0
0
Չորեքշաբթի, Նոյեմբեր 16-ին Հ․Օ․Մ․-ի Կեդրոնական վարչութիւնը այցելեց Լիբանանի Օգնութեան Խաչի «Արաքսի Պուլղուրճեան» ընկերաբժշկական կեդրոն եւ հանդիպում-ժողով մը ունեցաւ շրջանային վարչութեան հետ: Արծարծուեցան դիմագրաւուած դժուարութիւնները եւ ապագայ ծրագիրները:
Այնուհետեւ Կեդրոնական վարչութիւնը ականատես եղաւ իր աջակցութեամբ շարունակուող «Վ. Տեկիրմենճեան» խոհանոցի «Տաք ճաշ» ծրագիրի օրուան ճաշի պատրաստութեան աշխատանքներուն եւ ճաշերու բաշխման գործընթացին: Ապա շրջեցաւ կեդրոնի բաժանմունքները եւ մօտէն ծանօթացաւ կեդրոնի գործունէութեան:
Անկէ ետք Հ․Օ․Մ․-ականները այցելեցին ձեռարուեստի վաճառատուն եւ ականատես եղան հայկական դարաւոր արժէքները պահպանող, հայկական ասեղներով աշխատցուած ու այդտեղ ցուցադրուած գեղեցիկ ձեռագործներու: Նոյն օրը, յետմիջօրէին Ազգային Միացեալ վարժարանի «Ժիրայր եւ Ցոլինէ Խաչատուրեան» սրահին մէջ Կեդրոնական վարչութիւնը հանդիպում ունեցաւ Լիբանանի Օգնութեան Խաչի անդամներուն հետ:
Ցուցադրուեցաւ «Արաքսի Պուլղուրճեան» կեդրոնին եւ Շրջանային վարչութեան գոծունէութիւնը ներկայացնող տեսերիզ մը: Ապա բեմ հրաւիրուեցաւ Հ․Օ․Մ․-ի Կեդրոնական վարչութեան ատենապետ Նայիրի Տէրտէրեան, որ սահիկներու ցուցադրութեամբ ներկայացուց աշխարհատարած գործունէութիւնը: Ան շեշտը դրաւ Արցախի «Սօսէ» մանկապարտէզներու եւ 44-օրեայ պատերազմէն ետք թշնամիին կողմէ Արցախի կազի մատակարարումի կասեցման պատճառով, Արցախի բնակարանները արեւային վահանակներով օժտելու ծրագիրներուն, Լիբանանի նաւահանգիստի պայթումին եւ տնտեսական ծանր պայմաններու լոյսին տակ լիբանանահայութեան օժանդակելու ծրագիրին, Հայաստանի «Մօր ու մանկան կեդրոն»-ին, «Չինուորի տուն» եւ զոհուած հերոսներու զաւակներուն հասնելու ծրագիրներուն, ինչպէս նաեւ` Սուրիոյ ու Ջաւախքի հայ կարիքաւորներուն սատարելու ծրագիրներուն:
Տէրտէրեան բարձր գնահատեց Լիբանանի Օգնութեան Խաչի գործունէութիւնն ու լայնատարած աշխատանքները: Աւարտին Կեդրոնական վարչութիւնը պատշաճ հիւրասիրութեամբ պատուեց ներկաները:
Հինգշաբթի, Նոյեմբեր 17-ին Կեդրոնական վարչութիւնը մեկնեցաւ Այնճար եւ այցելեց քաղաքապետարան, ուր դիմաւորուեցաւ քաղաքապետ Վարդգէս Խօշեանին կողմէ: Ապա ուղղուեցաւ դէպի Լիբանանի Օգնութեան Խաչի Այնճարի «Աղթամար» մասնաճիւղի «Ֆիլհաննէսեան» դարմանատուն եւ մօտէն ծանօթացաւ կեդրոնի գործունէութեան, որմէ ետք այցելեց «Աղթամար» մասնաճիւղի Ձեռարուեստի կեդրոնը:
Հ․Օ․Մ․-ի ատենապետ Նայիրի Տէրտէրեան դրուատիքով արտայայտուեցաւ եւ գնահատեց տարուած աշխատանքները: Եզրափակելով իրենց այցելութիւնը վարչութիւնը այցելեց ԼՕԽ-ի «Ա. եւ Ա. Գլպաշեան» կազդուրման կայան:
