ՄԵԾԻ ՏԱՆՆ ԿԻԼԻԿԻՈՅ ԱՐԱՄ Ա. ՎԵՀԱՓԱՌ ՀԱՅՐԱՊԵՏԻ ԱՅՑԵԼՈՒԹԻՒՆԸ՝ ԻՐԱՆ

0 0
Read Time:4 Minute, 24 Second

iran1  Հոկտեմբերի կիսուն, Մեծի Տանն Կիլիկիոյ Արամ Ա. Կաթողիկոսը, երկար այցելութիւն մը կատարեց Իրան, ուր պաշտօնական դիմաւորութեան արժանացաւ իրանահայ երեք թեմերու առաջնորդներուն՝ Թեհրանի Հայոց Թեմի Առաջնորդ Գերշ. Տ. Սեպուհ Արք. Սարգիսեանին, Սպահանի Հայոց Թեմի Առաջնորդ Գերշ. Տ. Բաբգէն Եպս. Չարեանին, Ատրպատականի Հայոց Թեմի Առաջնորդ Գերշ. Տ. Գրիգոր Եպս. Չիֆթճեանին, ինչպէս նաեւ Թեհրանի Հայոց Թեմի Առաջնորդական Փոխանորդ Գերշ. Տ. Մակար Եպս. Աշգարեանին, Իրանի խորհրդարանի զոյգ հայ պատգամաւորներուն, Իրանի մօտ Հայաստանի հանրապետութեան դեսպանին, Թեհրանի Հայոց Թեմի Պատգամաւորական եւ Թեմական Խորհուրդներու ներկայացուցիչներուն:

Օդակայանէն ուղղուելով դէպի Սուրբ Սարգիս Առաջնորդանիստ Մայր եկեղեցի, Նորին Սրբութիւնը ժողովրդային ընդունելութեան արժանացաւ եւ եկեղեցականաց դասի ու եկեղեցւոյ երգչախումբի թափօրին առաջնորդութեամբ մուտք գործեց եկեղեցի, Կանոնական աղօթքի համար:iran2

Ողջոյնի եւ բարի գալստեան խօսք ուղղելով, Թեհրանի Հայոց Թեմի Առաջնորդ Գերշ. Տ. Սեպուհ Արք. Սարգիսեան, այս պատուաբեր այցելութիւնը պատեհ առիթ համարեց հովուապետ եւ հօտ հանդիպման: Սրբազան Հայրը հաւատացեալ ժողովուրդին որդիական սիրոյն, յարգանքին եւ ակնածանքին թարգմանը հանդիսացաւ վեր առնելով յատկապէս Վեհափառ Հայրապետին անխոնջ ծառայութիւնը Հայ Եկեղեցւոյ ու հայ ժողովուրդին կեանքէն ներս:

Նորին Սրբութիւնը ողջունեց թեմակալ երեք առաջնորդները, իրենց ազգային իշխանութիւններով, ժողովական մարմիններով եւ ազգային կեանքէն ներս գործող բոլոր կազմակերպութիւններով:

Վեհափառ Հայրապետը իրանահայ երեք թեմերու միասնական պատկերին մէջ տեսաւ այն միութիւնը, որ պէտք է արտայայտուի համայն հայութեան կեանքէն ներս, յատկապէս Հայոց Ցեղասպանութեան 100-ամեակի նախապատրաստական այս օրերուն: Իւրաքանչիւր թեմի կառոյցներուն, կազմակերպութիւններուն եւ հայ անհատի մասնակցութիւնը հաւաքական այս աշախատանքին Նորին Սրբութիւնը նկատեց շատ կարեւոր: Ապա, իր խօսքը ժողովուրդին ուղղելով, Վեհափառ Հայրապետը շեշտեց, քրիստոնէական հաւատքի կարեւորութիւնը եւ անոր առանցքային դերը մեր ժողովուրդի կեանքէն ներս:

iran3Կանոնական աղօթքէն եւ հայրապետական անդրանիկ պատգամէն ետք տեղի ունեցաւ աջահամբոյր, Ազգային Առաջնորդարանի դահլիճին մէջ: Հոգեւորական դասէն սկսեալ, ազգային իշխանութեան անդամներ, ազգային կառոյցներու ներկայացուցիչներ, դպրոցական աշակերտ աշակերտուհիներ եւ ամբողջ ժողովուրդը հերթաբար ներկայացաւ Վեհափառ Հայրապետին եւ ստացաւ Նորին Սրբութեան օրհնութիւնը:

Վեհափառ Հայրապետը ներկայ եղաւ Թեհրանի Հայոց Թեմի Պատգամաւորական ժողովին, որուն մասնակից էին նաեւ կրօնական, թեմական խորհուրդներն ու հաշուեքննիչ մարմինը:

Նորին Սրբութեան այցելութիւնը պիտի տեւէ շուրջ երկու շաբաթ, որուն ընթացքին հանդիպումներ պիտի ունենայ պետական բարձրաստիճան պատասխանատուներու հետ:

Թեհրանի “Արարատ“ մարզաւանին մէջ, տեղի ունեցաւ մարզաւանի հիմնարկութեան 70-ամեակի տօնախմբութիւնը, նախագահութեամբ Արամ Ա. Կաթողիկոսին:

Իր Հայրապետական պատգամին մէջ, Վեհափառ Հայրապետը անդրադարձաւ մեր ժողովուրդի գեղեցիկ աւանդութեան, որով մեր պատմութեան առնչուած անձերու, դէպքերու, տեղանուններու անուններով յաճախ կը մկրտենք միութիւններ, թաղամասեր կամ անձեր: Նորին Սրբութիւնը ըսաւ, թէ սոսկ սովորութիւն պէտք չէ դառնայ այս, այլ որպէս անձ կամ կազմակերպութիւն, պէտք է հաւատարիմ գտնուինք մեր կրած անունի խորհուրդին ու պատգամին: Ապա, Վեհափառ Հայրապետը անդրադարձաւ “Արարատ“ անունին: “Արարատը սոսկ լեռ չէ մեր ժողովուրդին համար: Ան մեր հաւատքին, վճռակամութեան, յոյսին ու տեսիլքին խոյանքն է դէպի երկինք: Կարելի չէ հայութիւնն ու Հայաստանը հասկնալ առանց Արարատին: Այսօր գերեվարուած է Արարատը ցեղասպան թուրքին կողմէ. սակայն ան հայութեան կը պատկանի: Այս գիտակցութեամբ պէտք է ապրի ու պայքարի իւրաքանչիւր հայ“:iran4

Անդրադառնալով Իրանի հայութեան հիմնած “Արարատ“ միութեան, Վեհափառ Հայրապետը ըսաւ. “Եօթանասուն տարիներ “Արարատ“ միութիւնը, Իրանի հայութեան կեանքէն ներս, Արարատը ապրեցաւ ու ապրեցուց որպէս ոգի, հաւատք ու տեսիլք: Այսօր ան պէտք է վերանորոգէ իր ուխտը, նոյն յանձնառութեամբ շարունակելու իր արարատեան առաքելութիւնը“:

Կաթողիկոսը, Իրանի երեք թեմերու առաջնորդ սրբազաններուն ընկերակցութեամբ,այցելեց Մարիամեան եւ Սողոմոնեան վարժարանները: Յիշեալ դպրոցներու աշակերտները խանդավառութեամբ դիմաւորեցին Վեհափառ Հայրապետին այցելութիւնը: Աշակերտներուն դիմաց խօսք առնելով Թեհրանի Առաջնորդ Սրբազանը յայտնեց, թէ Նորին Սրբութիւնը յատուկ կարեւորութիւն կու տայ հայ դպրոցին եւ ճիշդ անոր համար հակառակ իր խճողուած ծրագրին, անպայման կ’ուզէ այցելել հայ դպրոց, հայ աշակերտներուն հետ ըլլալու եւ անոնց փոխանցելու իր հայրական յորդորները: Աշակերտները իրենց կարգին երգերով, ասմունքներով եւ ուղերձներով խանդավառ մթնոլորտ մը ստեղծեցին:

Վեհափառ Հայրապետը աշակերտներուն ուղղած իր պատգամին մէջ կարեւորութեամբ անդրադարձաւ հայ դպրոցի առաքելութեան, որպէս հայակերտումի նուիրական օճախ: Կոչ ուղղեց հայագիտական նիւթերու յատուկ կարեւորութիւն տալու եւ թելադրեց ծնողներուն, որ իրենց զաւակները յանձնեն հայ դպրոցի հայացնող մթնոլորտին:

Նորին Սրբութիւնը նաեւ հանդիպումներ ունեցաւ ուսուցչական կազմերուն հետ եւ գնահատեց ուսուցիչները իրենց կատարած նուիրական առաքելութեան համար:

iran8Թեհրանի Հայոց Առաջնորդարանի սրահէն ներս, Արամ Ա. Կաթողիկոս հանդիպում մը ունեցաւ իրանահայ գաղութի երիտասարդներուն հետ: Հանդիպման ընթացքին նախ խօսք առաւ Սեպուհ Սրբազանը շեշտելով, որ Վեհափառ Հայրապետին առօրեային մաս կը կազմեն մեր երիտասարդներն ու անոնց մտահոգութիւնները, այդ իսկ պատճառով ան անպայմանօրէն փափաքեցաւ երիտասարդ սերունդին հետ հանդիպիլ: Ապա, յանուն ներկայ երիտասարդներուն, Անի Մանուէլեան ուղերձ ընթերցեց:

Նորին Սրբութիւնը իր եզրափակիչ պատգամին մէջ ըսաւ. “Դիւրին չէ այսօր լպրծուն գետնի վրայ հաստատ մնալ: Երիտասարդութիւնը այսօր կը գտնուի այնպիսի հոսանքի դիմաց, որ արդէն իսկ զայն հոգեւոր ու բարոյական արժէքներու նահանջի ճանապարհին վրայ դրած է: Պէտք է կառչած մնալ հոգեւոր, ազգային ու բարոյական արժէքներուն: Ճիշդ է այսօր ժամանակները փոխուած են, բայց այդ ժամանակներուն զուգահեռ մենք պէտք է հաւատարիմ մնանք մեր ինքնութեան:“ Ապա, Վեհափառ Հայրապետը յիշեցուց երիտասարդներուն, թէ անոնք ընկերութեան լուսանցքին վրայ չեն եւ թէ յատուկ տեղ ու դեր ունին եւ պէտք է ունենան մեր ժողովուրդի կեանքին մէջ, որովհետեւ երիտասարդը մեր ապագան չէ, այլ՝ ներկան:

Հանդիպման աւարտին երիտասարդներ հարցումներ ուղղեցին Նորին Սրբութեան եւ հարկ եղած լուսաբանութիւնները ստացան: Ապա, տեղի ունեցաւ աջահամբոյր:

iran6Նոր Ջուղա այցելութեան ընթացքին, տեղւոյն Սուրբ Ամենափրկիչ վանքին մէջ տեղի ունեցաւ ժողովրդային խանդավառ ընդունելութիւն: Իրանի թեմակալ երեք առաջնորդները, հոգեւորականաց դասը, թեմական խորհուրդի անդամները, զանազան միութիւններու եւ մարմիններու պատասխանատուներն ու Սպահանի հայ ժողովուրդը միասնաբար թափօր կազմած առաջնորդեցին Վեհափառ Հայրապետը Սուրբ Յովսէփ Արեմաթացի եկեղեցին, աղօթքի համար: Աղօթքէն ետք, դարձեալ թափօրով ուղղուեցան դէպի Ապրիլեան Նահատակաց յուշարձան, ուր ծաղկեպսակ զետեղելէ ետք խօսք առաւ Սպահանի Հայոց Թեմի Առաջնորդ Գերշ. Տ. Բաբգէն Եպս. Չարեան: Սրբազանը իր բարի գալուստի խօսքին մէջ լայնօրէն անդրադարձաւ Վեհափառ Հայրապետին անսպառ ծառայութեան Հայ Եկեղեցւոյ ու հայ ազգին:

Արամ Ա. Կաթողիկոս իր պատգամին մէջ, անդրադառնալով Հայոց Ցեղասպանութեան 100-ամեակին, շեշտեց Հայաստանի մէջ իր կատարած հրապարակային յայտարարութեան կարեւորութիւնը, թէ Մեծի Տանն Կիլիկիոյ Կաթողիկոսութիւնը Թուրքիոյ Սահմանադրական ու Եւրոպայի Մարդկային Իրաւանց դատարաններուն դիմելով դատ պիտի բանայ Թուրքիոյ դէմ, պահանջելով իր պատմական կեդրոնին՝ Սիսի Կաթողիկոսարանի վերադարձը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles