0
0
ՄՈՍԿՈՒԱ․- Երեքշաբթի, Օգոստոս 31-ին, Հայաստանի արտաքին գործոց նախարար Արարատ Միրզոյեան հանդիպում մը ունեցաւ Ռուսաստանի Արտաքին գործոց նախարար Սերկէյ Լաւրովի հետ։
Միրզոյեան շեշտեց, որ Հարաւային Կովկասի մէջ լարուած իրավիճակը կը շարունակուի։ «Տարածքաշրջանէ ներս խաղաղութիւնն ու կայունութիւնը մեր ռազմավարութիւնն են ու մենք պատրաստ ենք այս ուղղութեամբ աշխոյժ երկխօսութեան։ Սակայն տարածքաշրջանէ ներս կը շարունակուի բաւական լարուած իրավիճակը ու սա մեծապէս պայմանաւորուած է Ատրպէյճանի ապակառուցողական քաղաքականութենէն», ըսաւ Միրզոյեան եւ աւելցուց, որ Պաքու պաշտօնապէս նոր կեղծ օրակարգեր կ՚ընդհանրացնէ ու միշտ կը հրաժարի իր պարտաւորութիւններու կատարումէն՝ մասնաւորապէս չի վերադարձներ բոլոր ռազմագերիներն ու բռնի պահուած անձերը։
Լաւրով, իր կարգին յայտնեց, թէ Նոյեմբեր 9-ի յայտարարութեամբ նշուած է, որ պէտք է ազատ արձակուին այն պատերազմական գերիները, որոնք այդ պահուն եղած են: «Այժմ Ատրպէյճանցիները կը պահեն զգալի խումբ մը հայ զինուորներու, որոնք այնտեղ յայտնուած են նոյեմբերի վերջը` յայտարարութեան ուժի մէջ մտնելէն ետք: Բայց եւ այնպէս, Ռուսիոյ նախագահը բոլոր հաղորդակցութիւններուն մէջ, ներառեալ Իլհամ Ալիեւի հետ, այդ ազդակը կ՛ուղարկէ: Ատրպէյճանական կողմին կոչ կ՛ուղղենք առանց նախապայմաններու ազատ արձակելու բոլորը: Ատիկա նշանակալի քայլ պիտի ըլլար այն վստահութեան հաստատման համար, որուն կարիքը այս պահուն կայ: Ատիկա կարեւոր մարդասիրական քայլ պիտի ըլլար։ Կը մեկնինք այն հանգամանքէն, որ բոլոր հարցերը անհրաժեշտ է լուծել բացառապէս քաղաքական-դիւանագիտական մեթոտներով, իսկ երկարաժամկէտ կարգաւորումը կարելի է միայն սահմանազատման եւ սահմանագծման միջոցով: Ռուսիոյ նախագահին նախաձեռնութիւնը այս հարցով շատ յայտնի է: Այսօր քննարկած ենք` ինչպէս ապահովել ատոր արագ իրագործումը: Վերահաստատած ենք մեր պատրաստակամութիւնը ամէն կերպով աջակցելու այդ հոլովոյթին», ըսաւ Լաւրով։
Շարունակ իր յայտարարութիւններուն մէջ Լաւրով անդրադարձաւ նաեւ Հայաստան-Ատրպէյճան սահմանի առկայ խնդիրներուն։ Ռուս նախարարի խօսքով՝ անոնց երկարաժամկէտ լուծումը հնարաւոր է միայն սահմանազատման ու սահմանագծման միջոցաւ։ Այդ խնդիրները հնարաւոր է լուծել քաղաքական-դիւանագիտական ճանապարհով։
