0
0
ՍՏԵՓԱՆԱԿԵՐՏ («Ապառաժ»)․- Հ․Յ․Դ․ Արեւելեան Ա․Մ․Ն․-ի «Արցախ ֆոնտ»-ի բարեգործական հիմնադրամի յանձնախումբի անդամ Փօլին Տոստումեանը եւ հիմնադրամի Արցախի գրասենեակի տնօրէն Տրդատ Մարտիրոսեանը, Յունիս 2022-ի առաջին կիսուն այցելութիւն մը կատարած էին Արցախի Մարտունի շրջանի Հացի համայնք։ Անոնք, նախապէս ծանօթացած էին համայնքի խնդիրներուն: Հաշուի առնելով համայնքի անդամներու եւ ղեկավարի առաջարկները` որոշուած էր օժանդակել բնակչութեան` մեղուաբուծութեան բնագաւառէն ներս:
Շահառուներու հետ կնքուած պայմանագրի համաձայն` հիմնադրամը մեղուաբուծութեամբ զբաղուելու համար իւրաքանչիւր շահառուի յատկացուց 42 հազար դրամ արժողութեան մեղուափեթակներ, իսկ շահառուները «Արցախ ֆոնտ»-ի բարեգործական հիմնադրամին պիտի վերադարձնեն գումարին 25 տոկոսը:
Այսպէս, Հոկտեմբերի 20-ին Հացի համայնքի 12 շահառուներուն տրամադրուեցան կերպընկալէ պատրաստուած յատուկ թեթեւ երեսուն մեղուափեթակներ:
Այս ծրագրին շահառու դարձան նախապէս դիմումնագրեր ներկայացուցած բոլոր դիմողները: Փեթակների տրամադրման ընթացքին, համայնքէն այլ անդամներ եւս ցանկութիւն յայտնած են մեղուաբուծութեան այս ծրագրին:
Համայնքի ղեկավար Սանթուր Սարգսեանը շնորհակալութիւն յայտնեց հիմնադրամի բոլոր անդամներուն նման նախաձեռնութեան համար եւ յայտնեց, թէ այլ բազմաթիւ մտահղացումներ կան համայնքի զարգացման հետ կապուած։ «Մեղուապահութեան հեռանկարով մէկ ամիս առաջ նախապատրաստական աշխատանքներ ենք կատարել` 20 հող օգտագործողների տրամադրելով 20 հեքթար վարելահողի համար սերմնացու, որ մեղուների ամենահարուստ բոյսերից է: Ծրագրի 12 շահառուներից վեցը բազմաթիւ տարիների փորձառութիւն ունեն, իսկ վեց հոգի սկսնակ մեղուապահներ են: Մեծ շահոյթի պարագայում կը փորձենք վաճառք կազմակերպել թե՛ արտահանման եւ թե՛ տօնավաճառի միջոցով», ըսաւ Սարգսեան, որ կատակով մըն ալ շարունակեց, թէ «Ի համեմատ խոշոր եղջերաւորների, մեղուները հայ-ատրպէյճանական շփման գիծ եւ սահմաններ չեն ճանաչում»:
Մեղուաբուծութեամբ զբաղուող Արեգայ Աբրահամեանը յայտնեց․- «Իւրաքանչիւր նմանատիպ ծրագիր հային իր հողում ապրելու յոյս է արթնացնում, շեղում մեր ուշադրութիւնը մտատանջող իրականութիւնից: Աստուած տա՛ Արցախ աշխարհում յարատեւ խաղաղութիւն լինի, դա բոլորիս բաղձալի երազանքն է դարձել: Թող գիւղացին էլ նորից իր հողը մշակի, իր բերք ու բարիքն ունենայ»:
Գիւղին մէջ 40-45 տարի շարունակ մեղուաբուծութեամբ զբաղուողներ ալ կան: Բոլոր գաղտնիքներուն ծանօթ եւ իր գործին մէջ վաղուց հմուտ Ալեքսանտր Ղազեանի խօսքով իւրաքանչիւր փեթակէն 10 քիլոկրամ մեղր կը ստացուի, որ կարելի է վաճառքի համար արտահանել Հայաստան եւ արտասահման: Անոր պատրաստակամութիւն յայտնեց սկսնակ մեղուապահներու հետ մեղուաբուծութեան գաղտնիքները կիսելու:
«Արցախ ֆոնտ» բարեգործական հիմնադրամի Արցախի գրասենեակի տնօրէն Տրդատ Մարտիրոսեանը յոյս յայտնեց, որ այս ծրագիրը աշխատանք չունեցող ընտանիքներու համար եկամուտ ապահովելու միջոց կը հանդիսանայ: Հաշուի առնելով նոր փեթակներ ձեռք բերելու պահանջը, շահագրգռուածութիւնն ու նոր դիմողներու թիւը` այս ծրագիրը կը փորձուի շարունակական դարձնել ոչ միայն Հացի համայնքին մէջ, այլ նաեւ շփման գծին մօտ գտնուող Արցախի այլ համայնքներու մէջ:
