ՀԱՅԿԱԿԱՆ ԱՒԱՆԴԱԿԱՆ 13-ՐԴ ՆԱՒԱՊՏՈՅՏԸ «ՀԱՅԿԱԿԱՆ ՈՃՈՎ»

ՊԱՐՊԱՐԱ ՅԱՐՈՒԹԻՒՆԵԱՆ (թարգմանեց՝ ՆԱՆՕՐ ՊԱՐՍՈՒՄԵԱՆ) Կարծես կախարդական մթնոլորտ մըն էր...1100-էն աւելի հայեր Costa Cruise Lines-ի գեղեցիկ նաւը, Costa Atlantica-ն, բարձրացան: Costa Atlantica-ն շքեղ նաւ է, պատրաստուած հին ու դասական իտալական ոճով՝ վայելչօրէն զարդարուած: 13րդ Հայկական Աւանդական Նաւապտոյտը, հովանաւորուած Ամերիկայի Հայկական Մշակութային Ընկերութեան կողմէ, տեւեց մէկ շաբաթ, Յունուար 16-23, 2010, եւ սկիզբ առաւ Ֆորթ Լոտըրտէյլի նաւահանգիստէն: Նաւապտոյտը բարեբաստիկ առիթ մըն էր փախչելու հիւսիսային նահանգներու սառնամանիքէն ու ձիւնէն: Նաւապտոյտի հանդիպած վայրերու կարգին էին Միացեալ Նահանգներու »Վըրճին« Կղզիներէն Սէյնթ Թոմասը, Փուերթօ Ռիքոյի Սան Խուան քաղաքը, եւ Քայքոս Կղզիները: Բոլորս ալ անհամբեր կը սպասէինք արեւօտ ու հայկական, գեղեցիկ տեսարաններով, նոր դէմքերով, մշակութային ծրագիրներով, պարով, երաժշտութեամբ, կեր ու խումով, լի շաբաթ մը: Հայեր ժամանեցին աշխարհի չորս կողմերէն՝ Հայաստանէն, Արժանթինէն, Աւստրալիայէն, Գանատայէն, Անգլիայէն, Ֆրանսայէն, Յունաստանէն, Իտալիայէն, Իսրայէլէն, Լիբանանէն, Զուիցերիայէն, եւ Թուրքիայէն: Հայեր նաեւ եկած էին Մ.Նահանգներու գրեթէ ամէն նահանգներէն: Իւրաքանչիւր հիւր ստացաւ, այս առթիւ պատրաստուած յատուկ եռագոյն պայուսակը, եւ իրենց պաշտօնական թուղթերուն համար գրպանիկ մը՝ նուէր Ամերիկայի Հայկական Մշակութային Ընկերութեան եւ Travel Group International-ի կողմէ: Տարիներ իրար չտեսնելէ ետք, հայորդիներ իրենց ազգականներուն, բարեկամներուն, եւ դասընկերներուն գտան նաւէն ներս: Արտասուալից աչքերով, յուզումով ու ժպիտով, անոնք իրար վերագտան տարիներէ վերջ, այս Հայկական Աւանդական Նաւապտոյտի ընթացքին: Երեք միջոցներ կան նաւապտոյտը յաջողաբար վայելելու.- 1. Լման շաբաթ մը զուարճացէք, արեւուն ճառագայթներուն տակ, ամենօրեայ աղմուկէն ու շտապէն հեռու: 2. Տեղեկացէք ու վճռակամօրէն պաշտպանեցէք հայկական մշակոյթն ու աւանդութիւնը: 3. Հանդիպեցէք հին բարեկամներու, ու կերտեցէք նոր բարեկամութիւններ: Մէկ շաբաթ, մեր զանազան հարցերն ու տարբերութիւնները մէկդի դրած, մէկ ժողովուրդ, մէկ ազգ դարձանք, ու ստեղծեցինք »փոքր Հայաստան« մը Քարայիպեաններու շրջանէն ներս: Բոլոր հիւրերը ստացան Ամերիկայի Հայկական Մշակութային Ընկերութեան Աւանդական Նաւապտոյտի եռագոյն բանալի-քարտ: Այս քարտի միջոցաւ հիւրերը մուտք ստացան նաւուն ամէն զբօսանքներուն: Առանց այս քարտին հիւրերու մուտքը ելոյթներէն ներս արտօնուած չէր: Ամէն առտու օրուայ յայտագիրը կը յայտարարուէր իտալերէնով, ֆրանսերէնով, գերմաներէնով, եւ մեր հրճուանքին պատճառ՝ հայերէնով: Մեզ համար մեծ պատիւ էր Արքեպիսկոպոս Վաչէ Յովսէփեանի, եւ Ուստըրի նախկին քահանայ Վազգէն Պէքիարեանի ներկայութիւնը նաւէն ներս: Ամէն օր նաւուն կղերականութիւնը առաւօտեան պատարագը կատարեց, նաւուն աղօթարանէն ներս, որ միշտ լեցուն էր: Իսկ ամէն գիշեր, երկու երաժշտախումբեր, նաւուն զանազան սրահներէն մէկէն ներս նուագեցին: Ժոզէֆ Գրիգորեան եւ իր խումբը, ինչպէս նաեւ Առաւօտ նուագախումբը, Ճիմ Գզիրեանի, Արամ Յովակիմեանի, Խաչիկ Ճինկիրեանի, Ճոն Հարոթեանի, եւ Ռիչըրտ Պէրպէրեանի հետ: Շաբաթ երեկոյ »Բարի Գալուստ«ի ընդունելութիւն տեղի ունեցաւ, հիւրընկալութեամբ Ճորճ եւ Շաքէ Պասմաճեաններու, եւ Մարիա Դաւիթեանի: Նաւապտոյտի դեսպանները ներկայացուեցան, եւ շաբթուայ յայտագիրը յայտարարուեցաւ: Ապա, գեղարուեստական յայտագրի մը ընթացքին մասնակիցներ իրենց տաղանդները յայտնաբերեցին: Ամէն օր, նաւապտոյտի հիւրերը լողաւազանի “ափ”ին կրնային նստիլ, արեւադարձային այդ հաճելի օդը վայելելով: Ուրիշներ մարզանք ըրին, պինկօ խաղացին, դասախօսութիւններու ներկայ գտնուեցան, կամ հայկական շարժապատկերներ դիտեցին: Իսկ անոնց համար որ բնաւ իրենց սենեակներէն դուրս չելան, նաւապտոյտը իրենց անվերջ տրամադրեց հայկական երգի ու պարի յայտագիրներ, երկու տարբեր կայարաններու միջոցաւ: Թէքսասի Տալաս քաղաքի Մարկօ Գաֆթաճեանը հայկական պարի դասեր տուաւ, որոնց կարգին թամզարան, շուրջ պարը, հալեհը, եւ շատ մը ուրիշ ժողովրդական պարեր: Հիւրերը նոյնպէս առիթը ունեցան մասնակցելու թաւլուի եւ պլոթի մրցաշարքերու, Անդրանիկ Պուտագեանի եւ Ճորճ Պասմաճեանի կազմակերպութեամբ: Իսկ անոնք որոնք մարզական կարողութիւններով օժտուած էին՝ մասնակցեցան տարեկան կողովագնդակի մրցումներուն, Ճոն Ճէրիքեանի կազմակերպութեամբ: Յատուկ սեղան մը յատկացուած էր 2010-ի Հայկական Աւանդական Պտոյտներուն, Մարօ Ասատուրեանի հսկողութեամբ, ուր հայորդիներ առիթը ունեցան արձանագրուելու 15 օրեր տեւող Հայկական Աւանդական Պտոյտին դէպի Հայաստան, Յուլիս 18-էն Օգոստոս 1, 2010. Մասնակիցներ նաեւ կարելիութիւնը պիտի ունենան պտոյտի մը մասնակցելու դէպի Ղարաբաղ: »Հայրենիք«ի գրախանութը նոյնպէս զբաղած էր ամէն օր, ծախելով հայկական խտասալիկներ, խտատեսիլներ, գիրքեր, եւ յուշանուէրներ: Առաւօտները, Ամերիկայի Հայկական Մշակութային Ընկերութեան գրասեղանը պատրաստ էր օժանդակելու նաւապտոյտի հիւրերը: Այնքան որ ճոխ էր յայտագիրը՝ որոշում առնելը դժուար կը հանդիսանար: 13րդ Հայկական Աւանդական Նաւապտոյտին յայտագիրը գոհ կը պահէր ամէնքին: Կիրակի օր ընթրիքէն վերջ, ամուրիներու »Սինկըլզ-Մինկըլզ« երիտասարդական հաւաքոյթը տեղի ունեցաւ: Առաջին անգամ ըլլալով, ամէն օր AHC Club 39 Happy Hour կազմակերպուած էր : 21-39 տարեկան հայ երիտասարդ-երիտասարդուհիներ, աշխարհի ամէն կողմերէն, առիթը ունէին հանդիպելու եւ թերեւս… Այդ գեղեցիկ օրերէն մէկուն ընթացքին Ամերիկայի »Վըրճին« կղզիներէն մէկուն՝ Սէյնթ Թոմաս կղզիին ծովափն ու շուկան վայելեցինք: Երեկոյեան նաւ վերադառնալով Ամերիկայի Հայկական Մշակութային Ընկերութեան Կալա Քոքթէյլ հաւաքոյթին մասնակցեցանք, որ կազմակերպուած էր Հայկական Աւանդական Նաւապտոյտի Յանձնախումբին եւ »Թրավըլ Կրուփ Ինթըրնաշընըլ«-ի կողմէ: Այդ երեկոյ, ընթրիքին, հիւրերը համտեսեցին հայավայել ճաշեր ինչպէս հոմմուս, թապպուլէ, պէօրէկ, ոչխարի եւ հաւու միսով խորոված, պուլղուրով փիլաւ, աղցան, եւ փախլաւայ: Յաջորդ առաւօտ հասանք Փուէրթօ Րիքօի Սան Հուան քաղաքը: Հինգշաբթի օր, Անն Սամուէլեան եւ Հայկական Աւանդական Նաւապտոյտի Յանձնախումբը կազմակերպեցին »Հայկական Փառատօնի Օր«, լողաւազանային հաւաքոյթ մը: Մրցանակներ տրուեցան լաւագոյն եռագոյն հագուստին, կարմիր, կապոյտ, նարնջագոյն: Ներկուած երեսներով, պարուսոյց Մարկօ Գաֆթաճեանի “աշակերտները” այդ շաբթուայ ընթացքին իրենց սորված պարերը ներկայացուցին ներկաներուն, որոնց կարգին շուրջ պարը, թամզարան, հալեհը եւ ուրիշ պարեր: Հայկական պարի մրցում ալ տեղի ունեցաւ, մրցանակներ տրուեցան լաւագոյն պարողներուն: Այս արդէն իսկ սովորութիւն դարձած է, այնպէս որ նաւապտոյտի մասնակիցներէն ոմանք նոյնիսկ պատրաստ եկած էին` մինչեւ իսկ պարի տարազներով: Այդ օր, այս հայկական մթնոլորտին իր մասնակցութիւնը բերաւ նոյ նիսկ նաւուն ճաշարանը, հայկական ճաշեր հրամցնելով: Կէսօրէ վերջ, Քայքօս Կղզիին ծովափը վայելեցինք: Նաւապտոյտին ընթացքին հետեւեալ ձեռնարկները տեղի ունեցան.- -Համազգային Մշակութային Միութեան ձեռնարկ.- խտասալիկ մը ցուցադրուեցաւ՝ Հայաստանի մէջ տեղի ունեցած Համազգայինի 80-ամեակին առիթով. - Հայ Օգնութեան Միութեան ձեռնարկ.- Ընդունելութիւն եւ ապա միութեան 100-ամեակին առիթով ներկայացում մը. - Պոսթընի Սայաթ Նովա Պարախումբի ելոյթ, Աբօ Աշճեանի կազմակերպութեամբ. - Հայաստան Հիմնադրամի հետ զրոյց.- ինչպէս կարելի է շէնցնել Հայաստանն ու Արցախը. - Հայ Դատի Յանձնախումբի ատենապետ Քէն Խաչիկեանը Հայ-Թուրք արձանագրութիւններուն մասին զեկոյց մը ունեցաւ. - Մարի Թէրզեան իր գիրքը ներկայացուց. Ան հեղինակն է “պանդուխտին դուստրը” (“The Immigrantÿs Daughter”) գիրքին. - Արձանագրութիւններուն մասին կլոր սեղան զրոյց մը տեղի ունեցաւ, որմէ ետք կատարուեցաւ հարց-պատասխան: - Անգլիայէն երգիծաբան Գեւ Օրգեանը ելոյթ մը ունեցաւ, դաշնամուրի ընկերակցութեամբ. - Վարդանանց Ասպետներ եւ Դստրեր կազմակերպութիւնը ընդունելութիւն-ներկայացում մը կազմակերպեց անդամներու եւ բարեկամներու համար. - »Արմինիըն Ուիքլի«ի 75րդ եւ »Հայրենիք«ի 110րդ տարեդարձներուն առթիւ ընդունելութիւն եւ ներկայացում մը կազմակերպուած էր՝ թերթին անցեալին եւ ներկային մասին. -Զրոյց հայ-թուրք արձանագրութիւններուն, եւ անոնց հետեւանքները Արցախի շրջանէն ներս: Դասախօս՝ Անդրանիկ Գասպարեան. - Հեղինակ Սօսի Գեւոնեան իր գիրքը “Աճուրդի Հոգիներէն Առաջ” (“Prior to the Auction Souls”) ներկայացուց. - Պերճ եւ Թէրի Մինասեանները Հայաստանի Վանաձոր շրջանի կարօտեալ ընտանիքներու օժանդակութեան ծրագիր մը ներկայացուցին (The Humanitarian Outreach Foundation). - ԺոզԷֆ Գրիգորեան եւ իր երգչախումբը ելոյթ մը ունեցան՝ ազգային տոհմիկ երգերու երեկոյ մը.

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է

ՀԱՅԿԱԿԱՆ ԱՒԱՆԴԱԿԱՆ 13-ՐԴ ՆԱՒԱՊՏՈՅՏԸ «ՀԱՅԿԱԿԱՆ ՈՃՈՎ»

This story is FREE for you...

Leave a Reply

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

This story is FREE for you...

Leave a Reply

Նմանատիպ Յօդուածներ

Հայկազեան Համալսարանի Մէջ Գիտաժողով՝ «Վկայութեան Եւ Վերականգնումի Ցանցեր. Միսիոնարական Շարժումը Եւ Հայ Աւետարանական Համայնքը»

ՀԻՒՍԻՍԱՅԻՆ ԱՄԵՐԻԿԱՅԻ ԵՐԵՔ ԹԵՄԵՐՈՒ ՀՈԳԵՒՈՐԱԿԱՆԱՑ ՀԱՄԱԳՈՒՄԱՐ

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է