ՀԱՅՈՑ ՆԵՄԵՍԻՍԸ ՎԱՀԱԳՆԻ  ՆԻԶԱԿՆ Է

0 0
Read Time:2 Minute, 0 Second

Ա.Ա.

     Հայոց Նեմեսիսի յուշակոթողը լուրջ փորձաքար մը եղաւ հայեւթուրք յարաբերութիւններու կարգաւորման հոլովոյթին, երբ թրքական կողմը, իբրեւ հակազդեցութիւն յուշակոթողին տեղադրման,փակեց Թուրքիոյ օդային տարածքները, երրորդ երկիր թռչող  հայկական օդանաւերուն դիմաց։

     Աւելի՛ն։Թուրքիոյ արտաքին գործոց նախարար Մեւլութ Չաւուշօղլու սպառնաց այլ քայլերու ալ դիմել, եթէ հայկական կողմը յուշակոթողը չվերացնէ։

     Դիւանագիտական յարաբերութիւններ չունեցող երկու երկիրներու միջեւ նման իրավիճակ բնականաբար բաւական լուրջ խնդիրներու ծագմամբ պայմանաւորուած է, եթէ մէկ կողմը՝ այս պարագային Թուրքիա, ներկայանայ իրբեւ «պատժող» ուժ։

     Իսկ ի՞նչ է հայկական կողմին գործած յանցանքը, որուն համար թրքական օդային տարածքները կը փակուին հայկական օդանաւային ընկերութիւններու օդանաւերուն դիմաց։Այս հարցումին պատասխանը եւ անկէ բխած բոլոր իրավիճակները եւ զարգացումները միայն մէկ բան կը շեշտեն։ Ինքնիշխան պետութեան մը մայրաքաղաքին տեղական իշխանութիւնները ազատ են իրենց հայեցողութիւններուն մէջ եւ ոչ ոք կրնայ որոշումներ պարտադրել՝  տարբեր տեսակի ճնշումներ բանեցնելով։ Որոշումը, որ կը վերաբերի Նեմեսիսի հերոսներուն եւ անոնց կատարած պատժիչ գործողութիւններուն յաւերժացման համար կանգնեցուած յուշակոթողին, ազատ եւ ինքնիշխան համայնքի մը անվիճելի իրաւունքն է եւ ոչ ոք կրնայ զայն փոխելու նպատակով քայլերու դիմել։ Նոյնիսկ եթէ օդային տարածքներ կը փակուին եւ այլ քայլերու մասին սպառնական յայտարարութիւններ կը կատարուին։

    Հայոց Արդարահատոյցին հերոսներուն յիշատակին կանգնեցուած Արժանապատուութեան յուշակոթողին խորհուրդը կը գլէ ու կ՛անցնի բոլոր նեղ հաշիւները եւ քաղաքական սակարկութիւնները, որովհետեւ անիկա արտացոլացումն է ցեղասպանութեան ենթարկուած ամբողջ ժողովուրդի մը սպասումին՝ իր դահիճներուն արդար պատիժին, որ գործադրուեցաւ Հայոց Նեմեսիսի հերոսներուն կողմէ, որոնք ականջ տուին Շահան Նաթալիի խօսքին, թէ՝ «սիրեցէք զէնքի աստուածը,որպէսզի ան առատօրէն արդարահատոյց պիտի ընէ ձեզ»: Այսպիսով Հայոց Ցեղասպանութեան դահիճները պատժելու համար կատարուած գործողութիւնները ոչ մէկ ձեւով կարելի է համեմատել մերօրեայ քաղաքական- դիւանագիտական ակնկալութիւններու եւ սակարկութիւններու փաթէթներուն հետ, որովհետեւ երբ արդարահատոյցի մարտիկները կրակեցին դահիճներուն ուղղութեամբ, ամբողջ ժողովուրդի մը ճակատագիրը փոխած ցեղասպանական ոճիրին հատուցումը պահանջեցին՝ ոճրագործները պատժելով։

    Հայոց մայրաքաղաքին զբօսայգիներէն մէկուն կեդրոնը կանգնեցուած յուշակոթողը պարզ ժամադրավայր մը չէ։ Անիկա լիցքաւորման, յիշողութեան, արժանապատուութեան եւ արդար հատուցման պատժիչ արարքներուն հերոսներուն յիշատակի յաւերժացման քարակերտ նիզակն է, որուն պարունակած խորհուրդը կարելի չէ անտեսել եւ մոռնալ, պարզապէս որովհետեւ Թուրքիոյ իշխանութիւնները օդային տարածքներ կը փակեն հայկական օդանաւերու դիմաց, կամ այլ քայլերու դիմելու սպառնական ոճի յայտարարութիւններ կը կատարեն։ Հայոց մայրաքաղաքին բնակիչները եւ Երեւան այցելող բոլոր հայորդիները անխտիր պիտի այցելեն օղակաձեւ զբօսայգին եւ պահ մը Ազգային Արժանապատուութեան Ասպետներուն նուիրուած յուշակոթողին նայելով՝ հաշուի պիտի նստին իրենց ապրումներուն, յիշողութեան եւ էութեան հետ։ Հայ ենք, Ցեղասպանութեան զոհ գացած ժողովուրդի մը ժառանգորդներն ենք, թուրքին մերօրեայ խուսանաւումներուն ականատես գիտակից հայորդիներ ենք, ուրեմն՝ այս յուշակոթողը մեր ապագան ճշդող եւ ուղին լուսաւորող քարեղէն փարոսն է։ Քարապաշտ ժողովուրդ չենք, բայց քարակերտ այս կոթողը պաշտելու այլաբանական մղումը ապրում է։ Ասիկա իւրաքանչիւր արժանապատիւ հայու պարտականութիւնն է։

Happy
Happy
0 %
Sad
Sad
0 %
Excited
Excited
100 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles