Հ.Յ.Դ. Հայ Դատի Յանձնախումբերու Եւ Գրասենեակներու Խորհրդաժողովը` Արցախի Մէջ
ՍՏԵՓԱՆԱԿԵՐՏ.- Դեկտեմբեր 2-էն 3, Հ.Յ.Դ. Հայ դատի յանձնախումբերու եւ գրասենեակներու խորհրդաժողովը իր աշխատանքները շարունակեց Աարցախի մէջ:
Հայ Դատի աւելի քան 20 յանձնախումբերէ եւ գրասենեակներէ, ինչպէս նաեւ Հ.Յ.Դ. կուսակցական մարմիններէ ժամանած մօտ 50 ներկայացուցիչներ Ստեփանակերտի մէջ նախ այցելեցին Եղբայրական գերեզմանատուն` իրենց յարգանքի տուրքը մատուցելու արցախեան պատերազմներու զոհերու յիշատակին:
Արցախի Հանրապետութեան Ազգային ժողովի նիստերու դահլիճին մէջ խորհրդաժողովին մասնակիցները հանդիպում ունեցան Արցախի Հանրապետութեան Ազգային ժողովի նախագահի, խորհրդարանին մէջ ներկայացուած կուսակցութիւններու ղեկավարներու, պատգամաւորներու, Արցախի Հանրապետութեան մարդու իրաւունքներու պաշտպանին, Արցախի Հանրապետութեան արտաքին գործոց նախարարին, Արցախի Հանրապետութեան Անվտանգութեան խորհուրդի քարտուղարին հետ: Հրաւիրեալները նախ հանդէս եկան ողջոյնի խօսքով, տեղեկութիւններ հաղորդեցին իրենց ոլորտներուն մասին եւ պատասխանեցին մասնակիցներու հարցումներուն:
Ներկայացուցիչները այցելեցին Ասկերանի շրջանի շարք մը համայնքներ, ծանօթացան Արցախի գրաւուած տարածքներու բնակիչներուն համար կառուցուող բնակարաններու շինարարական աշխատանքներուն:
