ՀԱՅԱՍԷՐ ԺԱՆ ԺՈՐԵՍԻ ՄԱՀՈՒԱՆ 100-ՐԴ ՏԱՐԵԼԻՑԻՆ ԱՌԹԻՒ.- ԱԶԳԱՅԻՆ ԺՈՂՈՎԻ ԸՆԿԵՐՎԱՐԱԿԱՆ ՊԱՏՈՒԻՐԱԿՈՒԹԻՒՆ ՄԸ Կ՛ԱՅՑԵԼԷ ՀԱՅԱՍՏԱՆ

0 0
Read Time:3 Minute, 46 Second

p3 ja  ԵՐԵՒԱՆ.- Հայ Յեղափոխական Դաշնակցութեան (Արեւմտեան Եւրոպա եւ Հայաստան) եւ Ֆրանսայի Հայ Դատի յանձնախումբի հրաւէրով, Հայաստան ժամանեց Ֆրանսայի Հանրապետութեան Ազգային ժողովի ընկերվարական խումբի պատուիրակութիւնը, գլխաւորութեամբ խմբակցութեան ղեկավար պրն Պրիւնօ Լը Ռուի: Պատուիրակութեան պիտի ընկերակցին Հայ Յեղափոխական Դաշնակցութեան Արեւմտեան Եւրոպայի Կենտրոնական կոմիտէի եւ Ֆրանսայի հայ համայնքի ներկայացուցիչներ, գլխաւորութեամբ Հ.Յ.Դ. Արեւմտեան Եւրոպայի Կենտրոնական Կոմիտէի ներկայացուցիչ Մուրատ Փափազեանի:

Հայասէր ֆրանսացի պատմաբան Ժան Ժորեսի մահուան հարիւրերորդ տարելիցին առթիւ, կազմակերպուած է այս այցելութիւնը:
Ֆրանսական պատուիրակութեան այցելութիւնը կատարուեցաւ համագործակցութեամբ` Հայաստանի Հանրապետութեան Ազգային ժողովի եւ Հայոց Ցեղասպանութեան թանգարան-հիմնարկի եւ աջակցութեամբ` Ֆրանսական համալսարանի եւ Երեւանի “Հրայր Մարուխեան“ հիմնադրամին:
Ֆրանսական պատուիրակութեան պաշտօնական հանդիպումներուն կը մասնակցին Հ.Յ.Դ. Հայաստանի Գերագոյն Մարմնի ներկայացուցիչ Արմէն Ռուստամեան, Հ.Յ.Դ. Բիւրոյի անդամ, եւ Միջազգային Ընկերվարականի փոխնախագահ Մարիօ Նալպանտեան եւ Հ.Յ.Դ. Բիւրոյի Հայ Դատի եւ քաղաքական հարցերի գրասենեակի պատասխանատու` Կիրօ Մանոյեան:
Նշենք թէ, 2014 թուականը Ֆրանսայի մէջ հռչակուած է Ժան Ժորեսի տարի:
Ֆրանսայի Խորհրդարանական ընկերվարական պատուիրակութեան կազմն է.-
Պրիւնօ Լը Ռու, խմբակցութեան Նախագահ եւ պատուիրակութեան ղեկավար.
Էրուան Պինէ, իրաւական հարցերու յանձնաժողովի անդամ.
Ֆրանսուազ Տիւմա, ընկերվարական հարցերու յանձնաժողովի անդամ.
Լիւք Կ՚արունաս, Ալֆորովիլի քաղաքապետ, ընկերվարական կուսակցութեան արտաքին յարաբերութիւններու պատասխանատու.
Նաթալի Նիսոն, իրաւական հարցերու յանձնաժողովի անդամ.
Փասքալ Պոպելէն, իրաւական հարցերու յանձնաժողովի անդամ.
Ռընէ Ռուքէ, Ֆրանսա-Հայաստան խորհրդարանական բարեկամութեան խումբի նախագահ, Եւրոխորհրդարանէն ներս, ֆրանսական պատուիրակութեան ղեկավար.
Վենսան Տիւքլեր, պատմաբան, Ժան Ժորեսի գործունէութեան ուսումնասիրող, դասախօս` Հասարակական գիտութիւններու մասին.
Հայաստանի վարչապետ Յովիկ Աբրահամեան երէկ ընդունեց Ֆրանսայի Ազգային ժողովի Ընկերվարական խմբակցութեան նախագահին գլխաւորած պատուիրակութիւնը:
Ողջունելով հիւրերը, վարչապետը վստահութիւն յայտնեց, որ ֆրանսացի խորհրդարանականներուն այցելութիւնը կը նպաստէ հայ-ֆրանսական բազմաոլորտ յարաբերութիւններու ամրապնդման եւ ընդլայնման: “Մենք մեծապէս կը շեշտենք Ֆրանսայի հետ քաղաքական, տնտեսական եւ այլ մարզերու մէջ յարաբերութիւններու զարգացումը: Ամէն ինչ պիտի ընենք, որպէսզի մեր երկկողմանի կապերը աւելի զարգանան, որուն համար կայ մեծ ներուժ“, նշեց վարչապետը: Ընդգծելով, որ ներկայիս Հայաստանի մէջ յաջող գործունէութիւն կ՛ունենայ ֆրանսական 180 ընկերութիւն, Յովիկ Աբրահամեան յոյս յայտնեց, որ յառաջիկային անոնց թիւը պիտի աւելնայ: Վարչապետը եւ Պրիւնօ լը Ռու կարծիք յայտնեցին, որ Հայաստան կրնայ բեմ հանդիսանալ ֆրանսական ընկերութիւններու համար եւրասիական շուկայ մուտք գործելու: Ըստ Ֆրանսայի Ազգային ժողովի Ընկերվարական խմբակցութեան նախագահին, իր երկիրը շահագրգռուած է Հայաստանի զարգացումով եւ պատրաստ է հետագային եւս համակողմանի աջակցութիւն ցուցաբերելու այդ գործին: Անդրադառնալով Հայոց Ցեղասպանութեան 100-ամեակին` Պրիւնօ լը Ռու ըսաւ. “Ինչպէս Հայաստանի մէջ նշեց Ֆրանսայի նախագահ Ֆրանսուա Հոլանտ, մենք ունինք քաղաքական կամք ամբողջացնելու Հայոց ցեղասպանութիւնը ճանչցող օրէնքը, որուն շնորհիւ կը նախատեսուի քրէական հետապնդում բոլոր անոնց համար, որոնք կը ժխտեն Հայոց ցեղասպանութեան փաստը: Վստահ ենք, որ Ցեղասպանութեան ճանաչումը ունի կանխարգելիչ դերակատարութիւն եւ խաղաղութեան հաստատման համար կարեւոր է անոր ժխտումը բացառելը“: Պրիւնօ լը Ռու Հայոց Ցեղասպանութեան հարիւրամեակի նախօրեակին նաեւ կարեւոր նկատեց հայ-ֆրանսական միջխորհրդարանական կապերու սերտացումը` միջազգային հանրութեան շրջանակին մէջ անհրաժեշտ աշխատանքներ տանելու համար: p3 ja2
Յովիկ Աբրահամեան շնորհակալութիւն յայտնեց ֆրանսացի երեսփոխաններուն` իրենց դիրքորոշումին համար եւ ընդգծեց, որ եթէ Հայոց Ցեղասպանութեան նման ոճրագործութիւնները ժամանակին չեն դատապարտուիր, ապա կ՛ունենան կրկնուելու հաւանականութիւն: Զրուցակիցները նաեւ անդրադարձան Լեռնային Ղարաբաղի տագնապին եւ ընդգծեցին անոր լուծման անհրաժեշտութիւնը խաղաղ բանակցութիւններու միջոցով, ԵԱՀԿ-ի Մինսքի խմբակին ծիրին մէջ: Կողմերը նաեւ քննարկեցին հայ-ֆրանսական յարաբերութիւններուն առնչուող հրատապ հարցեր:
Ֆրանսայի Հանրապետութեան Ազգային ժողովի Ընկերվարական կուսակցութեան խմբակցութեան նախագահ Պրիւնօ լը Ռուի գլխաւորած պատուիրակութեան անդամները այցելեցին Ծիծեռնակաբերդի Հայոց Ցեղասպանութեան յուշահամալիր: Ֆրանսացի խորհրդարանականները ծաղկեպսակ եւ ծաղիկներ զետեղեցին 1915 թուականի Հայոց ցեղասպանութեան յուշակոթողին եւ լռութեամբ ու խոնարհումով յարգեցին մէկուկէս միլիոն անմեղ զոհերու յիշատակը: Հիւրերը նաեւ այցելեցին Հայոց Ցեղասպանութեան թանգարան-հիմնարկ:
Հայաստանի Ազգային ժողովի Հ.Յ.Դ. խմբակցութեան ղեկավար Արմէն Ռուստամեան, քարտուղար Աղուան Վարդանեան եւ խմբակցութեան անդամ Արծուիկ Մինասեան տեսակցեցան Ֆրանսայի Ազգային ժողովի Ընկերվարական կուսակցութեան խմբակցութեան նախագահ Պրիւնօ լը Ռուի գլխաւորած պատուիրակութեան անդամներուն հետ: Ողջունելով հիւրերուն այցելութիւնը Հայաստան` Արմէն Ռուստամեան իբրեւ բարեկամական եւ ջերմ բնորոշեց Հայաստանի եւ Ֆրանսայի յարաբերութիւնները, որոնց զարգացման համար լուրջ գործօն հանդիսացած են երկու ժողովուրդներուն միջեւ պատմամշակութային դարաւոր կապերը եւ Ֆրանսայի մէջ հայկական մեծ եւ ազդեցիկ համայնքի մը գոյութիւնը: Ան ողջունեց ֆրանսացի հասարակական-քաղաքական գործիչ, ընկերվարական, մեծ հայասէր Ժան Ժորեսի մահուան 100-ամեակը Հայաստանի մէջ նշելու որոշումը: Ռուստամեան նշեց, որ Դաշնակցութիւնը իբրեւ ընկերվարական գաղափարներու կրող, կարեւոր կը նկատէ Ֆրանսայի Ընկերվարական կուսակցութեան հետ համագործակցութիւնը: Ան երախտագիտութիւն յայտնեց Ֆրանսայի իշխանութիւններուն, որոնք միշտ եղած են Հայաստանի կողքին եւ պաշտպանած են հայկական հարցը: Պրիւնօ լը Ռուն կարեւոր նկատեց երկու գաղափարակից կուսակցութիւններու համագործակցութեան առաւել խորացումը տարբեր մարզերու մէջ, փորձառութեան փոխանակումները: Այս ծիրէն ներս, Աղուան Վարդանեան նշեց, որ երկու կուսակցութիւնները յառաջիկային կրնան համագործակցութեան որոշ ձեւաչափեր քննարկել եւ պատրաստել համագործակցութեան փաստաթուղթ: Ռուստամեան տեղեկացուց, որ իրենց կուսակցութիւնը յուզող հիմնական խնդիրները արտացոլուած են 7 կէտէ բաղկացած փաստաթուղթին մէջ, որուն ծիրին մէջ եւս կարելի է համագործակցութեան եզրեր գտնել: Արծուիկ Մինասեան ընդգծեց փորձառութեան փոխանակումը փտածութեան դէմ պայքարին, սահմանադրական բարեփոխումներուն եւ շարք մը այլ մարզերու մէջ: Հանդիպման ընթացքին կողմերը նաեւ անդրադարձան Հ.Յ.Դ.-ի գաղափարախօսութեան, անցած ուղիին, Արցախի հիմնախնդիրին, Հայոց Ցեղասպանութեան հարիւրամեակին ընդառաջ գոյութիւն ունեցող խնդիրներուն, հայ-ֆրանսական դարաւոր բարեկամութեան եւ փոխադարձ հետաքրքրութիւն ներկայացնող շարք մը հարցերու:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles