Կործանարար Երկրաշարժի Հետքերով

0 0
Read Time:2 Minute, 0 Second

Դետկեմբեր 7, 1988-ին Հայաստանի մէջ տեղի ունեցաւ աւերիչ երկրաշարժը, որ ընդգրկեց հանրապետութեան հիւսիսային եւ հիւսիսարեւելեան շրջանները, անոր տարածքին մօտաւորապէս քառասուն առ հարիւրը: Հաշուած վայրկեաններու ընթացքին լրիւ կամ մասնակի աւերակ դարձան Սպիտակ, Լենինական, Կիրովական, Ստեփանաւան քաղաքները, Սպիտակի, Ախուրեանի, Գուգարքի, Արագածի, Կալինինոյի, Ստեփանաւանի շրջաններու հարիւրէն աւելի գիւղեր ու բնակավայրեր:
Կործանարար երկրաշարժէն 33 տարի ետք տակաւին անտուն մնացածներ կան աղէտի գօտիին մէջ:
33 տարուան մէջ միջազգային բազմատեսակ օգնութիւններ ուղղուեցան Հայաստան՝ աղէտի գօտի, կառավարական ծրագրերուն մէջ աղէտի գօտին վերականգնելու հազարաւոր թուղթեր ստորագրուեցան, սակայն Կիւմրիի, Վանաձորի, Սպիտակի եւ երկրաշարժէն տուժած յարակից բնակավայրերուն մէջ տակաւին տնակային աւաններ կան:
Զոհուեցաւ 25 հազարէն աւելի մարդ, 500 հազարը մնաց անօթեւան: Դադրեցան գործել 170 արդիւնաբերական ձեռնարկութիւններ, շուրջ 1200 անասնապահական շինութիւններ աւերուեցան: Հայաստանի տնտեսութեան հասցուած վնասը կազմեց 13 միլիառ ռուբլի:
Այս պատահածը բոլոր կառավարութիւններուն ամօթն ու խարանն է, որ այսօր՝ երկրաշարժէն երեսուներեք տարի անց, քաղաքակիրթ նկատուող 21-րդ դարուն, կրկին կ՚աղաղակէ:
Երկրաշարժի առաջին ժամերէն սփիւռքի հայութիւնը համախմբուեցաւ եւ բազմակողմանի օգնութիւն ցոյց տուաւ իր հայրենակիցներուն: Անոնց կողմէ ստեղծուեցան «Ս․Օ․Ս․ Արմենի», «Ազնաւուրը Հայաստանին» եւ տասնեակ այլ կազմակերպութիւններ: Բազմաթիւ սփիւռքահայեր շտապեցին հայրենիք` իրենց հետ բերելով սննդամթերք, հագուստ, դեղորայք: Անոնցմէ շատեր` բժիշկներ, հոգեբաններ, շինարարներ, ճարտարապետներ, մնացին Հայաստան եւ անմիջականօրէն մասնակցեցան փրկարարական եւ վերականգնողական աշխատանքներուն:
Այդ օրերու Խորհրդային Միութեան ղեկավար Կորպաչովը դադրեցուց իր պաշտօնական այցը Միացեալ Նահանգներ եւ եկաւ Հայաստան: Իսկ երկրաշարժի ճիշդ յաջորդ օրը Մոսկուայէն Հայաստան ժամանեց յատուկ յանձնաժողովը` Խորհրդային Միութեան նախարարներու խորհուրդի նախագահ Ռիժքովի ղեկավարութեամբ: Յանձնաժողովը հոգատարութեամբ ու մեծ եռանդով կազմակերպական վիթխարի աշխատանք կատարեց ազգաբնակչութեան օգնութիւն ցոյց տալու, աղէտի հետեւանքները վերացնելու համար:
Օգնութեան հասան հարիւրաւոր փրկարարներ եւ բժիշկներ: Խորհրդային Միութեան բոլոր հանրապետութիւնները երկրաշարժի առաջին ժամերէն սկսան Հայաստան տեղափոխել` դեղորայք, բուժսարքաւորումներ, շինարարական սարքաւորումներ, վրաններ, սննդամթերք եւ ապա` շինարարական աշխատանքներ կատարել:
Որքան ալ որ աղէտի գօտի արտայայտութիւնը փորձեն դուրս մղել մեր բառապաշարէն, Շիրակի եւ Լոռիի բազմաթիւ հատուածներ տակաւին այդ պատկերը ունին: Ամէն տարի, երկրաշարժին օրը, Կիւմրին, Սպիտակը, Վանաձորը, միւս գիւղերը աւելի տխուր կ՚երեւին: Երկրաշարժէն տուժածներուն յիշատակին կառուցուած յուշակոթողները լեցուն են այցելուներով, գերեզմանները՝ ուր յուղարկաւորուած են զոհերը, խունկի եւ մոմի ծուխերով կը պատուին այս օրը:
Շուրջ 170 հազար մարդ դուրս բերուեցաւ աղէտի գօտիէն եւ հանգրուան գտաւ Խորհրդային Միութեան տարբեր հանրապետութիւններու մէջ:
Հայաստանին համակողմանի օգնութիւն ցոյց տուին աշխարհի աւելի քան 113 երկիրներ եւ 7 միջազգային կազմակերպութիւններ: Սակայն ձմրան ցուրտին մանաւանդ կը սրին ուշադրութիւնները դէպի այդ փայտաշէն կացարանները, ուր 33 տարի շարունակ տակաւին անտուն մնացած մարդիկ կը բնակին: Ե՞րբ պիտի հասնի բնակարան ստանալու անոնց հերթը եւ ե՞րբ անոնք հրաժեշտ պիտի տան փայտեայ խրճիթներուն. այս հարցումներուն նոր իշխանութիւնն ալ պատասխան չունի, ինչպէս չունէին նախորդները:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles