0
0
Փետրուար 23-ին, Փրովիտենսի Սուրբ Վարդանանց եկեղեցւոյ “Արամեան“ սրահէն ներս, նշուեցաւ Հ.Յ.Դ. 123-ամեակը:
Տեղի ունեցաւ դրօշակի արարողութիւն, ապա հանդիսավար Մարկրէթ Ստեփանեան, կատարեց հանդիսութեան բացումը, բեմ հրաւիրելով շրջանի հովիւ` Կոմիտաս Պաղսարեանը, որ կատարէ օրուան աղօթքը: Ապա Ստեփանեան անդրադարձաւ Փրովիտենսի Հ.Յ.Դ. պատմութեան մասին եւ նշեց թէ 1893-ին հիմնուած է շրջանի կառոյցը: Ապա խօսք առաւ շրջանի “Քրիստափոր“ կոմիտէութեան հերթապահ Յակոբ Տօնոյեան, որ բարի գալուստ մաղթեց ներկաներուն:
Օրուան պատգամը ներկայացուցին Ճորճ Աղճայեան (անգլերէն) եւ Խաժակ Մկրտիչեան (հայերէն): Խօսք առին նաեւ շրջանէն ընկերներ` Ճոն Մկրտիչեան եւ Սարգիս Թարփինեան: Անոնք շեշտեցին թէ, այս նոր սերունդին պարտականութիւնն է 123-ամեայ աշխատանք մը շարունակել, միեւնոյն հաւատքով եւ նուիրումով:
Ապա, եօթ նոր շարքային ընկերներու յանձնուեցան Հ.Յ.Դ.-ի փոքր զինանշաններ: Այս եօթ նորեկներն են.- Անտրու Պաղտասարեան, Սեւան Տօնոյեան, Տալիտա Կեցոյեան, Րաֆֆի Ռշտունի, Ալեքս Սահակով, Կարօ Թաշեան եւ Լեւոն Զօպեան, որոնք միացած են Հ.Ե.Դ.-ի եւ Հ.Մ.Ը.Մ.-ի շարքերէն:
Ապա տեղի ունեցաւ հիւրասիրութիւն եւ խրախճանք:
