0
0
Չորեքշաբթի, Յունիս 16-ին, Շիրակի մարզի Գիւմրի քաղաքին մէջ տեղի ունեցաւ «Հայաստան» դաշինքի նախընտրական հանրահաւաքը:
Գիւմրիի թատերական հրապարակին վրայ տեղի ունեցաւ «Հայաստան» դաշինքի հանրահաւաք-հանդիպումը ընտրողներուն հետ:
Շիրակի մարզի Արթիկ, Մարալիկ, Աշոցք եւ Ամասիա համայնքներուն մէջ ընտրողներուն հետ ունեցաւ հանդիպումներ եւ հաւաքներ:
Աշոցքի մէջ «Հայաստան» դաշինքի քարոզարշաւի ժամանակ Շիրակի նախկին մարզպետ, Հ.Յ.Դ. Հայաստանի Գերագոյն մարմինի անդամ Արթուր Խաչատրեան ըսաւ. «Երկրին համար ճակատագրական պահ է: Հասած ենք շատ կարեւոր փուլի, որմէ ետք պիտի որոշուի` Հայաստան պիտի ունենա՞նք, թէ՞ ոչ, մենք զմեզ պիտի վերագտնե՞նք, պիտի դառնա՞նք հզօր պետութիւն, որուն դիմաց բոլորը պիտի դողան, պիտի դառնա՞նք շրջանին մէջ մեծ խաղացող, թէ՞ շարքային», աւելցնելով, որ պէտք է ճիշդ ընտրութիւն կատարել` մեր ձայնը տանք այն քաղաքական գործիչներուն, որոնք իրենց ամբողջ գործունէութեան ընթացքին ապացուցած են, որ ընդունակ են աշխատելու, որ իրենց տուած խոստումները կատարած են. «Պարզապէս ետ նայեցէք, տեսէք` ո՞ր խոստումը կատարած է այս իշխանութիւնը», ըսաւ Արթուր Խաչատրեան:
Մարալիկի մէջ ընտրողներուն հետ հանդիպումին Հայաստանի Հանրապետութեան երկրորդ նախագահ, «Հայաստան» դաշինքի առաջնորդ Ռոպերթ Քոչարեան ըսաւ. «Մենք այն ժամանակ (1998-2008) շատ աւելի մեծ գումարներ ներդրած էինք աղէտի գօտիին մէջ: Երեւանի մէջ յաջողեցանք այնպիսի միջավայր ստեղծել շինարարութեան տեսանկիւնէն, որ մասնաւոր ներդրումները մեծ հոսք ունեցան, եւ Երեւանի մէջ մենք պետական միջոց չենք ներդրած: Օրինակ` ամբողջ Հիւսիսային պողոտայի շինարարութիւնը մասնաւոր միջոցներով էր: Հիմա մեր ծրագիրներուն մէջ ունինք տարածքներու համաչափ զարգացում եւ այստեղ մենք պէտք է փորձենք ամէն ինչ ընել, որ ո՛չ միայն պիւտճէական միջոցներով մենք կարենանք ինչ որ բան զարգացնել, այլ նաեւ մեր հարկային քաղաքականութեան, որոշակի խրախուսումներով կամ անձնական կապերով այդ մասնաւոր ներդրումներու հոսքը ուղղորդել դէպի տարբեր տարածքներ: Ատիկա նուրբ աշխատանք կը պահանջէ: Պէտք է այնպիսի պայմաններ ստեղծել, որ ներդրողը գայ եւ բացի Երեւանէն այլ վայրերու մէջ ալ ներդրում կատարէ: Ասիկա պիտի ըլլայ մեր նպատակներէն մէկը»:
Արարատի մարզի Արտաշատ քաղաքին մէջ տեղի ունեցաւ «Հայաստան» դաշինքի նախընտրական հանրահաւաքը: Մինչ այս` դաշինքը եղած է Մասիս, Աւշար, Արարատ եւ Վեդի համայնքներուն մէջ:
Մասիսի ընտրողներուն հետ հանդիպումին ընթացքին Հայաստանի Հանրապետութեան երկրորդ նախագահ, «Հայաստան» դաշինքի առաջնորդ Ռոպերթ Քոչարեան յայտարարեց, թէ` «ակնյայտ է, որ այս ընտրութիւններուն հիմնական պայքարը տեղի կ՛ունենայ «Հայաստան» դաշինքի եւ իշխող քաղաքական ուժին միջեւ», աւելցնելով, որ ճիշդ ընտրութիւն կատարելու համար զգացական բաժինը պէտք է մէկ կողմ դնել եւ փորձել հասկնալ իրավիճակը:
Հ.Յ.Դ. Հայաստանի Գերագոյն մարմինի անդամ Իշխան Սաղաթէլեան ըսաւ. «Մենք կ՛աշխատինք ո՛չ զայրանալ, ո՛չ ալ զարմանալ վարչապետի աթոռը զբաղեցնողի գործողութիւններուն վրայ, որովհետեւ գիտենք, թէ որո՛ւն հետ գործ ունինք: Մենք անընդհատ կ՛ամչնանք եւ կ՛ափսոսանք, որ Նարեկացի, Նժդեհ ու Դրօ, Վարդան Դուշման ու Թաթուլ ծնած ազգը, ժողովուրդը կը ղեկավարէ ծաղրածու, խեղկատակ մը, որ երկիրը հասցուցած է անդունդի եզրին ու կը շարունակէ քաջ Նազարի բախտով արշաւը մեր գիւղերուն մէջ: Կը շարունակէ սպառնալ համայնքներու եւ հիմնարկներու ղեկավարներուն, Հայաստանի արժանապատիւ ու գիտակից քաղաքացիներուն վրայ»:
