0
0
Արմենակ հեռաձայնեց եւ ըսաւ, որ աշխարհի դէմ առանձին ցոյց պիտի ընէ ուրբաթ օր: Հարցուցի.
– Ինչո՞ւ առանձին:
– Բազմամարդ ըլլանք թէ առանձին, արդէն չեն լսեր մեր ըսածը:
– Ճիշդ ես: Բայց ի՞նչ ըսելու համար ցոյց պիտի ընես:
– Պաստառին վրայ պիտի գրեմ, որ Ատրպէյճանի եւ անոր ետին կանգած Թուրքիոյ կոչ կ’ընեմ դադրեցնելու Արցախի եւ անոր ժողովուրդին դէմ նախայարձակումը եւ կրակը:
– Արմենա՛կ, քեզ ով մտիկ կ’ընէ: Կեղծ իմաստուն մը առիթով մը ըսաւ, որ այդ ջուրի մակերեսին տրուած սուրի հարուած էր: Քու ցոյցդ այդքան անգամ չի կրնար ըլլալ:
– Ռուսիա, Ամերիկա, Ֆրանսա, Հոլանտան եւ ուրիշներ ալ կոչ կ’ընեն կրակը դադրեցնելու: Իրենց կոչերը լսող չկայ: Ինչո՞ւ լսող պիտի ըլլայ, քանի որ չեն ըսեր, թէ ի՞նչ պիտի ընեն, եթէ զիրենք չլսեն: Իմ կոչս ալ կ’արժէ նոյնքան, որքան բոլորի չլսուող կոչերը: Ձախէն զերօ:
– Ճիշդ ես: Բայց թերթերուն շատախօսութեան նիւթ պիտի չհայթայթէ քու միայնակ ցոյցդ, ոչ լրագրող պիտի գայ եւ ոչ ալ նկարահանող:
– Դուն ալ ճիշդ ես: Գոնէ ես գոհ պիտի ըլլամ, որ մեծերու շարքին խօսքս ըսի: Քու ըսած իմաստունիդ խօսքը օդին մէջ չձգելու համար. սուրի հարուած օդին մէջ:
– Ո՞ւր պիտի ընես ցոյցդ:
– Մեր տան առջեւ, հետաքրքրելու համար ողջմիտ քաղաքացիները: Զիրար կրկնող մեծերը զիրար անգամ չեն լսեր,- ըսաւ եւ եզրակացուց արձակազէն ցուցարար Կեդրոնականցին:
Հայրենասիրական արտակարգ ցոյցը ներկայութեամբս եւ այ ֆոնովս պիտի անմահացնեմ, որպէսզի իր անհեթեթութեան գիտակից Կեդրոնականցիին հետ լուսանկարուիմ եւ իրեն հետ դիմատետրային Պատմութեան մէջ արձանագրուիմ:
Մակարս անգամ փառասիրութիւններ ունի, ինչպէս բոլոր մեծ ու պզտիկ սուլթանները…
Մակար ի Գաղիա, 7 հոկտեմբեր 2020
