Էրտողանեան Անդունդ

0 0
Read Time:1 Minute, 50 Second
Լուսանկար՝ Իլիաս Աքենկինի (Ա.Ֆ.Փ.)
Լուսանկար՝ Իլիաս Աքենկինի (Ա.Ֆ.Փ.)

ՀԱՅՐԵՆԻՔ
Խմբագրական
Նոյեմբեր 7, 2016

Արդարութեան, ու ժողովրդավարութեան դէմ կատարուած Էրտողանեան սպանդը կը շարունակէ աւերներ գործել Թուրքիոյ մէջ:
Անցեալ Յուլիս 15-ի ձախողած պետական հարուածը թեւեր տուած էր բռնատէր Էրտողանին, որ ամէնայն համարձակութեամբ եւ ազատութեամբ, հակաժողովրդավարական որոշումներ առնէ:
Այդ ձախողած պետական հարուածի օրէն իսկ, աւելի քան հարիւր հազար պետական պաշտօնեաներ գործէ արձակուած են, իսկ ասոր կողքին, երեսունըհինգ հազար այլ պաշտօնեաներ անբաղձալի եւ վտանգաւոր տարր նկատի առնուելով, բանտարկուած են:
Զուգահեռաբար, կատարուեցան բազմաթիւ սեղմումներ քարոզչական բնագաւառէն ներս, ուր տասնեակ մը լրատուական եւ մամլոյ սպասարկութեան հիմնարկներ փակուեցան, նկատի առնուելով որպէս, Թուրքիոյ ազգային շահերուն դէմ գործող, դաւադիր գործակալութիւններ:
Էրտողանի եւ իր հլու կամակատար ղեկավարութեան վերջին բռնատիրական զգայացունց արարքը, ահաւասիկ գրեթէ շաբաթ մը առաջ՝ Նոյեմբեր 4-ի վաղ առաւօտեան, քրտամէտ Ժողովուրդներու Ժողովրդավարական Կուսակցութեան 11 անդամներու ձերբակալութիւնն էր, որոնց կարգին յատկապէս համանախագահներ՝ Սելահետին Տեմիրթաշ եւ Ֆիկեն Եուքսեքտաղ:
Այսպէս, երբ ոչ ոք հաշիւ կը պահանջէ, սպանդն ու ջարդը (ճերմակ թէ արեան գոյնով) կը շարունակուին: Ամէնայն յոխորտանքով, Էրտողան կը շարունակէ բեմահարթակներէն ահազանգ հնչեցնել թէ դաւադիր ուժեր կը փորձեն գործել յաչս Թուրքիոյ փլուզման:
Էրտողան պաշտօնապէս կը քննադատէ Ժողովուրդներու Ժողովրդավարական Կուսակցութեան երեսփոխանները, որոնք ըստ իրեն հասած ստոյգ տեղեկութիւններուն, անձեռնմխելիութենէն օգտուելով, անդորրութիւնը կը խախտեն եւ Թուրքիան կը մղեն դէպի ներքին քաղաքացիական պատերազմ:
Ըստ Էրտողանի եւ իր հովանիին տակ գործող քանդիչ մեքենային, խուզարկութիւններն ու ձերբակալութիւնները կատարուած են հաստատ եւ ստոյգ փաստերու վրայ, եւ ոչ թէ պարզ կասկածներու: Աւելին, Տեմիրթաշ եւ իր պատկանած կուսակցութեան անդամները կ՛ամբաստանուին անդամակցած ըլլալու համար ահաբեկչական զինեալ կազմակերպութեան մը եւ այդ գծով, կատարած գործունէութեան:
Տեմիրթաշ եւ իր ձերբակալուած գործընկերները չընկրկեցան, եւ տեղի չտուին:
Անոնք նախքան իրենց ձերբակալուիլը, հարցաքննութեան տարուեցան, սակայն շարունակ մերժեցին պատասխանել իրենց յղուած անհիմն եւ անհեթեթ հարցումներուն, շարունակ նշելով թէ իրենք ժողովուրդին ընտրեալ ներկայացուցիչներն են եւ կը ներկայացնեն այդ ժողովրդային զանգուածը:
Բնականաբար, այս պղտոր կացութեան մէջ, կատարուեցաւ անխուսափելին՝ Տիարպէքիրի (Տիգրանակերտ) մէջ պայթում մը, որ խլեց քանի մը զոհ եւ հարիւրէ աւելի վիրաւոր:
Այս վերջին Էրտողանեան սխրանքը կատարուեցաւ այնպիսի ժամանակաշրջանի մը, ուր Արեւմուտքը իր աչքերը յառած էր դէպի Նոր Աշխարհ՝ Միացեալ Նահանգներու նախագահական ընտրութիւններ:
Արդեօք, ի՞նչ պիտի պատահի ապագային: Մինչ այդ, արդէն իսկ «դանակը հասած ու անցած է ոսկորը»…եւ Ժողովուրդներու Ժողովրդավարական Կուսակցութիւնը քաշուած է Թուրքիոյ «Մեճլիս»էն:
Էրտողան իր ղեկավարած երկիրը կ՛ուղղէ դէպի անդունդ:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles