Նիւ Ճըրզի.- «Համազգային»ի Մանկամսուրի Բացման Տօնակատարութիւնը

0 0
Read Time:3 Minute, 31 Second

unnamed-10

Անի Փանոսեան – Մուրատեան

Շաբաթ, Հոկտեմբեր 15, 2016-ին տեղի ունեցաւ Համազգայինի Արեւելեան Շրջանային Վարչութեան հովանաւորութեամբ գործող «Merry-Go-Round» մանկամսուրին (Թինէք, Նիւ Ճըրզի) պաշտօնական բացումը։ Մանկամսուրը կը ծառայէ տեղւոյն համայնքին, նպատակ ունենալով նիւթական միջոցներ ապահովել Համազգայինին։ Բացումը հովանաւորեց Թեմիս Առաջնորդ Օշական Արք. Չօլոյեան, մասնակցութեամբ՝ Նիւ Եորքի Ս. Լուսաւորիչ Մայր եկեղեցւոյ հովիւ Տ. Մեսրոպ Քհն. Լագիսեանի եւ Նիւ Ճըրզիի Սրբց. Վարդանանց Եկեղեցւոյ հովիւ Տ. Յովնան Քհն. Պօզոյեանի։
unnamed-1unnamed-2unnamed-3

 

 

 

 

 

Բացման ներկայ էին հիւրեր, անձնակազմի անդամներ, հիմնադիրներ, նուիրատուներ, ինչպէս նաեւ հայկական կազմակերպութիւններու ներկայացուցիչներ։ Հոն էին Ուաշինկթընէն Հ.Յ.Դ.-ի Կեդրոնական Կոմիտէի ներկայացուցիչ Յովսէփ Աւագեան, Համազգայինի Կեդրոնական Վարչութեան ներկայացուցիչ Հրայր Պարոնեան, Նիւ Եորքի Արմէն Գարօ Կոմիտէի ներկայացուցիչ Արմէն Գաբրիէլեան, Ուաշինկթընէն՝ Համազգայինի Շրջանային Վարչութեան նախկին Ատենապետ Տոքթ. Տիգրան Գազանճեան, Հ.Օ.Մ.-ի Արեւելեան Շրջանայինի ներկայացուցիչներ Թալին Տաղլեան, Սանտրա Վարդանեան եւ Սոնիա Պզտիկեան, Համազգայինի Նիւ Եորքի մասնաճիւղի վարչութեան անդամ Տիկին Սօսի եւ Տոքթ. Կրէկ Գազանճեանները, Հ.Մ.Ը.Մ.-ի Շրջանային Վարչութեան ներկայացուցիչներ, Ֆիլատելֆիայի Համազգայինի ներկայացուցիչներ՝ Լենա Օհաննէսեան եւ Քարի Ղեզարեան: Լոս Անճելըսէն ներկա էին դերասան-բեմադրիչ Վահիկ Փիրհամզէի եւ դերասան, գրող եւ արուեստագէտ Վահէ
Պերպէրեան, որոնց ներկայութիւնը մեծապէս գնահատուեցաւ բոլորին կողմէ։
unnamed-4unnamed-5unnamed-6

 

 

 

 

 

Հանդիսութեան բացումը կատարեց Համազգային Արեւելեան Շրջանային Վարչութեան ատենապետ Արեւիկ Գաբրիէլեանը եւ հրաւիրեց օրուան հանդիսավար՝ Համազգայինի վաղեմի անդամ եւ Նիւ Ճըրզիի մասնաճիւղի Ատենապետ Անի Չաղլասեանին, որը նաեւ այս մանկամսուրի հիմնադիրներէն մէկն է։ Շրջանային Վարչութեան փոխ-ատենապետ Յասմիկ Աբրահամեան իր խօսքով ներկայացուց թէ ինչպէ՞ս մանկամսուրը հինմելու գաղափարը ծնունդ առած էր պարզ ընկերային զրոյցի մը ընթացքին, ուր կը քննարկուէր Համազգայինը նիւթապէս ինքնաբաւ դարձնելու հարցը։ Երազով մը սկսած այս գաղափարը երկու տարի ետք արդէն դարձած էր իրականութիւն, շնորհիւ հիմնադիրներուն եւ նուիրատուներուն հաւատքին ու յարատեւ աշխատանքին։

unnamed-9
unnamed-7unnamed-8

 

 

 

 
Այս հանդիսութեան ընթացքին պարգեւատրուեցան Սօսի Արլիա եւ փաստաբան Հանի Խուրի, որոնք երկու տարիէ ի վեր մեծ օժանդակութիւն ներկայացուցած են մանկամսուրի աշխատանքներուն, իրենց մասնագիտական փորձառութիւնը ի սպաս դնելով։
Ապա գնահատագրեր փոխանցուեցան Մանկամսուրի հիմնադիր-նուիրատուներուն, որոնք մեծ հաւատքով եւ վստահութեամբ իրենց նիւթական եւ բարոյական ներդրումը բերած են։
Խօսք առաւ Համազգայինի Կեդրոնական Վարչութեան անդամ Հրայր Պարոնեան, որուն արժանաբար կարելի է համարել Մանկամսուրին հիմնադիրն ու հոգատար հայրը։ Ան գնահատեց անձնակազմին ու աջակցողներուն աշխատանքը, որոնք միասնաբար աշխատելով իրականացուցին այս ծրագիրը։

Բացման ժապաւէնը միասնաբար կտրեցին Արեւիկ Գաբրիէլեան եւ Հրայր Պարոնեան։ Ապա ներկաները ուղղուեցան ներս, ուր Սրբազան Չօլոյեանը եւ Քահանայ Հայրերը օրհնեցին կառոյցը, ապա Սրբազան Հայրը փոխանցեց իր պատգամը։

Հիւրերը կառոյցին սենեակները պտտելէ ետք ուղղուեցան շրջաբակ, ուր հիւրասիրուեցան համադամ ուտելիքներով։
Ապա գեղարուեստական յայտագիրով հանդէս եկան Մեղրի Թիւթիւնճեան (սրինգ) եւ Վան Մուրատեան (թաւջութակ), որոնք կատարեցին հայկական եւ դասական ստեղծագործութիւններ։   1
«Մեծ ուրախութեամբ կը պաշտօնավարեմ այս մանկամսուրէն ներս, որ դարձած է իմ երկրորդ տունս։ Երեխաներուն հետ աշխատիլը ուրոյն հաճոյք մը կը պատճառէ ինծի։ Անոնց անմեղ ու անկեղծ արտայայտութիւնները առօրեաս կը գեղեցկացնեն ու հոգեկան մեծ գոհունակութիւն կը պարգեւեն։ Իրենց հետ ամէնօրեայ շփումս  կ՛արտօնէ ծանօթանալ մանկական աշխարհի զանազան յատկանիշերուն եւ անհատական տարբերութիւններուն։ Ուստի այս հարուստ փորձառութիւնը ինծի առիթ կ՚ընծայէ զարգացնելու մասնագիտական եւ անձնական կարողութիւններս»,
կ՚ըսէ Ֆլորիա Քէօշկերեան, որ Համազգայինի կողմէ նշանակուած վարիչ-տնօրէնն է մանկամսուրին եւ մաս կը կազմէ Համազգայինի Նիւ Ճըրզիի մասնաճիւղի վարչութեան կազմին։

Սօսի Արլիա, որ մասնագիտութեամբ մանկամսուրներու վարիչ է եւ տարիներէ ի վեր կը վարէ իր անձնական մանկամսուրները Նիւ Ճըրզիի մէջ, իր  աջակցութիւնը ներկայացուց Համազգայինին այս աշխատանքին, որուն համար գնահատուեցաւ բացման հանդիսութեան ընթացքին։ Ան այսպէս արտայայտուեցաւ.- «Այս մանկամսուրի ծրագիրը իրականացնելու ժամանակ առիթը ունեցայ իմ մասնագիտական օժանդակութիւնս տրամադել Համազգայինին՝ որ պսակուեցաւ շատ դրական գործակցութեամբ մը։ Իմ յարաբերութիւնս Համազգայինի հետ բաւական հին է։ Տակաւին մանկութեանս տարիներուն երբ Պէյրութ կ՚ապրէի, յաճախած եմ Համազգայինի կրթական օճախը եւ հոնկէ շրջանաւարտ եղած եմ։ 2Մաս կազմած եմ Համազգայինի Լիբանանաի պարախումբին։ Իմ երախտագիտութիւնս մատուցելու պատեհ առիթը եկաւ, երբ քանի մը տարի առաջ հեռաձայն ստացայ Համազգայինի անդամներէն, որոնք յայտնեցին թէ կը նախատեսեն մանկամսուր մը գնել զայն ծառայեցնելու որպէս եկամուտի աղբիւր Համազգայինին եւ իմ աջակցութիւնս խնդրեցին։ Համաձայնեցայ։ Հանդիպումներ ունեցանք հիմնադիր յանձնախումբին հետ եւ ըստ կարիքի ներկայացուցի իմ ծառայութիւններս։ Այս փորձառութեան ընթացքին միշտ հիացմունքով դիտեցի յանձնախումբի անդամներուն անսակարկ նուիրումը։ Անոնցմէ շատերուն ծանօթ էի տարբեր կազմակերպութիւններէ։ Այս համագործակցութիւնը ամրապնդեց իրենց հանդէպ ունեցած յարգանքս եւ հիացումս իրենց ծառայութեան ոգիին։ Ինծի համար մեծ ուրախութիւն էր առիթը ունենալ աշխատելու մանկամսուրին վարիչ-տնօրէն ֆլորիա Գասպարաեանին հետ, որ մեծ դեր ունեցաւ մանկամսուրի յաջողութեան մէջ։ Ան՝ ժպիտը դէմքէն անպակաս, միշտ պատրաստ է անխնայ աշխատելու եւ վերցնելու մեծ պատասխանատուութիւններ։ Այսօր այս ծրագիրը իրականացած է շնորհիւ այս անդամներու նուիրումին։ Յոյսով եմ որ ան դառնայ պտղատու եւ անոր բարիքները նոր ներդրումներու առիթ ստեղծեն գալիք սերունդներուն համար»:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles