ԱՓ ՄԸ ԵՐԳԻԾԱՆՔ.- «ԳԱՅԻԱՆԷԻ ԵՐԳՉԱԽՈՒՄԲ»Ը(*) ՎԵՐԱԿԱՆԳՆԵԼՈՒ ԾՐԱԳԻՐ

0 0
Read Time:1 Minute, 34 Second

 

Ս. Մահսերէճեան

Շշուկներ շրջան կ՛ընեն, որ Հայաստանի նորակազմ կառավարութիւնը լուսարձակներէ հեռու ծրագիր մը կը մշակէ` վերակենդանացնելու Կոմիտաս Վարդապետի նշանաւոր «Գայիանէի Երգչախումբ»ը: Այս հիմնարկը կոչուած է դարմանելու Լեզուի Տեսչութեան լուծարքով ստեղծուող բացը…:
Անդամներու արձանագրութեան համար պատրաստուած է յատուկ ծրագիր մը:
«Ալթօ»ները պիտի բերուին նախարարներու, պետական եւ կուսակցական պատասխանատուներու-գործիչներու շրջանակէն:
«Սոփրանօ»ները պիտի գան պատկերասփիւռի յայտագիրներ ու ժապաւէններ արտադրողներու շարքերէն:
«Թենոր»ները` լսատեսողական եւ գրաւոր մամուլի ծառայողներէ, իսկ
«Պաս»երը` մշակոյթի գործիչներէ, արուեստագէտներէ, մտաւորականներէ ու ակադեմականներէ: Կը մտածուի նաեւ մենակատարներու մասին:
Այս գաղափարը, կը փսփսան իրազեկները, ներշնչում առած է այն իրականութենէն, որ թեկնածուները կը յամառին մեր լեզուն գերի պահել… օտարաբանութիւններու, տրամադիր չեն աչք ու ականջ բանալու լեզուն մաքրազտելու բոլոր կոչ-հրաւէրներուն դիմաց, որոնք կը բարձրանան Հայաստանէն կամ Սփիւռքէն: Երգչախումբին նպատակը պիտի ըլլայ անդամները, եւ անոնց ճամբով` մեր բերանացի ու գրաւոր բոլոր արտայայտութիւնները կարճ ժամանակի մէջ հականեխել այս դարաւոր ախտին դէմ:
Բաւական դժուար կը թուի ըլլալ խմբավար մը գտնելու հարցը. խմբավար մը, որ ապացուցէ, թէ նուազագոյն չափով վարակուած է այս ախտով: Փնտռտուքի առաջին դաշտը` նոր լիազօրութիւններով օժտուած Ազգային Ժողովն է, կ՛ըսուի:
Այս երգչախումբը այլապէս պիտի ըլլայ Հայաստան-Սփիւռք գործակցութեան նորագոյն մէկ արտայայտութիւնը, մեկնակէտ ունենալով վարչապետին աւելի քան երկու ամիս առաջ արձակած կոչը, որովհետեւ Սփիւռքի օճախներն ալ զերծ չեն այս ախտէն. աւելի՛ն, բազմաթիւ գաղութներու մէջ օտար լեզուները գրաւած են խօսակցական առօրեան, հովին տալով դպրոցին, եկեղեցւոյ ու ազգային-մշակութային միաւորներու ճիգերը: Սփիւռքը սկսած է նաեւ վարակուիլ Հայաստանէն հեռարձակուող յայտագիրներու մանրէներով:
«Գայիանէի Երգչախումբ»էն շրջանաւարտ ըլլալու համար, նախապայման է հականեխումի ենթարկուիլ օտարաբանութենէ: Զուգահեռաբար, պիտի վերականգնի մեսրոպեան-դասական ուղղագրութիւնը, կը հաւաստեն շշուկները:
Գլխաւոր դժուարութիւնը, կ՛ըսուի, նիւթական միջոցներու ապահովումէն աւելի, նման ծրագիրի իրականացման կամքի ու բարի տրամադրութեան բացակայութիւնն է:

(*) «Գայիանէի Երգչախումբ»ը Կոմիտաս Վարդապետի զուարթախոհութեան մէկ ծնունդն էր. Սիմոն Վրացեան կը պատմէ, թէ Էջմիածինի Ճեմարանը իր մուտքի օրերուն, Վարդապետը, նկատելով իր բաղաձայն ըլլալը, ըսած է որ զինք այդ երգչախումբին անդամ պիտի արձանագրէ: Վրացեան յետոյ իմացած է, որ այդ «երգչախումբը» Էջմիածինի… ախորն էր:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles