ԹՐՔԱԿԱՆ ՈԼՐԱՆԵՏ՝ ՊՈՒՄԸՐԱՆԿ

0 0
Read Time:1 Minute, 58 Second
Ծաղրանկար՝ Օլիվըրի (``Տէր Սթանտարտ`` - Վիեննա)
Ծաղրանկար՝ Օլիվըրի (“Տէր Սթանտարտ“ – Վիեննա)

ՀԱՅՐԵՆԻՔ

Հոկտեմբեր 21, 2014

 

Բեղուն եւ անակնկալներով (բաւական մը անախորժ) հարուստ էր անցնող շաբաթը… Էրտողանի եւ իր գործընկերներուն համար:

Դժուար ու դաժան վայրկեաններ ապրեցաւ Թուրքիոյ ղեկավարութիւնը, նոյնքան վտանգաւոր որքա՜ն, այդ խիզախ քիւրտ ազատամարտիկը որ կառչած Արաբունարի (Քոպանէ) իր դիրքին, յամառօրէն կը պայքարի մոլեռանդ եւ ծայրայեղ կրօնամոլներու դէմ:

Պատահածը արդիւնք էր, Էրտողանի որդեգրած քաղաքականութե՞ան, ի տես Արաբունարի ողբերգութեան…սահմանի փակմա՞ն թէ մեծամոլութեան աստիճանի հասած ինքնավստահութեան:

Արդիւնքը յստակ է: Ոլրանետ (պումըրանկ) մը, որուն անդրադարձը կրնայ շարունակուիլ, իսկ այդ պատահածին գինը վճառելը…բաւական մը նիստերու կարիք պիտի ըլլայ Էրտողանի հովանիին տակ գտնուող “Թինք Թանք“ին համար: Հաւանաբար ամենէն աւելի ծանր հարուածը որ Անգարան ստացաւ, այդ ալ Նիւ Եորքի մէջ, Մ.Ա.Կ.-ի Ապահովութեան Խորհուրդի ոչ-մնայուն անդամ դառնալու ընտրութեան օրն էր, Հոկտեմբեր 16ին որ աւարտեցաւ պարտութեամբ:

Արդարեւ, հակառակ Թուրքիոյ Արտաքին Գործոց նախարար Մեվլուտ Չաւուշօղլուի տարած քարոզչական արշաւին եւ ընտրութեան նախորդող գիշերն իսկ, շքեղ պանդոկի մը մէջ, շարք մը օտար դիւանագէտներ սիրաշահելու համար փառաւոր հիւրասիրութեան, կարելի չեղաւ բարձր թիւով քուէներ ապահովել:

Անգարայի համար անհանդուրժելի եւ անմարսելի էր, որ թիւ մէկ մրցակից Սպանիան կրկնապատիկէն աւելի քուէ ստացած էր, իսկ աւելին երբեմնի մօտիկ դաշնակիցներ՝ Եգիպտոս եւ յատկապէս Սէուտական Արաբիա, բուռն պայքար մղած էին, շարունակ ձախողցնելով թրքական որեւէ ոտնձգութիւն:

Այսպիսի պարտութիւն շատ աւելի ազդեցիկ է, քան նոյնինքն վերջերս քիւրտերու կողմէ կատարուած յարձակումներ, Պրէկենցի (Աւստրիա), Մարսէյի (Ֆրանսա) եւ Իտալիոյ մայրաքաղաք՝ Հռոմի մէջ Թուրքիոյ հիւպատոսարանին դէմ կատարուած յարձակումներուն:

Թրքական արտաքին քաղաքականութեան մեքենան այնքան մը տկարացած եւ աքցանի մէջ առնուած էր, որ նոյնիսկ զարմանալի պատճառներով շարունակ մոռացութեան մատնուած եւ “մէկդի“ դրուած, հայ որբ աղջնակներու հիւսած գորգը, յանկարծ կանաչ լոյս ստանայ ցուցադրուելու: Եւ այսպէս, Հայոց Ցեղասպանութեան առնչուած պատմական գորգը, մօտ օրէն պիտի ցուցադրուի Սպիտակ Տան այցելուներու կեդրոնին մէջ:

Ամենէն աւելի ահաւորը, սակայն նոյնինքն Թուրքիոյ մէջ տիրող ներքին կացութիւնն է, յատկապէս հարաւարեւելեան շրջաններէն ներս, ուր քիւրտեր մեծամասնութիւն են եւ բազմիցս ցոյցերով կը մտահոգեն Անգարան:

Իսկ ցայսօր, այս կացութեան բանալի անձնաւորութիւնը կը մնայ, աւելի քան տաս տարիէ ի վեր արգելափակուած Օճալանը, որուն արձակած կոչերն ու հրահանգները ամենայն յանդգնութեամբ կը կատարէ քիւրտ մասսան:

Այս ոլրանետին դիմաց զգալի է գործընթացի փոփոխութիւն: Առաջին հերթին, սահմանի բացում, որ կը դիւրացնէ քիւրտ ազատամարտիկներու մուտքը Արաբունար, եւ անշուշտ վարչապետ Տաւութօղլուի կոչը թէ շրջանէն ներս պէտք է որդեգրել խաղաղ եւ միաւորող մօտեցում մը, որ հիմնուած պիտի ըլլայ փոխադարձ յարգանքի վրայ, բան մը որ կը դիւրացնէ  բնական, տեղական եւ վաւերական յատկանիշներ ունեցող քրտական հարցի լուծումը:

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles