Դաշնակցական Գործիչ Արա Տէմիրճեանի Մարմինը Յանձնուեցաւ Հողին

ՊԷՅՐՈՒԹ.- Շաբաթ, Նոյեմբեր 19-ին, Սուրբ Գրիգոր Լուսաւորիչ Մայր տաճարին մէջ տեղի ունեցաւ Հ.Յ.Դաշնակցութեան նուիրեալ գործիչ եւ Հ.Յ.Դ. Բիւրոյի երկարամեայ գործավար Արա Տէմիրճեանի Ազգային թաղումը: Նախքան Մայր տաճար հասնիլը, յուղարկաւորութեան թափօրը ուղղուեցաւ «Շաղզոյեան» կեդրոն, ուր Հ.Յ.Դ. Բիւրոյի եւ Կեդրոնական կոմիտէի անդամները եւ կեդրոնին մէջ գործող կառոյցներու անձնակազմերը իրենց յարգանքի տուրքը մատուցեցին բազմավաստակ ընկերոջ: Ս. Գրիգոր Լուսաւորիչ Մայր տաճարին մէջ Ազգային յուղարկաւորութեան ներկայ գտնուեցաւ Արամ Ա. վեհափառ հայրապետը եւ արարողութեան նախագահեց Լիբանանի հայոց թեմի Բարեջան Առաջնորդ Շահէ Եպս. Փանոսեան: Սրբազանը անդրադարձաւ Արա Տէմիրճեանի ազգային, հանրային գործունէութեան, ինչպէս նաեւ մարդկային ազնիւ առաքինութիւններուն` ներկայացնելով նաեւ իր կեանքի զանազան հանգրուաններուն հանգուցեալին ծաւալած հանրային-հասարակական գործունէութիւնը: Ապա, այս առիթով կարդաց վեհափառ հայրապետին խօսքը, որուն մէջ կը վկայէ, որ Արա Տէմիրճեան իր կեանքի ամբողջ ընթացքին շարունակեց մնալ լուռ ու լուսարձակներէ հեռու գործող անհատ մը: Ան կ՛անդրադառնայ հանգուցեալին ունեցած կարեւոր դերակատարութեան իր պատկանած կուսակցութեան գործունէութեան ու առաքելութեան տարբեր մարզերուն մէջ: Ապա կը նշէ Մեծի Տանն Կիլիկիոյ կաթողիկոսութեան հետ Արա Տէմիրճեանի առնչութիւնը եւ 2008-էն ի վեր Կիլիկիոյ կաթողիկոսութեան Ազգային կեդրոնական վարչութեան անդամակցութեամբ անոր ունեցած դերակատարութիւնը ժողովական աշխատանքներուն եւ ընդհանրապէս կաթողիկոսութեան զանազան ծրագիրներու իրականացման հոլովոյթին մէջ: Ապա հանգուցեալը յետ մահու պարգեւատրուեցաւ Կիլիկիոյ կաթողիկոսութեան «Ասպետ»ի շքանշանով: Պուրճ Համուտի Ազգային գերեզմանատան մէջ տեղի ունեցաւ նուիրեալ ընկերոջ թաղման կարգը: Արարողութենէն ետք Հ.Յ. Դաշնակցութեան ընտանիքին կողմէ դամբանական խօսք արտասանեց Հ.Յ.Դ. Բիւրոյի անդամ Բենիամին Պչաքճեան: Ան իր խօսքին մէջ անդրադարձաւ ընկերոջ կուսակցական գործունէութեան զանազան հանգրուաններուն` շեշտը դնելով անոր ունեցած մեծ ներդրումին` կուսակցութեան մէջ երիտասարդական կառոյցի ստեղծման եւ ազգային պահանջատիրական երթին մէջ իր բերած կարեւոր դերակատարութեան վրայ: Պչաքճեան հաստատեց, որ Արա Տէմիրճեան իբրեւ Բիւրոյի գործավար, իր գործունէութեան ընթացքին ցուցաբերեց ժողովներու ատենագրութեանց պատրաստութեան բծախնդիր մօտեցում, որոշումներու ճշգրիտ բանաձեւում եւ փոխանցում, ինչպէս նաեւ ժողովական կեանքի