ՀԱՅ ԴԱՏԻ ՅԱՆՁՆԱԽՈՒՄԲԵՐՈՒ ԽՈՐՀՐԴԱԺՈՂՈՎ
Հիւսիսային Ամերիկայի Արեւելեան եւ Արեւմտեան շրջաններէն, Գանատայէն, Հարաւային Ամերիկայէն եւ Աւստրալիայէն Հայ Դատի յանձնախումբերու – գրասենեակներու ներկայացուցիչներ Ապրիլի առաջին շաբաթավերջին, հաւաքուեցան Նիւ Ճըրզիի մէջ, եւ գումարեցին խորհրդաժողով մը, որ անդրադարձաւ Հայկական Ցեղասպանութեան ճանաչման եւ ճիշդ ու արդար կարգաւորման, անկախ Լեռնային Ղարաբաղի Հանրապետութեան անվտանգութեան, Վրաստանի Ջաւախք շրջանի ինքնավարութեան եւ ընկերային-տնտեսական զարգացման եւ աւելի զօրաւոր Հայաստանի Հանրապետութեան համար, այս տարածաշրջաններուն մէջ սփիւռքեան գաղութներու տարած պայքարի ընթացքին անոնց դիմագրաւած բազմաթիւ մարտահրաւէրներուն եւ պատեհութիւններուն:
Նշենք թէ Նիւ Ճըրզիի խորհրդաժողովը մաս կը կազմէ նախապէս կատարուած աշխարհասփիւռ խորհրդակցութիւններու: Անցեալ տարուայ վերջաւորութեան տեղի ունեցան Մերձաւոր Արեւելքի եւ Եւրոպայի Հայ Դատի խորհրդաժողովները, Պէյրութի եւ Փարիզի մէջ:

