0
0
Յատուկ հաղորդագրութեամբ մը կը տեղեկանանք թէ Սուրբ Ստեփանոս Ազգային Վարժարանի ընդարձակման շինարարական աշխատանքը, որ սկսած էր Յունիս 20, 2012-ին աւարտած է Օգոստոս 31, 2012-ին: Հետեւաբար, նոր շէնքը պատրաստ եղաւ ճիշդ ժամանակին, 2012-2013 դպրոցական Տարեշրջանին համար: Այս ընդարձակումը, որ արժեց 1,37 միլիոն տոլար, վերջին 20 տարիներուն ամէնէն մեծ շինարարութիւնը եղաւ` ի նպաստ Մեծն. Պոսթընի հայ համայնքին: Երկու յարկանի, 6000 քառակուսի ոտք տարածութեամբ այս շէնքը կ՛ընդգրկէ չորս նոր դասարաններ, արդիական խաղավայր եւ ներքին զբօսավայր/հաւաքավայր:
“Այս ընդարձակումը կարեւոր հանգրուան մը կը ներկայացնէ դպրոցի պատմութեան մէջ, ստեղծելով նոր կարելիութեւններ եւ յաւելեալ տարածութիւն շարունակաբար աւելցող աշակերտութեան համար“, կ՛ըսէ Վարժարանի Տնօրէնուհի Հուրի Պոյամեան:
Սիրով կը հրաւիրենք բոլոր գաղութը, Բացման Հանդիսութեան, որ տեղի պիտի ունենայ, Կիրակի, Հոկտեմբեր 14, 2012, ժամը 12-ին, 46 Elton Avenue, Watertown, MA, Ս. Պատարագէն ետք, Ձեռամբ Թեմիս Բարեջան Առաջնորդ Բարձ. Տ. Օշական Արք. Չօլոյեանի:
Սուրբ Ստեփանոս Ազգային Վարժարանը, 2010-ին ճանչցուեցաւ իբրեւ “Լաւագոյն Հայ Դպրոց“ Հայաստանի Սփիւռքի Նախարարութեան կողմէ եւ միակ որակաւորուած Հայ Վարժարանն է Նիւ Ինկլընտի Անկախ Վարժարաններու Միութեան կողմէ: Սոյն ընդարձակումով դպրոցը պիտի շարունակէ տալ որակեալ Ամերիկեան ուսում, դրուած Հայ Մշակոյթի եւ Լեզուի զօրաւոր հիմքերուն վրայ:
