտնեց Տէր Լագիսեանին` «Համազգային»-ին իր մշտական օժանդակութիւնը բերելու համար: Ան յատուկ շնորհակալութիւն յայտնեց «Համազգային»-ի Արցախի եւ Հ․Հ․ գրասենեակներուն իրենց աշժոյժ գերծունէութեան համար, ապա նշեց Կեդրոնական Վարչութեան բազմաթիւ ծրագրերը, ընդգծելով, որ անոնց իրականացման համար անհրաժեշտ է իւրաքանչիւր համայնքի մասնակցութիւնը: «Համազգային»-ի Արեւելեան Ամերիկայի Շրջանային Վարչութեան ատենապետուհի Յասմիկ Աբրահամեանը հանդէս եկաւ ողջոյնի խօսքով։ Ապա բեմ բարձրացաւ Հերմինէ Աւագեան, որ ներկաներուն ծանօթացուց Արցախի մէջ իրականացուող ծրագրերն ու ձեռնարկները:
Այնուհետեւ ներկաները առիթ ունեցան հիւրասիրութեան շուրջ եւ մտերմիկ մթնոլորտի մէջ զրուցելու, ծանօթանալու Աւագեանի գրական ստեղծագործութիւններուն, խօսելու Արցախի մէջ ստեղծուող գրականութեան մասին, ինչպէս նաեւ դիտելու «Համազգային»-ի նկարչութեան խումբի արցախցի փոքրիկ նկարիչներու աշխատանքների ցուցահանդէսը:
Անդրադառնալով մանուկներու աշխատանքների ցուցահանդէսին` Հերմինէ Աւագեանը շեշտեց. «Սփիւռքը միշտ եւ միշտ Հայրենիքի, գլխաւորապէս Արցախի թիկունքն է եղել` իր ամբողջ ներուժը ծառայեցնելով Հայրենիքի բարօրութեանը, կրթական եւ մշակութային կեանքի զարգացմանը, Արցախի միջազգային ճանաչմանը, Հայոց Ցեղասպանութեան ճանաչմանն ու դատապարտմանը: «Համազգային»-ի 95-ամեայ կառոյցը նոյնպէս իր էական ներդրումն ունի այդ նուիրական աշխատանքներում: 44-օրեայ պատերազմի օրերին Համազգայինը կեանքի կոչեց «Արցախի մանուկներու կողքին» ծրագիրը, որի արդիւնքում աւելի քան 400 արցախցի երեխաներ այսօր այդ ծրագրի մասնակիցն են: Մեր փոքրիկ նկարիչները, որոնք ստեղծագործում են թշնամու կողմից շրջափակուած Արցախում, ցանկութիւն ունեն իրենց ձեռքով գծած նկարների վաճառքի համեստ հասոյթը նուիրել «Համազգային»-ի Կեդրոնական Վարչութեանը, որպէսզի իրենք եւս իրենց ներդրումն ունենան «Համազգային»-ի ծրագրերի շարունակականութեան մէջ: Սա կարեւոր գիտակցում է մեր մանուկների համար։ Նրանք գիտեն, թէ ինչ վիճակում են Սուրիայում ապրող իրենց հասակակից հայ երեխաները, գիտեն, թէ Լիբանանում տիրող ծանր տնտեսական ճգնաժամի պայմաններում ինչպէս են «Համազգային»-ի ճեմարանն ու մանկապարտէզը պայքարում հայ երեխային հայ կրթելու համար եւ առհասարակ այն դժուար ու պատասխանատու աշխատանքը, որն իրականացնում է «Համազգային»-ի ազգանուէր կառոյցը: Այս պայմաններում մենք պիտի իրար թիկունք լինենք, որպէսզի յարատեւենք»:
Ձեռնարկը անցաւ մտերմիկ մթնոլորտի մէջ: Նշենք, թէ Հերմինէ Աւագեան միօրեայ այցելութիւն մը կատարած էր Պոսթըն եւ հանդիպած «Հայրենիք»-ի խմբագրատուն։
