0
0
Հ.Յ.Դ. Մամլոյ դիւանի պատասխանատու Արտաշէս Շահպազեանի հետ կատարուած հարցազրոյց մը, որուն մէջ Շահպազեան կ՛անդրադառնայ Դեկտեմբեր 25ին, Հ.Յ.Դ. Հայաստանի Գերագոյն ժողովի կայացման եւ այդ ժողովին Հայաստանի նախագահական ընտրութիւններուն առնչութեամբ տուած յայտնի որոշումին, ինչպէս նաեւ յառաջիկային Հ.Յ.Դաշնակցութեան ընելիքներուն:
Հ. Պարո՛ն Շահպազեան, Դեկտեմբերի 25ին տեղի ունեցաւ Դաշնակցութեան Գերագոյն ժողովը: Դուք այդ ժողովին մասնակցե՞լ էք:
Պ. Այո, մասնակցել եմ:
Հ. Ասում են` լարուած ժողով է եղել, բաւական երկար է տեւել, եւ շատերի տեսակէտն է եղել, որ պէտք է նախագահի թեկնածու առաջադրել:
Պ. Ժողովը եղել է աշխատանքային իմաստով յագեցած, շատ ելոյթներ են հնչել, բայց ձեր ակնարկած լարուածութիւնը չի եղել: Սկսել ենք ցերեկուայ 12:00ին, աւարտել` 18:00ից էլ շուտ: Սա Դաշնակցութեան չափանիշերով շատ կարճ տեւողութեամբ ժողով է: Ինչ վերաբերում է քննարկուող օրակարգային միակ հարցին, ապա կարող եմ ասել, որ գրեթէ բոլոր ելոյթ ունեցողները նշել են, որ լաւ կը լինէր, եթէ նախագահի թեկնածու առաջադրէինք: Գրեթէ բոլորն էլ շեշտել են, որ, որպէս աշխոյժ քաղաքական կուսակցութիւն, նախագահի թեկնածութեան առաջադրումը կը լինէր տրամաբանական, հնարաւորութիւն կ՛ընձեռուէր մեր մօտեցումները լայնօրէն քարոզելու, ինչ որ մենք անում ենք նման դէպքերում: Խօսուել է այն մասին, որ մենք նաեւ մեր շարքերին ու համակիր շրջանակներին կողմնորոշելու խնդիր ունենք: Այնուամենայնիւ, հակառակ փաստարկները, կարծում եմ, աւելի ծանրակշիռ էին, ինչի ապացոյցն էլ այն էր, որ ներկաների բացարձակ մեծամասնութիւնը քուէարկեց յօգուտ թեկնածու չառաջադրելու:
Հ. Պարո՛ն Շահպազեան, ցանկանում եմ հարցնել, թէ ինչպիսի՞ն է եղել Բիւրոյի ներկայացուցչի դիրքորոշումը: Վկայակոչելով ինչոր ներսի աղբիւրներ` որոշ լրատուամիջոցներ գրում են, թէ Հրանդ Մարգարեանն իր դիրքորոշմամբ ազդել է որոշման կայացման վրայ:
Պ. Ինչպէս լինում է յաճախ, չեղած աղբիւրներ վկայակոչելով, ոմանք սիրում են կամ գուցէ պարտականութիւն ունեն Դաշնակցութեան շուրջ ջուր պղտորելու: Ես, ի հարկէ, Բիւրոյի ներկայացուցչի փոխարէն պարզաբանումներ կատարելու խնդիր չունեմ, բայց քանի հարցը հնչել է, կարող եմ ներկայացնել այն, ինչ տեսել եմ, ու ի դէպ, տեսել են նաեւ 80ից աւելի ժողովականները: Հրանդ Մարգարեանը ունեցել է մէկ կարճ ելոյթ, բայց եւ այնպէս է խօսել, որպէսզի չերեւայ, թէ ինքը որ տեսակէտին է կողմնակից: Սա գուցէ մեր քաղաքական չկայացած համակարգի աւանդոյթներին ծանօթ մարդկանց անսովոր թուայ, բայց Դաշնակցութեան աւանդոյթներն ուրիշ են: Բարձր մակարդակի մարմնի անդամները ստորին մակարդակի ժողովների ժամանակ սովորաբար խուսափում են տեսակէտ յայտնելուց, որպէսզի չազդեն ընդհանուրի տրամադրութիւնների վրայ: Ի դէպ, նոյն տրամաբանութեամբ առաջնորդուելով` Հ.Յ.Դ. Բիւրոյի ներկայացուցիչը վերջում նաեւ ձեռնպահ քուէարկեց, ինչպէս մենք ենք ասում` սպիտակ քուէ տուեց:
Հ. Այնուամենայնիւ ճի՞շդ էք համարում կրաւորական դիրքորոշում որդեգրելը, ինչպիսի՞ն է լինելու այսուհետեւ Դաշնակցութեան գործունէութիւնը:
Պ. Նախ` ով ասաց, որ պէտք է կրաւորական դիրքորոշում որդեգրենք: Հէնց նոյն ժողովը շեշտեց ու արձանագրեց, որ, յառաջիկայ նախագահական ընտրութիւններում հանդէս չգալով սեփական թեկնածուով, Դաշնակցութիւնը պէտք է ծաւալուող գործընթացներին ունենայ աշխոյժ մասնակցութիւն: Անհրաժեշտ է ճիգերը շարունակել առաջնային դարձնելու համար ոչ թէ անձերի, այլ գաղափարների, ծրագրերի շուրջ մրցակցութիւնը: Բացի այս, Դաշնակցութեան համահայկական օրակարգն այնքան ընդգրկուն է, որ մի իշխանութեան համար անգամ այն թեթեւ չէր լինի: Այսօր Դաշնակցութիւնն ապրում է մեր սուրիահայ հայրենակիցների ճակատագրով, ճիգեր է գործադրում Ղարաբաղի խնդրում նորանոր ձեռքբերումների հասնելու համար, Ամերիկայի մեր ընկերները Հայ Դատի յանձնախմբերի ճանապարհով ձգտում են հայկական այլ կազմակերպութիւնների հետ միասին Քոնկրէսի հերթական պիւտճէում Հայաստանին ու Լեռնային Ղարաբաղի Հանրապետութեան տրամադրուող օգնութիւնների ցանկալի չափ ապահովել: Կարծում եմ` արդէն միւս տարուանից նոր թափ կառնեն Ցեղասպանութեան 100րդ տարելիցին ընդառաջ իրականացուելիք միջոցառումները, եւ ուրիշ շատ ու անվերջանալի գործեր: Ի հարկէ, առանցքային կամ գուցէ գլխաւոր խնդիրը Հայաստանն է եւ Հայաստանում մեր անելիքը: Խորհրդարանական ընտրութիւնները գիտէք, որ ենթակայական ու առարկայական պատճառներով մեզ համար յաջող աւարտ չունեցան: Դաշնակցութիւնը գալիք տարիներին պէտք է ձգտի քայլ առ քայլ հզօրանալ եւ նուաճել լուրջ դիրքեր: Հիմնական թիրախ պէտք է նկատուեն, մասնաւորապէս` տեղական ինքնակառավարման մարմինների ընտրութիւնները: Ելակէտ ունենալով ընդհանուր համազգային շահերը եւ պահպանելով աշխոյժ ընդդիմադիր դերակատարութիւնը` կարծում եմ` գալիք տարիներին Դաշնակցութիւնը շատ անելիքներ է ունենալու եւ յաւակնոտ թուացող շատ հեռանկարներ է բացուելու իր առաջ: Այլ կերպ չի կարելի: Ինչ վերաբերում է, այսպէս կոչուած, իրազեկ աղբիւրներից եւ այլ առուներից Դաշնակցութեան կօշիկներին դեռ ինչ ցեխ են քսելու, ապա նման առիթով ժողովրդական իմաստութիւնն ասում է. “Շունը կը հաջի` կարաւանն իր ճամբէն կը գնայ“:
