ԵՐԵՒԱՆ.- Երկուշաբթի, Հոկտեմբեր 24-ին, լրագրողներու համահայկական 8-րդ համաժողովը աւարտեց իր աշխատանքները: Ժողովի աւարտին, Հայաստանի նախագահ Սերժ Սարգսեան  ընդունեց ներկայացուցիչները: Ան ըսաւ թէ լրագրութեան մէջ երբեք կարելի չէ յաջողութեան հասնիլ փոքր սուտերը աւելի մեծ սուտով հերքելու կամ անօրինականութեամբ օրինականութիւն հաստատելու փորձերով, հանրապետութեան նախագահը ընդգծած է, որ որքան սուր ըլլայ ճշմարտութիւնը ներկայացնելու գրիչը, այնքան անիկա օգտակար կ՛ըլլայ եւ չի վնասեր, իսկ նոյն այդ գրիչը, լրագրողական կարողութիւնները, լրատուամիջոցներու ազդեցութիւնը անզգուշ օգտագործելու պարագային կրնան մեծ հարցերու ծնունդ տալ: Նախագահ Սարգսեան յայտնեց.- «Դուք մեծ ուժ էք, դուք ձեր գործունէութեամբ մեզի վստահութիւն եւ եռանդ կու տաք, որպէսզի մենք կարենանք ուժերու առաւելագոյն գործադրութեամբ կատարել մեր պարտականութիւնները: Մենք մեր նախորդ հանդիպումներէն մէկուն ընթացքին խօսած ենք այն մասին, որ պէտք է առանձնացնել երկու կարեւոր հանգամանք. առաջին հանգամանքը այն լրատուամիջոցներուն եւ լրագրողներուն աշխատանքն է, որ ուղղուած է բուն հայկական համայնքին, այսինքն` հայապահպանութեան ուղղուած աշխատանքը, եւ երկրորդ` տարբեր երկիրներու մէջ աշխատող ազգութեամբ կամ արմատներով հայ լրագրողները համախմբելն է: Ե՛ւ առաջին, ե՛ւ երկրորդ պարագային չափազանց կարեւոր է, որ այս արագ փոփոխուող աշխարհին մէջ մենք կարենանք գտնել աշխատանքի ճիշդ ձեւերը, պահպանել հետաքրքրութիւնը այն նիւթերուն նկատմամբ, որոնց վրայ մենք կ՛աշխատինք, որոնցմով կը հպարտանանք եւ կ՛ուզենք անով ազդեցութիւն ունենալ այս կամ այն հարցին վրայ: Երկու պարագային ալ, կը կարծեմ, թէ չափազանց կարեւոր է միշտ հաւատարիմ ըլլալ լրագրողական բարեխղճութեան: Շատ կարեւոր է նաեւ, որ մենք մեր ջանքերը կարենանք համատեղել, գտնել այն էական խնդիրները, որոնց լուծման վրայ պէտք է ծախսենք մեր հիմնական ներուժը եւ մեր կարողութիւնները»:

Նշենք թէ, Արցախի մէջ ալ կատարուած էր նիստ:  Ողջունելով սփիւռքէն Արցախ գտնուող հիւրերը` նախագահ Բակօ Սահակեան նշած էր, որ համաժողովին ընթացքին քննարկուող նիւթերը շատ կարեւոր են, հետաքրքրական եւ հրատապ` տեղեկատուական մարզը որակելով Լեռնային Արցախի համար ռազմավարական նշանակութիւն ունեցող մարզ: Ան յատուկ կերպով անդրադարձաւ Ապրիլեան քառօրեայ պատերազմին ընթացքին Հայաստանի եւ սփիւռքի լրատուամիջոցներուն ունեցած դերակատարութեան` շեշտելով, որ անոնք հանդիսացան այն կռուանները, որոնց միջոցով կարելի եղաւ ջրել ատրպէյճանական ապատեղեկատուութիւնը:

«Ներկայ դրութեամբ տեղեկատուական մարզին մէջ աւանդական գերխնդիրներուն զուգահեռ կը ծագին նորանոր առաջադրանքներ եւ կատարելիք աշխատանքներ: Այս բոլորը կը պահանջէ համապատասխան քաղաքականութեան իրականացում տեղեկատուական դաշտին մէջ, սերտ համագործակցութիւն Հայաստանի, Արցախի եւ սփիւռքի լրագրողներուն ու լրատուական հատուածներուն միջեւ», յայտնեց նախագահ Սահակեան: