0
0
Հ.Յ.Դ. Միջին Արեւելքի եւ Եւրոպայի երիտասարդական միութիւններու տարածաշրջանային բանակումը, որ իր աշխատանքները սկսած էր Օգոստոս 22-ին, Կիպրոսի Թրոտոս լեռնաշղթայի բանակավայրին մէջ, աւարտեցաւ Օգոստոս 28-ին։
Բանակումին մասնակցեցան 13 երկիրներէ ժամանած 65 երիտասարդներ, որոնց կարգին՝ Լիբանանէն, Սուրիայէն, Իրանէն, Ֆրանսայէն, Շուէտէն, Հոլանտայէն, Մեծն Բրիտանիայէն, Արցախէն, Հայաստանէն եւ Կիպրոսէն:
Կատարուեցան դասախօսութիւններ, քննարկումներ, խմբային աշխատանքներ, մրցոյթներ, այցելութիւններ, խնճոյք եւ ժամանց։
Մասնակիցները դասախօսութիւններ ունկնդրեցին Հայաստանի ներքին ու արտաքին քաղաքական իրավիճակին, Արցախի հակամարտութեան բանակցային գործընթացի ներկայի փուլին, Հայոց Ցեղասպանութեան 100-ամեակէն ետք, Հ.Յ.Դ. երիտասարդական միութիւններու դերին մասին:
Բանակումի փակման խօսքով, Հ.Յ.Դ. Կիպրոսի կոմիտէի անունով, հանդէս եկան ընկեր Յակոբ Մանուկեանը եւ Հ.Յ.Դ. Բիւրոյի Երիտասարդական գրասենեակի պատասխանատու ընկեր Սարգիս Մկրտչեանը, որ իր խօսքին մէջ ըսաւ.- «Հայրենիքը մէկն է, չկայ երկրորդը։ Հայութեան ներկայիս վիճակն անբնական է, հետևանք դառն ճակատագրի։ Ուստի Հայաստան և Սփիւռք ձեռք ձեռքի տուած պիտի կերտեն հզօր հայրենիք։ ՀՅԴ երիտասարդական միութիւնների պարտականութիւնն է ամէն ջանք թափել այդ նպատակին հասնելու համար»։
