ՀԱՐԻՒՐ ՏԱՐՈՒԱՅ…ԱՌԱՆՁՆՈՒԹԻՒՆ

0 0
Read Time:1 Minute, 47 Second

Armenian-Genocide-billboar  ՀԱՅՐԵՆԻՔ

Խմբագրական

“Ոչ ոք արժանի է արցունքներուդ, բայց ան որ արժանանայ, քեզ պիտի չլացնէ…“,
Կապրիէլ Կարսիա Մարքէս

Ապրիլ 17-ին, առ յաւէտ իր աչքերը փակեց, սպանախօս գրականութեան աշխարհի տիտաններէն` Գոլոմպիացի Կապրիէլ Կարսիա Մարքէս:
Անոր գլուխ գործոցը` “Հարիւր Տարուայ Առանձնութիւն“ կը մնայ աշխարհի գիր ու գրականութեան ամենէն աւելի կոթողային գործերէն մէկը:
Իր ողջմիտ եւ ժողովրդավարական սկզբունքներու վրայ հիմնուած գաղափարներով, Մարքէս վստահաբար տեղեակ էր Հայոց Ցեղասպանութեան մասին, որուն 99-ամեակի նշումէն միայն քանի մը օր առաջ, ան հրաժեշտ առաւ այս աշխարհէն: …Գրեթէ հարիւր տարուայ իւրայատուկ “առանձնութիւն“ մը, մոռացութիւն մը…ունայնութիւն մը:
Այդ գործին մէջ, Կապօ (Մարքէս ծածկանունը) կը ներկայացնէ իր ծննդավայրի սովորութիւններն ու կեանքի եղափոխութիւնը, քանի մը սերունդներու ընդմէջէն, միշտ ալ քայլ մը աւելի անդին դուրս գալով իրականութենէն եւ մուտք գործելով երեւակայական բնաշխարհ մը` Մաքոնտօ կոչեցեալ Չքաստանին (Ութոփիա) մէջ: Տարբեր է հայորդիին ապրած “Հարիւր Տարուայ Առանձնութիւն“ը, եւ Կապոյի նկարագրած երազային աշխարհէն բոլորովին հեռու… իրապաշտ աշխարհ, իսկական հեւք, տառապանք, պայքար, շարունակ պայքար յանուն արդարութեան, արդարադատութեան, ճանաչման, հատուցման, պահանջատիրութեան եւ ու եւ…:
Հայոց Ցեղասպանութեան սոսկ ճանաչումէն անդին երթալով, անցնող տասնամեակներուն Հայ Դատի մարմինները, քաղաքական կուսակցութիւնները ու հայոց եկեղեցին հետեւողական աշխատանք կատարեցին հայ ժողովուրդին դէմ գործադրուած Ցեղասպանութիւնը եւ մեր արդար իրաւունքները օտարներուն ծանօթացնելու գործընթացով: Բնական է, որ քարոզչական այս աշխատանքները իրենց դրական արդիւնքը ունեցան եւ մեր ժողովուրդին դատը սկսաւ ծանօթ դառնալ օտար ազգերուն. եւ աւելի՛ն, պետութիւններ ու կրօնական կազմակերպութիւններ սկսան պաշտօնապէս ճանչնալ հայ ժողովուրդին դատը:
Այս գծով, ռազմավարական ու մարտավարական մօտեցումը կը նկատուի խիստ հրամայական, եւ բնականաբար կ՛ենթադրէ իւրայատուկ մտածելակերպ ու գործելակերպ: Հետեւաբար, անհրաժեշտ է քարոզչական, քաղաքական, դիւանագիտական եւ իրաւական տարածքներու միջեւ սերտ ներդաշնակութիւն եւ յարաբերութիւն ստեղծել, քանզի, անոնք զիրար կ՛ամբողջացնեն ու կը զօրացնեն:
Հայորդիին ապրած “Հարիւր Տարուայ Առանձնութիւն“ը ազգային պահանջատիրութեան հաւաքական ըմբռնումը ու սահմանումը, ցայսօր կը մնան ընդհանրութեան սահմաններուն մէջ: Ցաւը լուռ է, վէրքը` խոր եւ շատ բան կը պահանջուի ցեպասպանէն` Ցեղասպանութեան ճանաչում, հողային պահանջ, կալուածներու վերադարձ, նիւթական հատուցում եւ այլն…:
Հայորդիին ապրած “Հարիւր Տարուայ Առանձնութիւն“ը անգամ մը եւս կրկնուեցաւ, դեռ քանի մը շաբաթ առաջ, Քեսապի մէջ կատարուած ողբալի անցուդարձերով: …Եւ այս մէկը իրականութիւն է, Կապոյի երեւակայած Մաքոնտօ Չքաստանը չէ, այլ չքնաղ Քեսապը, որուն բնակչութիւնը անգամ մը եւս տարագրուեցաւ:
Ահաւասիկ իրապաշտ հայորդիին “Հարիւր Տարուայ Առանձնութիւն“ը, գեր-իրապաշտ աշխարհ մը…հեռու Կապոյի երազայինէն:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles