0
0
Յարգելի՛ քաղաքացիներ,
Հայաստանի Հանրապետութեան նախագահի ընտրութեանը թեկնածու չառաջադրելու` Հ.Յ.Դ. որոշման պատճառները ձեզ յայտնի են. միասնական քաղաքական օրակարգ ձեւաւորելու, ընդդիմադիր միասնական թեկնածու ունենալու մեր ջանքը արդիւնք չունեցաւ: Այդ պայմաններում անիմաստ էր մասնակցել մի միջոցառման, որի ելքը կանխորոշուած է: Նախընտրական այս ընթացքը նոյնպէս ընտրութիւնների “որակի“ ապացոյցն է:
Բայց կեանքը Փետրուար 18-ից յետոյ շարունակուելու է, ժողովրդին յուզող խնդիրները մնալու են օրակարգում, եւ մենք վստահ ենք, որ հայ հասարակութիւնն իր մէջ արմատական փոփոխութիւններ կատարելու ուժ է գտնելու եւ վաղ, թէ ուշ հնարաւոր է դարձնելու ազատ, արդար, մրցակցային ընտրութիւնների անցկացումը:
Մենք ձեզ յորդորում ենք Փետրուար 18-ին անպայման գնալ ընտրութեան, թոյլ չտալ, որ վերջնականապէս վարկաբեկուի այդ հասկացողութիւնը եւ ձեր ձայնն օգտագործուի իշխանութեան վերարտադրման համար: Ի վերջոյ, ժողովրդավարական Հայաստանը ժողովրդավարական ընտրութիւններով է կայանալու: Իբրեւ ընդդիմադիր քաղաքական ուժ` մենք կոչ ենք անում` գնալ ընտրութեան, ձայն չտալ իշխանութեան թեկնածուին, քուէարկել ձեր խղճով ու ցանկութեամբ կամ քուէաթերթիկը անվաւեր դարձնել:
Հ.Յ. Դաշնակցութիւնը շարունակելու է պայքարը` նպատակ ունենալով իր հռչակած քաղաքական օրակարգով արմատապէս շրջել անվստահութեան, յուսալքութեան մթնոլորտը, երկիրը դուրս բերել բնականոն զարգացման հուն, ապահովել մեր քաղաքացիների բարեկեցիկ ու արժանապատիւ կեանքը:
Հ.Յ.Դ. ՀԱՅԱՍՏԱՆԻ ԳԵՐԱԳՈՅՆ ՄԱՐՄԻՆ
Փետրուար 15, 2013
