0
0
Ամերիկայի Հայ դատի յանձնախումբը կը տեղեկացնէ, որ Ուաշինկթընի մէջ Սեպտեմբեր 7-9-ին տեղի պիտի ունենայ «Ի պաշտպանութիւն քրիստոնեաներու» խորհրդաժողովը:
Խորհրդաժողովին հրաւիրուած են Միացեալ Նահանգներէն քրիստոնեայ հարիւրաւոր հոգեւոր առաջնորդներ, իսկ հիմնական նպատակը պիտի ըլլայ Միջին Արեւելքի մէջ քրիստոնէութեան պահպանման հարցին մէջ շօշափելի քայլերու նախաձեռնումը: Խորհրդաժողովին խորագիրն է «Ցեղասպանութենէն անդին.- Պահպանելով քրիստոնէութիւնը Միջին Արեւելքի մէջ»: Խորհրդաժողովի առաջին օրը կը նախատեսուի կազմակերպել միջեկեղեցական աղօթք` տարբեր կրօնական ուղղութիւններու ներկայացուցիչներու մասնակցութեամբ:
Յաջորդ օրը խորհրդաժողովին մասնակիցները հանդիպումներ պիտի ունենան Քոնկրեսին մէջ Միացեալ Նահանգներու օրէնսդիր մարմինի շուրջ հարիւր ներկայացուցիչներու հետ: Ամերիկայի Հայ դատի յանձնախումբը շարունակաբար համագործակցած է Միացեալ Նահանգներու մէջ գործող տարբեր կազմակերպութիւններու հետ` երկրի օրէնսդիր եւ գործադիր իշխանութեան առջեւ Միջին Արեւելքի քրիստոնեաներու խնդիրներուն բարձրացման ուղղութեամբ, ինչպէս նաեւ յստակօրէն աջակցած է Օպամայի վարչակազմին կողմէ Միջին Արեւելքի քրիստոնեաներու եւ փոքրամասնութեանց նկատմամբ կատարուած վերջին տարիներու գազանութիւնները իբրեւ մերօրեայ Ցեղասպանութիւն որակելու հարցին մէջ:
Մարտ 15, 2016-ին Միացեալ Նահանգներու Ներկայացուցիչներու տունը 393 թեր եւ 0 դէմ քուէներով որդեգրած էր դեմոկրատական Աննա Էշուի եւ հանրապետական Ճեֆ Ֆորթենպերիի համահեղինակած թիւ 75 բանաձեւը, որով ՏԱՀԵՇ-ի կողմէ Միջին Արեւելքի քրիստոնեաներու, ներառեալ` հայերու եւ ասորիներու, ինչպէս նաեւ եզիտիներու եւ այլ կրօնական փոքրամասնութիւններու նկատմամբ գործողութիւնները կ՛որակուին ցեղասպանութիւն: Երկու օր ետք Միացեալ Նահանգներու Արտաքին Գործոց նախարար Ճոն Քերրի յստակօրէն նշած էր, որ ՏԱՀԵՇ-ի յարձակումներն ու սպանութեան փաստերը ընդդէմ քրիստոնեաներու, եզիտիներու եւ շիիներու, ցեղասպանութիւն են` մասնաւորաբար ընդգծելով նաեւ հայկական եկեղեցիներու ոչնչացումը իբրեւ այս պատմական համայնքներու մշակութային ոչնչացման քայլ:
