0
0
Մեծի Տանն Կիլիկիոյ Արամ Ա. Կաթողիկոսը, մօտէն կը հետեւի Քեսապի մէջ ստեղծուած կացութեան եւ յատկապէս ժողովուրդին դիմագրաւած դժուարութիւններուն: Այս ուղղութեամբ Վեհափառ հայրապետը մնայուն կերպով կապեր հաստատեց Հալէպի, Լաթաքիոյ, Դամասկոսի եւ Լիբանանի մեր հոգեւոր, համայնքային ու քաղաքական պատասխանատուներուն հետ եւ խորհրդակցութիւններ ունեցաւ անոնց հետ:
Վեհափառ հայրապետը միաբան հայրերէ բաղկացած պատուիրակութիւն մը ղրկեց Լաթաքիա: Պատուիրակութեան նպատակն է ժողովուրդի զաւակներուն փոխանցել վեհափառ հայրապետին աղօթքներն ու զօրակցութիւնը, տեղեակ դառնալ ստեղծուած կացութեան եւ յատկապէս ուսումնասիրել ժողովուրդին կարիքները, որպէսզի կաթողիկոսարանին կողմէ անհրաժեշտ կարգադրութիւնները կատարուին:
Մայր տաճարին մէջ վեհափառ հայրապետը պատգամ մը ուղղեց ժողովուրդին: Ան ընդհանուր գիծերով բացատրեց Քեսապի մէջ ստեղծուած կացութիւնը եւ յիշեցուց, որ նոյն ցեղասպան թուրքը հարիւր տարիներ ետք դարձեալ գաղթական կը դարձնէ մեր ժողովուրդի զաւակները: Ապա Վեհափառը շեշտեց, որ աղօթքի եւ զօրակցութեան ճամբով Մեծի Տանն Կիլիկիոյ կաթողիկոսութիւնը կը մնայ Քեսապի Եւ ամբողջ Սուրիոյ հայութեան կողքին:
Նշենք թէ, Մարտ 22-ի ուշ ժամերուն, Վեհափառ հօր այցելեց Լիբանանի մէջ Սուրիոյ դեսպանը: Հանդիպման ներկայ եղան Հ.Յ.Դ. Լիբանանի Կեդրոնական կոմիտէի ներկայացուցիչ Յակոբ Խաչերեան եւ Հայկական երեսփոխանական պլոքի ներկայացուցիչ Յակոբ Բագրատունի: Սուրիոյ դեսպանը յայտնեց, որ Սուրիոյ նախագահին կողմէ իրեն պարտականութիւն տրուած է անմիջապէս այցելելու Վեհափառ հայրապետին իրեն վստահեցնելու, թէ Սուրիոյ պետութիւնն ու բանակը իրենց կարելին պիտի ընեն վերահաստատելու շրջանի խաղաղութիւնը:
Վեհափառ հայրապետը ըսաւ, թէ ինք մտահոգութեամբ կը հետեւի Սուրիոյ անցուդարձերուն, եւ ո՛չ միայն Սուրիոյ հայերով, այլեւ ամբողջ Սուրիոյ ժողովուրդի ու Սուրիոյ բոլոր շրջաններու ապահովութեամբ մտահոգ է: Խօսելով Քեսապի մասին` վեհափառը ըսաւ, որ Քեսապը խորհրդանշական իմաստ մը ունի մեր ամբողջ ժողովուրդին համար: Վեհափառը յիշեցուց, որ նոյն ցեղասպան Թուրքիան է, որ առիթը կ’օգտագործէ հարուածելու հայ ժողովուրդը:
Տեղահանուած բնակիչներուն կ՛օժանդեն Ծովափի հայութեան (Լաթաքիա եւ Քեսապ) շտապ օգնութեան գործադիր մարմինը, Սուրիական Կարմիր Մահիկ կազմակերպութիւնը, Սուրիահայ Օգնութեան Խաչն ու Յոյն Օրթոտոքս եկեղեցական կազմակերպութիւնը: Քեսապի երեք համայնքներու հովիւները եւս Լաթաքիա ժամանած են: Շրջանի նահանգապետն ու առողջապահական պետական գրասենեակի տնօրէնը եւս այցելած են տեղահանուած ժողովուրդին:
Լաթաքիոյ եւ Քեսապի Շտապ Օգնութաեն մարմինները միացուցած են իրենց ճիգերն ու կը փութան ժողովուրդի օգնութեան եւ կենցաղային էական կարիքներու ապահովման: Հարկաւոր է, որ այսօր համայն աշխարհի հայութիւնը ողջ աշխարհին բացայայտէ թրքական հայատեաց քաղաքականութիւնը Սուրիոյ մէջ:
Լաթաքիա ժամանած քեսապցիներու մաս մը տեղաւորուած է իրենց հարազատներուն մօտ, իսկ ուրիշներ Առաքելական Սուրբ Աստուածածին եկեղեցւոյ յարակից սրահներուն մէջ, ուր ամէն տեսակի օժանդակութիւն ցուցաբերուեցաւ: Սուրիական Կարմիր մահիկը, պետական կառոյցները, հայկական միութիւնները եւ եկեղեցին մեծ ջանքեր կը գործադրեն գաղթական քեսապահայութեան օժանդակութեան համար` անոնց բաժնելով ուտելիք, անկողին, ծածկոցներ եւ ամէնտեսակի կենսական նիւթեր:
