0
0
Լուսանկարներ` Ֆօթօ Մարտօ
Երեքշաբթի Ապրիլ 24-ին, Մեծն Պոսթընի մէջ, տեղի ունեցաւ, Հայոց Ցեղասպանութեան 97-ամեակի յուշահանդէսը` Հայ Մշակութային եւ Կրթական Կեդրոնի սրահին (Ուաթըրթաուն) մէջ: Առաջին հերթին, կատարուեցաւ հոգեհանգստեան պաշտօն, տեղւոյն Սուրբ Ստեփանոս եկեղեցւոյ խաչքարին առջեւ: Գրեթէ մէկ ժամ տեւողութիւն ունեցող պատարագէն ետք, կատարուեցաւ տողանցք, դէպի Հայ Մշակութային եւ Կրթական Կեդրոն, մասնակցութեամբ Տեղւոյն Հ.Մ.Ը.Մ.-ի մասնաճիւղի սկաուտական կազմին: Ապա, ազդանշանը տրուեցաւ ժողովրդային հաւաքին, Կեդրոնի սրահին մէջ: Ներկաներու թիւը կը գերազանցէր երեք հարիւրը:
Բացման խօսքը կատարեց Անի Խաչատուրեան, որ շեշտեց թէ Հայոց Ցեղասպանութեան հարիւրամեակի սեմին, դեռ շատ աշխատանք կայ կատարելիք: Ան աւելցուց թէ ճանաչումն ու հատուցումը կը մնան համահայկական տեսլական եւ իրագործելի նպատակ: Նաեւ ան շեշտեց թէ այս պահանջները միաժաանակ‘ ազգային արժանաւորութեան խնդիր են եւ ազգի ապագային երաշխիք: Ան կոչ ուղղեց մնալու արթուն, այնքան մը որ ժամանակը չընկճէ հայ դատի պահանջատիրութիւնը:
Օրուան բանախօսն էր Հ.Յ.Դ. Բիւրոյի անդամ Յակոբ Տէր Խաչատուրեան, որ անցեալն ու ներկան շաղկապելով, յատկապէս ծանրացաւ ճանաչումէն հատուցման հանգրուանին վրայ եւ շեշտեց թէ հարցը բոլորովին կը փոխուի ու տարբեր հանգամանք կրնայ ստանալ, երբ միջազգային ատեաններու թէ պետական միաւորներու մօտ, շեշտուի հողային պահանջքը, որ կը սպառնայ խախտել միջպետական բարդ յարաբերութեանց, փոխկապակցուած շահերու եւ տարածաշրջանի ռազմագիտական հաւասարակշռութիւնը, ինչպէս նաեւ միջազգային համաձայնագրերով հաստատուած ներկայ իրավիճակն ու ընդունուած սահմանները:
Բանախօսը աւելցուց թէ հետեւողական ձեւով, աշխատանք պիտի տարուի միջազգային ատեաններուն եւ առանձին պետութիւններուն մօտ, հատուցման ու հողային պահանջներու գծով:
Փակման խօսքն ու աղօթքը կատարեց շրջանի հովիւ` Անդրանիկ Աւագ Քհնյ. Պալճեան, որ նշեց թէ երկու կաթողիկոսներու հովանիին տակ, Ցեղասպանութեան 100-ամեակի իրագործումները, նոյնքան ազդեցիկ պիտի ըլլան, որքան տարեկան դրութեամբ կրկնուող ոգեկոչական ծէսերը:
Նշենք թէ, օրուայ պատշաճ գեղարուեստական յայտագրին, ելոյթ ունեցաւ սոփրանօ երգչուհի Քնարիկ Ներկարարեան, իր կողքին ունենալով դաշնակահար Լեւոն Յովսէփեան, եւ »Նոր« եռեակ` կազմուած ջութակահար Սարգիս Կարապետեանէ, դաշնակահար Նունէ Յակոբեանէ եւ փողահար Անտրէյ Սօպշենքոյէ:
Նախքան այս ձեռնարկը, Ուրբաթ Ապրիլ 20-ին, նաեւ տեղի ունեցած էր Ցեղասպանութեան նշումը, նահանգապետարանէն ներս:
Սուրբ Ստեփանոս շաբաթօրեայ վարժարանի աշակերտութիւնն ալ, Ապրիլ 21-ին հաւաքով մը, նշած էր Ցեղասպանութեան 97-ամեակը:
Նաեւ Լօուելի եւ Ուսթըրի մէջ, տեղի ունեցան զանազան ձեռնարկներ: Վուսթըրի “Քլարք“ համալսարանին մէջ ցուցադրուեցաւ Սիւզան Խարտալեանի “Մեծ Մօչս Դաջուածքները“ ժապաւէնը:
Թղթակից
