0
0
Ուրբաթ, Ապրիլ 19-ին, Նիւ Եորքի Քարնըկի համալիրի “Weill Recital“ սրահին մէջ, կատարուեցաւ Ա.Մ.Ն. Արեւելեան շրջանի Առաջնորդարանի կազմակերպած երաժշտական ձեռնարկը, ծանօթ “Musical Armenia“ անունով:
Այս տարուան երիտասարդ աստղերն էին ջութակահար Նունէ Մելիքեան եւ սոփրանօ երգչուհի Նարինէ Օճախեան: Այս վերջինը ներկայացուց դժուար գործեր, որոնց կարգին` Արմէն Տիգրանեանէն, Արամ Խաչատուրեանէն, Կոմիտասէն, Սերգէյ Ռախմանինովէն, Լէօ Տելիպէն, Ֆրանց Լեհարէն եւ Շարլ Կունոյէն: Միւս կողմէ ջութակահար Նունէ Մելիքեան, իր կարգին ամենայն հմտութեամբ ներկայացուց դժուար գործեր, որոնց կարգին յատկապէս Ալեսանտրօ Մարսելոյի աւագասրինգի “Ատաճիօ“ն, յատուկ վերադասաւորուած ջութակի համար, Ալպերթ Մարքովի կողմէ: Դաշնակահար Կարէն Յակոբեանի հետ, Մելիքեան նուագեց գործեր` Տիմիտրի Շոսթաքովիչէն եւ Առնօ Պապաճանեանէն: Յաջորդաբար երեսուներորդ անգամ ըլլալով կը կազմակերպուի այս ձեռնարկը, որուն նպատակն է քաջալերել, խթանել եւ խանդավառել հայ երիտասարդ երաժիշտներ:
“Musical Armenia“ ձեռնարկը կազմակերպելու գաղափարը յղացած է շրջանի նախկին Բարեջան Առաջնորդ Մեսրոպ Աշճեան (վախճանած Դեկտեմբեր 2003-ին) 1982-ին, գործակցաբար Առաջնորդարանի, տեղւոյն տիկնանց յանձնախումբին հետ: “Անցնող տարեշրջաններուն, այս ձեռնարկին մասնակցող անծանօթ երիտասարդ երաժիշտները, արդէն իսկ հասած են նախանձելի դիրքի եւ տիրացած` հռչակի Մենք պիտի շարունակենք այս աշխատանքը, շարունակ խթանելով մեր երիտասարդ երաժիշտները..“, յայտնեց Բարեջան Առաջնորդ Օշական Արք. Չօլոյեան:
Նշենք թէ անցեալ տարուան երիտասարդ աստղերն էին թաւջութակահար Մարթա Բագրատունի եւ դաշնակահար Հայկ Արսէնեան: Նաեւ, Վերջին տարիներուն, այս ձեռնարկին մասնակցած են պրազիլահայ կիթարահար Ժօան Գույումճեան, թաւջութակահար Դաւիթ Պաքամճեան, ջութակահար Սիսի Փանթիկեան, “Duo Maestoso“ զոյգը, որ կը բաղկանայ քոյր եւ եղբայր` Կայանէ եւ Յովհաննէս Առաքելեանէ: “Զուլալ“ (Թենի Աբելեան, Երազ Մարգարեան եւ Անայիս Թէքէրեան) երրեակը, օփերայի երգիչ Սերժ Բարսեղեանը եւ “Արարատ“ երրեակը, որ կը բաղկանայ դաշնակահար Փաթիլ Հարպոյեանէ, ջութակահար Վան Արմէնեանէ եւ թաւջութակահար Հրանդ Պարսամեանէ:
Յառաջիկայ տարեշրջանի “Musical Armenia“ն տեղի պիտի ունենայ Մարտ 28, 2014-ին:
Լուսանկարներ` ՀԷՐԻ ԳՈՒՆՏԱՔՃԵԱՆի