մասնակցութեան բարձր ունակութիւն: Ան գործեց տասնըմէկ իրերայաջորդ բիւրոներու ժամանակաշրջանին եւ դարձաւ նաեւ անգիր տեղեկատուութեանց կարեւոր աղբիւր: Ան շեշտեց, որ մեծ եղած է լուսահոգի ընկերոջ դերը սերունդներու դաստիարակութեան գործին մէջ եւ եզրափակեց հաստատելով, որ դաշնակցական նուիրեալ գործը պիտի շարունակուի իր ջամբած դաստիարակութեան ճամբով հասակ առած սերունդներու անձնուէր ու յանձնառու աշխատանքով: Արա Տէմիրճեանի մարմինը ամփոփուեցաւ Պուրճ Համուտի Ազգային գերեզմանատան Հ.Յ.Դ. պանթէոնին մէջ: Արա Տէմիրճեան ծնած է Քեսապ, Յունուար 1948-ին: Նախնական կրթութիւնը ստացած է Քեսապի ազգային վարժարանին մէջ, ապա յաճախած է Հալէպի Քարէն Եփփէ ճեմարանը: Պէյրութի Հայկազեան եւ Լիբանանեան համալսարաններէն ստացած է քաղաքական գիտութեանց վկայականը: Հետեւած է Հ.Յ.Դ. կուսակցական դպրոցի դասընթացքներուն, Հրաչ Տասնապետեանի կնքահայրութեամբ` 1968-ին անդամակցած է Հ.Յ.Դ. շարքերուն: Անդամակցած է Հ.Յ.Դ. Զաւարեան Ուսանողական Միութեան եւ աւելի ուշ հանդիսացած է ատենապետ: Արաբերէն լեզու դասաւանդած է Պէյրութի Ազգային Սուրէն Խանամիրեան վարժարանին եւ Համազգայինի Նշան Փալանճեան Ճեմարանին մէջ: Եղած է Հայկական երեսփոխանական պլոքի քարտուղար, ապա 1977-էն սկսեալ մինչեւ մահը վարած է Հ.Յ.Դ. Բիւրոյի գործավարութիւնը, որուն պատճառով շրջան մը (1986-1996), նոյն պաշտօնով տեղափոխուած է Յունաստան: Դեկտեմբեր 2008-ին գումարուած Մեծի Տանն Կիլիկիոյ Կաթողիկոսութեան Ազգային ընդհանուր ժողովին կողմէ ընտրուած է եւ այնուհետեւ վերընտրուած` Ազգային կեդրոնական վարչութեան անդամ: Արա Տէմիրճեան նշանակալի ներդրում ունեցած է Հ.Յ.Դ. Լիբանանի երիտասարդական միութեան հիմնադրութեան մէջ: Պսակուած է 1975-ին` Զարմիկ Կէօքճեանի հետ, որուն անակնկալ մահը 2014-ին իրեն համար եղաւ հիմնական կորուստ մը: Յետ կարճատեւ հիւանդութեան, մահկանացուն կնքեց Նոյեմբեր 16-ի առաւօտուն, Պէյրութի մէջ: Արա Տէմիրճեան ունի երեք զաւակ` Պետօ, Սարհատ եւ Լալա, եւ երեք թոռներ:

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է

Դաշնակցական Գործիչ Արա Տէմիրճեանի Մարմինը Յանձնուեցաւ Հողին

This story is FREE for you...

Leave a Reply

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

This story is FREE for you...

Leave a Reply

Նմանատիպ Յօդուածներ

ՊՈԼՍԱՊԱՏՈՒՄՍ.- Մեր «Պոլիս»-ը Կամ՝ Աշխարհի «Իսթանպուլ»-ը

«Փոխակերպուող հայաշխարհ» ․ Ինչպէ՞ս անհամաժամանակ փոփոխութիւնները ծառայեցնել կենսունակ շարունակականութիւն ստեղծող կարողութեան

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է