ԵՒՐՈՊԱՅԻ ՀԱՅ ԴԱՏԻ ՅԱՆՁՆԱԽՈՒՄԲԻՆ ԿՈՉԸ՝ ԱՐՑԱԽԻ ՍԱՀՄԱՆԻՆ ՄՕՏ ՈՒՂՂԱԹԻՌԻ ՄԻՋԱԴԷՊԻՆ ԱՌԹԻՒ

0 0
Read Time:2 Minute, 12 Second

hel crash
  ՊՐԻՒՔՍԷԼ.-  Նոյեմբեր 12-ին, Արցախի սահմանին մօտ Ատրպէյճանի բանակին կողմէ վար առնուած հայկական ուղղաթիռի եւ ազերի կողմի ապատեղեկատուութեան մասին, Եւրոպայի Հայ Դատի Յանձնախումբի գրասենեակը նամակներ ուղարկեց եւրոպական կառոյցներուն, կոչ ուղղելով անոնց՝ դատապարտել Ատրպէյճանը, որ կը սպառնայ շարունակ ստեղծել լարուած վիճակը:

Եւրոպական Միութեան խորհրդարանի արտաքին յարաբերութեանց յանձնաժողովին, պաշտպանութեան եւ ապահովութեան յանձնաժողովին, Եւրոխորհրդարանի Եւրոնեսթի պատուիրակութեան, Եւրոխորհրդարան – Հարաւային Կովկաս պատուիրակութեան, ինչպէս նաեւ Եւրոխորհրդարանին մէջ քաղաքական խմբակցութեանց ղեկավարներուն յղուած նամակին մէջ Գասպար Կարապետեան, Եւրոպայի Հայ Դատի Յանձնախումբի նախագահը, նշեց, որ Արեւմուտքին թոյլատրած եւ ընդունած քաղաքականութիւնը՝ Հայաստանը եւ Ատրպէյճանը նոյն նժարին վրայ դնելու, եւ երկու կողմերուն ուղղուած զսպուածութեան կոչերու արդիւնքն է, որ հոս հասցուց իրավիճակը: “Եւրոպայի Հայ Դատի Յանձնախումբը բազմիցս նշած է Ատրպէյճանի ապակառուցողական դիրքորոշումը ձեզի: Մինսքի համանախագահող երկիրներու ղեկավարներուն հետ իւրաքանչիւր հանդիպումէ առաջ Ատրպէյճան կը խախտէ զինադադարը, մաքսիմալիսթ դիրքերով ներկայանալու համար. Հայաստան նոյնիսկ զոհեր տալով,  մի՚շտ կառչած մնացած է խաղաղ լուծման կողմնակից իր դիրքաւորումին: Այնքան ատեն, որ Ալիեւի արկածախնդրութիւնները չեն սաստուիր, ան պիտի շարունակէ կրակին հետ խաղալ“:

Կարապետեան նաեւ շեշտեց, որ հայութիւնը ընդհանրապէս, եւ Եւրոպայի Հայ Դատի Յանձնախումբը յատկապէս, իր գրասենեակին միջոցով զգուշացուցած է արեւմուտքն ու հանրային կարծիքը, սակայն ո՚չ մէկ քայլ առնուեցաւ: “Զգուշացուցինք ձեզ, երբ Ատրպէյճան Նախիջեւանի հայկական դարաւոր խաչքարերն աւերեց եւ պատմական գերեզմանատունը ռազմական նշանառութեան վայրի վերածեց, կը զգուշացնէինք երբ Ատրպէյճան զինադադարը ամեն օր կը խախտէր, զգուշացնէինք ձեզ՝ երբ հայ քաղաքացիներ Պաքու կը փոխադրուէին եւ անձնասպան կ՚ըլլային: Զգուշացուցինք ձեզ, երբ Ալիեւ Սաֆարովին հերոսի կոչում տուաւ: Այս տարուան օգոստոս ամսին ձեզ նաեւ զգուշացուցինք, երբ մօտ տաս օր Ատրպէյճան փորձեց զինադադարը խախտելով Արցախ ներխուժել: Պատերազմի հաւանական վերսկսման պարագային՝ պատասխանատու պիտի ըլլան բոլոր եւրոպական եւ այլ մարմինները, որոնք այսքան ատեն մատը վէրքին դնելու փոխարէն՝ կը փայփայէին Ալիեւի Ատրպէյճանը, որ եւ անմեղ մարդկանց զոհաբերման ու մահուան պատճառ հանդիսացան: Խաղաղութեան առաքելութիւն ունեցող կառոյցները, մի՚շտ տատամսեցան Ալիեւը քննադատելու, տածելով այն խաբկանքը՝ թէ ան խաղաղութիւն կ՚ուզէ: Բնատէրը խաղաղութիւն, հաշտութիւն չ՚ուզեր. ան իր հակահայ մոլուցքով, տարածաշրջանին մէջ անկայունութիւնը պահելով, իր եւ շրջապատին հարստութիւն կը թիզէ, հաւատալով, այն խաբկանքն ունենալով, որ Եւրոպայի ուժանիւթի մատակարարման փրկարարն է: Ամեն տեսակի սանցարձակութիւն իր վերջակէտն ու հետեւանքն ունի“, յայտնեց Կարապետեան:

Նամակ ուղարկուած է նաեւ Եւրոպական Միութեան Հարաւային Կովկասի յատուկ ներկայացուցիչ Հերպերթ Սալպերի, որ արդէն իսկ, Լոնտոնի մէջ տեղի ունեցած համաժողովի մը ընթացքին վերահաստատած է, թէ Եւրոպական Միութիւնը աջակից է հակամարտութեան միա՚յն խաղաղ լուծման, եւ թէ ան պատրաստ է այցելել Ստեփանակերտ:

Յատուկ նամակներ ուղղուած են նաեւ Եւրոպական Միութեան Յանձնաժողովի նախագահ Ժան Քլոտ Եունքերի, արտաքին քաղաքականութեան գերատեսչութեան պետ՝ Ֆետերիքա Մոկերինիի, Եւրոպական Միութեան ընդլայնման եւ հարեւանութեան յանձնակատար Եոհաննէս Հանի:

ԵԱՀԿ Մինսքի խմբակի երեք համանախագահ երկիրներու ներկացացուցչութիւնները նաեւ բողոքի նամակներ ստացած են, ինչպէս նաեւ Զուիցերիան՝ իբրեւ ԵԱՀԿ-ի նախագահող երկիր: Եւրոպայի խորհուրդի խորհրդարանական վեհաժողովի անդամները նաեւ տեղեակ պահուած են Ատրպէյճանի ռազմապաշտ կեցուածքէն:

 

 

 

 

 

 

 

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles