ՄԵԾԻ ՏԱՆՆ ԿԻԼԻԿԻՈՅ ԱՐԱՄ Ա. ԿԱԹՈՂԻԿՈՍԸ՝ ՈՒԱՇԻՆԿԹԸՆԻ ՄԷՋ

0 0
Read Time:1 Minute, 18 Second

aram was2

ՈՒԱՇԻՆԿԹԸՆ.- Մեծի Տանն Կիլիկիոյ Արամ Ա. Կաթողիկոսը, Շաբաթ, Սեպտեմբեր 6-ին Ուաշինկթըն ժամանեց, մասնակցելու համար Միջին Արեւելքի Քրիստոնեաներու պաշտպանման համար, յատուկ գիտաժողովի մը, որ տեղի պիտի ունենայ Օմնի Շորհամ պանդոկին մէջ:
Կիրակի, Սեպտեմբեր 7-ին, Վեհափառը կատարեց Ուաշինկթընի Սուրբ Խաչ եկեղեցւոյ մէջ մատուցուած Սուրբ եւ անմահ պատարագը: Վեհափառը պատգամ ուղղեց ներկայ ժողովուրդին: Ան յիշեց, որ իր ուսանողութեան օրերուն յաճախակի կերպով այցելած է այս եկեղեցին եւ իր խօսքը ուղղած ժողովուրդին: Ան նաեւ ողջունեց Ամերիկայի Արեւելեան թեմի Առաջնորդ Օշական արք. Չօլոյեանը եւ Ազգային իշխանութիւնը, որոնք նուիրումով լծուած են ազգային-եկեղեցական ծառայութեան:
Ապա, ան յիշեց, որ Ուաշինկթըն իր այցելութեան նպատակը մասնակցիլ եւ իր խօսքը ուղղել է Ուաշինկթընի մէջ տեղի ունենալիք Միջին Արեւելքի քրիստոնէութեան առնչուած միջազգային համագումարին:
Կաթողիկոսը իր պատգամին գլխաւոր նիւթը ընտրած էր հաւատքը, որպէս հիմքը քրիստոնէական կեանքին:
Իր հայրապետական պատգամի աւարտին, վեհափառը կոչ ուղղեց ժողովուրդի զաւակներուն, կառչած մնալու քրիստոնէական հաւատքին ու համախմբուելու, քրիստոնէական հաւատքը մեր կեանքին մէջ կենդանի պահած, հայ եկեղեցւոյ շուրջ: Վեհափառը նաեւ յիշեցուց, որ կը գտնուինք Հայոց Ցեղասպանութեան 100ամեակի սեմին, հետեւաբար, մեր ժողովուրդի ժամանակակից պատմութեան մէջ, վճռական դարձակէտ դառնալու կոչուած 2015 թուականին, ժողովուրդի զաւակները, Հայաստանէն մինչեւ Լիբանան, Միացեալ Նահանգներէն մինչեւ Եւրոպա եւ ի սփիւռս աշխարհի, որպէս մէկ ազգ, ցեղասպան թուրքէն ու աշխարհէն պէտք է պահանջեն իրենց բռնաբարուած իրաւունքները՝ հաւատարիմ մնալով մեր մէկուկէս միլիոն նահատակներու նուիրական կտակին:
Կաթողիկոսի պատգամէն առաջ, Օշական Արբազան ողջունեց վեհափառին ներկայութիւնը, յաջողութիւն մաղթելով իր առաքելութեան: Պատարագին ներկայ էին Հայաստանի դեսպան Տիգրան Սարգսեան, Արցախի ներկայացուցիչ Ռոպերթ Աւետիսեան, Ազգային իշխանութեան անդամներ եւ մեծ թիւով ներկաներ: Սուրբ եւ անմահ պատարագէն ետք տեղի ունեցաւ աջահամբոյր:
Արամ Ա. կաթողիկոս նաեւ հանդիպումներ ունեցաւ առաջնորդ սրբազանին, Ազգային իշխանութեան մարմիններուն եւ Հայոց Ցեղասպանութեան յանձնախումբի ներկայացուցիչներուն հետ:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles