ՀԵՐՈՍՈՒԹԻՒՆ, ԼՈՅՍ ԵՒ ՅՈՅՍ (ներշնչուած Հալէպի Ազգ. Քարէն Եփփէ Ճեմարանի 2014-ի միջնակարգ շրջանաւարտներու նկարէն)

0 0
Read Time:2 Minute, 15 Second

shitilian Պետրոս Քհնյ. Շիթիլեան

Միայն այս բառերով կարելի է բնորոշել այս նկարը:
Նկար մը, որ առնուած է ոչ թէ Արեւմտեան աշխարհի խաղաղ եւ բարեկեցիկ մեր գաղութներէն,
Նկար մը, որ առնուած է ռումբերու ու կրակոցներու տակ,
Նկար մը, որ առնուած է ճիշդ այն օրերուն երբ Հալէպի Նոր Գիւղ շրջանը կը տքար կրակներու տակ,
Նկար մը, որ ցոյց կու տայ ցեղի հոգին:

Հերոսութի՛ւն, որովհետեւ ինչպէս որ այս նկարին մէջի, նոյնպէս Հալէպի հայկական բոլոր դպրոցներու աշակերտներն ու ուսուցիչները ամէն օր դպրոց կ՚երթան եւ կու գան առանց վստահ ըլլալու որ ողջ ու առողջ իրենց տուները պիտի վերադառնան,
Հերոսութի՛ւն, որովհետեւ անոնք իրենց դասերը կը պատրաստեն մոմերու լոյսին տակ,
Հերոսութի՛ւն, որովհետեւ այսօր Սուրիոյ պայմաններուն մէջ ապրիլն ինքնին հերոսութիւն է, առաւել եւս Սուրիոյ այսօրուայ պայմաններուն մէջ Հայ դպրոց բաց պահելը ինքնին հրաշք մըն է,
Եւ վերջապէս հերոսութի՛ւն, որովհետեւ Սուրիոյ այսօրուայ պայմաններուն մէջ Հայ դպրոց պահելը ամենամեծ ապտակն է Թուրքին, որ կացութենէն օգտուելով ամէն ինչ կ՚ընէ պարպելու համար Սուրիան հայութենէն:

Լո՜յս, որովհետեւ ազգային կրթութիւն տալու եւ մշակոյթին հանդէպ նման մեր վերաբերմունքով է որ կրցած ենք գոյատեւել,
Լո՜յս, որովհետեւ ազգերը կը գոյատեւեն ոչ թէ միայն իրենց հերոսութեամբ՝ այլ նաեւ մշակոյթով, ա՛յս է պատճառը որ մեծ ու զօրաւոր ազգեր որոնք յենած են միայն ուժի վրայ այսօր գոյութիւն չունին, ա՛յս է պատճառը որ Հռոմը չկայ բայց Յունաստանը դեռ կայ,
Լո՜յս, որովհետեւ հասկցած ենք ազգային մշակոյթ ստեղծելու կարեւորութիւնը,
Լո՜յս, որովհետեւ հասկցած ենք կրթութեան կարեւորութիւնը, եւ ամենադաժան պայմաններու մէջ կրթութիւն տուած ենք յաջորդ սերունդներուն, անգամ Տէր Զօրի աւազներուն մէջ մեր մատերով գրելով, ազգային այբուբենը սորվեցուցած ենք մեր զաւակներուն:

Յո՜յս, որովհետեւ պատանիներուն այս ժպիտը ամենամեծ փաստն է մեր հոգիին, հայու հոգիին, որ գիտէ ժպտալ ամենադաժան պայմաններուն մէջ, որ գիտէ իր հոգին բարձր պահել երբ ամէն ինչ շուրջը փլած կ՚երեւի,
Յո՜յս, որ կը նշանակէ լաւատեսութիւն ու տոկալու կամք,
Յո՜յս, որովհետեւ կը փաստէ օտարներուն կողմէն անգամ խոստովանուած՝ մեր լաւատես ըլլալը,
Յո՜յս, որ կու գայ մեր հաւատքէն, բարիին ու արդարութեան յաղթանակին հանդէպ մեր վստահութենէն՝ անգամ ամենադաժան պայմաններուն մէջ,
Եւ վերջապէս Յո՜յս, մեծատառ Յո՜յս, քրիստոնէակա՛ն Յո՜յս, որովհետեւ կը հաւատանք որ գոյութեան վերջնական տնօրինողը ամենակարող ու արդար Աստուածն է:

Յաճախ կը հարցնենք թէ ո՞րն է մեր գոյութեան գաղտնիքը: Այս նկարին մէջ փնտռ
եցէք զայն, մեր հոգիին մէջ փնտռեցէք զայն, մեր հերոսութեան, մշակոյթին հանդէպ սիրոյ ու քրիստոնէական լաւատեսութեան եւ Յոյսի մէջ փնտռեցէք զայն: Սերունդները ու պատմութիւնը պիտի յիշեն այս նկարը, պիտի յիշեն այն օրինակը որ Սուրիահայութիւնը կու տայ մեզի այսօր իրենց համար օրհասական այս օրերուն, եւ պիտի յիշեն` թէ այն ժամանակ երբ հայութիւնը ըլլա՛յ Հայաստանի մէջ, ըլլա՛յ Սփիւռքի մէջ կը քնանար խորունկ քնով ու խրուած էր քաղքենիութեան ճահիճին մէջ , սուրիահայութիւնն էր որ վառ պահեց ցեղի հոգին, սուրիահայութիւնն էր որ գալեց հերոսութեան, լոյսի եւ յոյսի ճամբով:

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

One thought on “ՀԵՐՈՍՈՒԹԻՒՆ, ԼՈՅՍ ԵՒ ՅՈՅՍ (ներշնչուած Հալէպի Ազգ. Քարէն Եփփէ Ճեմարանի 2014-ի միջնակարգ շրջանաւարտներու նկարէն)

Leave a Reply

Your email address will not be published.

Social profiles